ජාත්‍යන්තරය ජයගන්නා ශ්‍රී ලාංකික තාරුණ්‍යය

භද්‍ර යෞවනයේ පසුවන තරුණ තරුණියන් යනු රටක ජීවනාලිය හෙවත් අනාගත නායකත්වයි. රටක අනාගතය භාරගන්නා තරුණ පිරිස දැනුමෙන්, කුසලතාවයෙන් හා නිර්මාණශිලිත්වයෙන් යුතු ජවසම්පන්න ප්‍රජාවක් වියයුතුය. මෙකී අභිලාෂය සාක්ෂාත් කරගැනීමේ පරමාර්ථයෙන් ශ්‍රී ලංකාවද අනාගත පරපුර ශක්තිමත් කිරීම සදහා රජයක් ලෙස සැම උත්සාහයක්ම ගනු ලබනවා.

“බලගතු තරුණයකු බිහිකිරීම” ජාතික තරුණ සේවා සභාවේ දැක්ම වන අතර “දේශය හා ජාත්‍යන්තර අභියෝග සදහා මුහුණ දීමට ශ්‍රී ලාංකික තරුණයා සවිබල ගැන්වීම හා පහසුකම් සැපයීම” එහි මෙහෙවරයි.

ලොව බොහෝ තරුණ නායකයින් එකිනෙකා හා හමුවී තමන්ගේ අත්දැකීම් හුවමාරු කරගන්නා නොයෙකුත් ජාත්‍යන්තර වැඩසටහන් පැවැත්වෙන්න තාරුණ්‍යය සවිබලගැන්වීමේ අභිප්‍රායෙන්.

“Ship for World Youth- SWY” නැතහොත් ලෝක තරුණ නායකයින්ගේ නෞකා වැඩසටහන මෙහි එක් පියවරක්.

ගෝලීයකරණය පිලිබදව ජාත්‍යන්තර කතිකාවතක් ඇති වි තිබෙන මෙවන් යුගයක සියලුම බාධක තරණය කරමින් දේශීය වශයෙන් පමණක් නොව විදේශීය වශයෙන්ද සහයෝගිතාවය, සමායෝජනය, ප්‍රමන්ත්‍රණ ආදී සැම ක්ෂේත්‍රයකම කටයුතු කළහැකි තරුණ නායකයින්ගේ අවශ්‍යතාවය සියලුම රටවලට තදින්ම දැනෙනවා. එම තරුණ නායකයින්ට අත්වැලක් වෙමින්, තම දක්ෂතා දියුණු කරගැනීමට වාර්ෂිකව පැවැත්වෙන මෙම පුහුණු වැඩසටහන මෙම වසරේදීද නොබෝදා ක්‍රියාත්මක වීමට නියමිතයි.

ජපන් රජය මගින් ක්‍රියාත්මක කෙරෙන මෙම පුහුණු වැඩසටහනේ මූලික පරමාර්ථය වන්නේ විවිධ ජාතීන්ගේ සංස්කෘතීන් හදුනාගනිමින් එමගින් අන්තර්ජාතික සහයෝගිතාවය වර්ධනය කිරීමයි. මෙමගින් නායකත්ව ගුණාංග වර්ධනය කිරීමටත්, ජාතින් අතර සන්නිවේදනය ඉහල නැංවීමටත්, කළමනාකරණ කුසලතා ඔප්නංවාලීමටත් බලාපොරොත්තු වෙනවා. . විවිධ රටවල මෙන්ම විවිධ පසුබිම් වලින් යුතු තරුණ නායකයින් එක්ව සහභාගී වන දේශන, ක්‍රියාකාරකම් හා වැඩමුළු මගින් ඔවුන් අතර අනොන්‍ය සහයෝගිතාවය වර්ධනය කිරීමටත් අපේක්ෂා කෙරෙනවා. ජාතින් අතර පවතින සීමාවන් බිදදමා ශක්තිමත් මානව සම්බන්ධතාවන් ගොඩනගමින් විශ්වීය නායකයින් බිහිකිරීම මගින් තාරුණ්‍යය ශක්තිමත් කිරීමටත් මෙම වැඩසටහනෙන් අපේක්ෂා කෙරෙනවා.

එහිදී මෙයට සහභාගිවන්නන් පහත පරිදි කණ්ඩායම් හතරකට බෙදෙනවා.
• National Delegation
• Letter Group
• Committee
• Course Discussion

අනතුරුව විවිධ ක්‍රියාකාරකම් රැසකින් සමන්විත මෙම වැඩසටහන සිදුකෙරෙනුයේ මෙම කණ්ඩායම් හරහායි.

මෙම වැඩසටහන 2018.01.16 දින සිට 2018.03.02 දින දක්වා ගොඩබිමේ මෙන්ම Nippon Maaru යන නමින් හැදින්වෙන නෞකාවක් තුලදී පැවැත්වීමට නියමිතයි. ජපානය , ඉන්දියාව හා ශ්‍රී ලංකාව යන රටවල් කරා පැමිණෙන මෙම නෞකාව රටවල් එකොළහකින් පැමිණෙන දෙසියයකට අධික තරුණ නායකයින්ගෙන් සමන්විතයි.

ජපානය,ඕස්ට්‍රේලියාව,ඉන්දියාව,ශ්‍රී ලංකාව, ස්පාඤ්ඤය,කැනඩාව,දකුණු අප්‍රිකාව ආදී රටවලින් මෙම වැඩසටහනට නියෝජිතයින් පැමිණෙනවා.

ජිවිතයේ එක්වරක් පමණක් අත්විදීමට ලැබෙන මෙම මහගු අවස්ථාවට එක් රටකින් එක්වරකට දොලොස්දෙනෙකුට පමණක් සහභාගිවීමට අවස්ථාව හිමිවෙනවා.

මෙවර ශ්‍රී ලංකා කණ්ඩායමේ නායකත්වය හිමිවී ඇත්තේ චමල් රන්දුනු අමරවීරටයි.
ශ්‍රී ලංකා කණ්ඩායමේ උප නායිකාව ලෙස තක්ෂිලා පෙරේරා හා ශ්‍රී ලංකා කණ්ඩායමේ උප නායක ලෙස මාධව ද අල්විස් තේරී පත්වී තිබෙනවා. ජාතික තරුණ සේවා සභාවේ සෞන්දර්ය කලා ඩිප්ලෝමා හා විශේෂ නර්තන කණ්ඩායමේ උපදේශකවරයෙක් වශයෙන් සේවය කරන සදුන් මධුෂික සෙනරත් බණ්ඩාර ද මෙම කණ්ඩායමේ සාමාජිකයෙක්. මධුෂා එරන්දි ,අබ්දුල් රසාක් අසාම් (AR), ලහිරු සුපුන් ගමගේ, චතුසරා කුමාර, හසිත් සදරුවන්, අචිනි නදීෂානි, සුපිපි ලක්ප්‍රභා හා රධික ජයලත් කණ්ඩායමේ ඉතිරි සාමාජිකයින්.

 

2018.01.15 වන දින මෙම පිරිස “Ship for World Youth- SWY” නැතහොත් ලෝක තරුණ නායකයින්ගේ නෞකා වැඩසටහනට සහභාගී වීමට ශ්‍රී ලංකාවෙන් පිටත්ව යාමට නියමිතයි. ලක්වැසි ජනතාවගේ හදපිරි ආශිර්වාදය ද සමගින් ජාත්‍යන්තරයේ ලංකා මෑණියන්ගේ නාමය ඉහලින්ම ඔසවා තැබීමට හැකිවේවායි දියනෙත් අපෙන් උණුසුම් සුබපැතුම්!!!!

 

 

 

ජෙරුසෙලම සහ ඩොනල්ඩ් ට්‍රම්ප්

ඊශ්‍රායලය හා පලස්තීනය ජෙරුසෙලම නගරය(Jerusalem) තමන් සතු කරගැනීමට බොහෝ කලක සිට වෑයම් කරනවා. වර්ෂ 1571 සිට පළමු ලෝක යුද්ධය වනතුරු ජෙරුසෙලම අයත් වුඋයේ ඔටෝමාන් අධිරාජ්‍යයයටයි. මුස්ලිම් ආගමට  සම්බන්ධ බොහෝ ගොඩනැගිලි ජෙරුසෙලමේ දක්නට ලැබෙන්නේ එනිසායි. වර්ෂ 1860 සිට 1887 පමණ කාලයේදී යුදෙව් ජාතිකයින් රාශියක් ජෙරුසෙලම තම නිජබිම කරගත්තා.  පළමු ලෝක යුද්ධයෙන් අනතුරුව වර්ෂ 1917 දී බ්‍රිතාන්‍යය ජෙරුසෙලම තම අණසකට යටත් කරගත්තා. කෙසේ හෝ අරාබි ජාතිකයින් හා යුදෙව් ජාතිකයින් අතර ගැටුම් හට ගැනීමට ජෙරුසෙලම නගරයත්  මුලික හේතුවක් වූ අතර  බ්‍රිතාන්‍යය එය ජාත්‍යන්තර නිතිය මගින් සමනය කිරීමටත් ක්‍රියාකලා. නමුත් අදටත් ආගම් රැසක පූජනීය ස්ථානයක් වූ ජෙරුසෙලම  ඊශ්‍රායලයට  හෝ පලස්තීනයට නිලවශයෙන් අයත් වි නැහැ.

මෙවන් තත්වයක් යටතේ, පසුගිය 6 වනදා එනම් 2017.12.06 වන දින ඇමෙරිකානු ජනාධිපති ඩොනල්ඩ් ට්‍රම්ප් මහතා ලොවම කළඹවමින් ඓතිහාසික ජෙරුසෙලම නගරය ඊශ්‍රායලයේ අගනුවර වියයුතු බවට ප්‍රකාශයක් නිකුත් කළා. එමෙන්ම, නව ඇමෙරිකානු තානාපති කාර්යාලයක්  ද එම නගරයේ ආරම්භ කරන බවත් ඔහු වැඩිදුරටත් පැවසුවා.

මෙම ප්‍රකාශය ආන්දෝලනාත්මක ප්‍රකාශයක් බවට පත් වී රටවල් රැසක විරෝධය ට්‍රම්ප්ට එල්ලවුණා. එබැවින්, වර්තමාන ඇමෙරිකානු රාජ්‍ය ලේකම්වරයා වන රෙක්ස් ටිලර්සන් මහතා ,ජනපති ට්‍රම්ප් ප්‍රකාශ කලේ ජෙරුසෙලම නගරය අනිවාර්යෙන්ම ඊශ්‍රායලයේ අගනුවර නොවන බවත්, දේශසිමා අනුව එය තීරණය කිරීමේ අයිතිය  ඊශ්‍රායලයට හා පලස්තීනය සතු බවට ප්‍රකාශ කළා.

දෙසැම්බර් 8 වනදා ඇමරිකාව ප්‍රකාශ කළේ ජෙරුසෙලම හා ක්‍රියාත්මක වන ප්‍රයෝගික පටිපාටියේ කඩිනම් වෙනසක් නොවන බවයි. පාස්පෝට් නිකුත් කිරීමෙහිද වෙනසක් නොවන බව මෙහිදී අනාවරණය වුණා.

ලෝකයේ බොහෝ රටවල නායකයින් ට්‍රම්ප්ගේ මෙම තීරණය දැඩිව හෙළා දැක්කා. මුස්ලිම් රටවල් ,යුරෝපා සංගමය,ජපානය,ඉතාලිය හා බ්‍රිතාන්‍යය  ඒ අතුරින් ප්‍රමුඛ ස්ථානයක් ගත්තා. මෙම ප්‍රකාශයෙන් අනතුරුව ලෝක සාමය තර්ජනයට ලක්වීම නිසා එක්සත් ජාතීන්ගේ ආරක්ෂක මණ්ඩලය දෙසැම්බර් 7 වනදා හදිසියේම රැස්වුණා. එහිදී සාමාජිකයින් 15දෙනෙකුගෙන් 14 දෙනෙක්ම මෙම තීරණයට විරෝධය පළකළා.  එක්සත් ජාතීන්ගේ අනුදැනුමකින් තොරව සිදුකල ට්‍රම්ප්ගේ ප්‍රකාශය ජාත්‍යන්තර නීති මෙන්ම එක්සත් ජාතීන්ගේ අභිප්‍රායන් ද  උල්ලංඝනය කිරීමක් ලෙස එක්සත් ජාතීන්ගේ ආරක්ෂක මණ්ඩලය ප්‍රකාශ කළා.

2017 නොවැම්බර් මස රැස්වූ එක්සත් ජාතීන්ගේ මහා සභාවේ දීද  ජෙරුසෙලම ඊශ්‍රායලයේ අගනුවර බවට පත් කිරීමට ජාතින් 151කගෙ විරෝධය පළවුනා. එසේ තිබියදීත් ට්‍රම්ප් මෙසේ ප්‍රකාශ කිරීම කාගේත් පිළිකුලට හේතු වුනා.

මෙම නිවේදනය හේතුකොටගෙන ඇති වූ ගැටුම් හා විරෝධතා නිසා පුද්ගලයින් 4දෙනෙකුට අවාසනාවන්ත ලෙස මියයාමට සිදුවුනා.

එමෙන්ම තුර්කිය,ජර්මනිය, ජෝර්දානය හා බ්‍රිතාන්‍යයේ පිහිටි ඇමරිකන් තානාපති කාර්යාලයන් එම රටවල ජිවත්වන හා සංචාරක ඇමරිකානුවන්ට ආරක්ෂක අනතුරු හැගවීම් නිකුත්කලා. ඇමරිකාව ද තම වැසියන්ට සිදුවිය හැකි සාහසික ක්‍රියාවන් පිලිබදව නිවේදනයක් නිකුත් කළා.

තත්වය මෙසේ වන විටදී  2017.12.22 එනම් ඊයේ දිනයේදී  එක්සත් ජාතීන්ගේ මහා සභාව ජෙරුසෙලම පිලිබදව පැහැදිලි තීරණයක් ගැනීමට යලිත් රැස්වුණා. ඒ අනුව රැස්වූ ලෝක නායකයින්ට ට්‍රම්ප්ට පක්ෂව හෝ විපක්ෂව ජන්දය භාවිතා කිරීමට අවස්ථාව ලැබුනා. ජන්දය භාවිතයට පෙර ට්‍රම්ප් ‘බිලියන ගණනින් අපෙන් ණය ගත් ජාතින් අපට  විපක්ෂව ජන්දය දේදැයි විමසිල්ලෙන් සිටින බව’ පවසමින් තර්ජනාත්මක ප්‍රකාශයක් නිකුත්කලා.

නමුත් එම තර්ජන ගර්ජන හමුවේ නොසැලුණු බොහෝ පිරිසක් එනම් රටවල් 120ක්ම ට්‍රම්ප්ගේ තීරණයට විරුද්ධව ජන්දය භාවිතා කළා. ශ්‍රී ලංකාවත් එයට අයත්.ඒ අනුව පෙර ලෙසම ජෙරුසෙලම  පවතින බවට තීරණය වුනා. “ඇමරිකාව මෙසේ ලෝකයා හමුවේ කොන්වූ ප්‍රථම අවස්ථාව ලෙස ඉතිහාස ගතවන බවටත්, එම අවස්ථාව අමතක නොකළ යුතු බවට” ත් එක්සත් ජාතීන්ගේ සංගමය විශේෂ ප්‍රකාශයක් නිකුත් කළා.

 

අන්තර්ජාලය ඇසුරිනි.

 

 

කවුද මේ ටෙම්ප්ලර් නයිට්වරු – අවසන් කොටස

ටෙම්ප්ලර් නයිට්වරු ගැන කතා බහ කරන ලිපි මාලාවේ අවසන් ලිපිය.

ශුද්ධ වූ දේශය රකින්න දිවි හිමියෙන් කැප වූ ටෙම්ප්ලර් නයිට්වරු කුරුස යුද්ධ කිහිපයකින්ම පසු ජෙරුසෙලමේ බලය අහිමි කරගෙන යුරෝපයට පසු බැස්ස ආකාරය පසුගිය ලිපිවලින් අපි කතා කළා මතක ඇති. ඊට පස්සේ ප්‍රංශ රජුගේ කපටි වැඩ නිසා මිත්‍යාදෘශ්ටිකයින් විදියට හංවඩු ගහලා ටෙම්ප්ලර්වරුන් සමූලඝාතනයකට ලක්වුන ඛේදජනක ඉරණම ගැනත් අවසන් ලිපියෙන් අපි කතා කළා. දැන් අපි කතා කරන්නේ ඊට පසු කාලීනව මේ ටෙම්ප්ලර් සංවිධානයේ ඉරණම මොන වගේද කියලා.

 

VI වන පිලිප් රජුගේ (Philip IV of France) ටෙම්ප්ලර් ඝාතන මාලාවෙන් පසුව ඉතිරි වූ සැඟවගත් ටෙම්ප්ලර් නයිටුවන් සමකාලීන අනෙකුත් නයිට් නිකායන් සමග එක වුණා. හොස්පිටලර් නිකාය සමග අනුබද්ධ වීම වගේම තම සංවිධානයේ නම වෙනස් කරමින් අලුත් මුහුණුවරකින් ගමන් ආරම්භ කරන්නට වුණා. පෘතුගාලයේ කතෝලික අධිකරණ බලය හිමි Order of Christ සහ Supreme Order of Christ යන සංවිධාන මෙන්ම  වතිකානුවේ අධිකරණ බලය හිමි ශුද්ධ වූ කතෝලික සංවිධානය වන Holy See යන නාමයන්ගෙන් අදටත් තම සංවිධානය ඉදිරියට පවත්වාගෙන යමින් සිටින්නේ ටෙම්ප්ලර්වරුන්මයි.

 

order of Christ හි ලාංජනය

2001 වසරේ සැප්තැම්බරයේ ඉතාලි ජාතික පුරාවිද්‍යාඥවරියක් වන බාබරා ෆ්රේල් විසින් (Barbara Frale) විසින් වතිකානු රහස්‍ය ලේඛන (Vatican Secret Archives) අතර තිබී 1308 වසරේ අගෝස්තු මස 17- 20 කාල වකවානුවේ ලියන ලද “චිනන් පත්‍රිකා” (Chinon Parchment) නම් ලියවිල්ලක් සොයාගනු ලබනවා. එහි සඳහන් වන්නේ ටෙම්ප්ලර්වරුන් මිත්‍යාදෘශ්ටිකයන් ලෙස 1308 වසරේ දී නම් කළ බවත් 1312 වසර වනවිට සංවිධානය සම්පූර්ණ ලෙසම විසිරුවා හරිනු ලබන බවත් ය. 1308 අගෝස්තු 20 දාතම යුත් තවත් චිනන් පතක කියවෙන්නේ ටෙම්ප්ලර්වරුන් තමා කළ මිසදිටු කම් පිළිගත් බවත් එසේ පිළිගත් පිරිසකට නැවත පල්ලිය සමග එක් වී කටයුතු කිරීමට ඉඩ දෙන බවට පිලිප් රජු විසින් නියෝග කළ බවත් ය.

බාබරා ෆ්රේලෙ

කෙසේ නමුත් යුරෝපය පුරා ටෙම්ප්ලර්වරුන් හා ඔවුන්ට අයත් පල්ලි හා දේවස්ථාන පිළිබඳ පුරාවෘත බහුළව පවතිනවා. විශේෂයෙන් ප්‍රංශය, එංගලන්තය, ස්පාඤ්ඤය, පෘතුගාලය, ඉතාලිය, හන්ගේරියාව හා ඊශ්‍රායලය වැනි රට වලින් එවන් දෑ බහුලවම සොයා ගන්න පුළුවන්. එම රටවල් පුරා විසිරුණු ටෙම්ප්ලර්වරුන්ගේ සංඛ්‍යාව හරියටම ගණන් බලා නැතත් එය 15,000 ත් 20,000 ත් අතර සංඛ්‍යාවක් විය හැකි බව පැවසෙනවා.

චිනන් පත්‍රිකා

ප්‍රධාන ආචාර්‍යවරයා (Grand Master) යන තනතුර යටතේ පාලනය වූ ටෙම්ප්ලර් සංවිධානය තුල තවත් සංවිධාන මට්ටම් තුනක් තිබූ බව කියවෙනවා. එනම් වංශවත් නයිට්වරු, වංශවත් නොවන සැරයන්වරු සහ දේවගැතිවරු යන කොටස්. වංශවත් නයිට්වරුන් ගැන කතා කිරීමේදී ඔවුන් පරම්පරානුකූල නයිට්වරුන් වියයුතු යි. ඊට හේතුව නයිට්වර ප්‍රදානය කෙරෙන උත්සවාදිය ටෙම්ප්ලර් සංවිධානය තුල නොතිබීමයි. ඒ වාගේම නයිටුවන් හට තරමක විශාල අශ්වාරෝහක කණ්ඩායමක් ( heavy cavalry) අයත් වෙනවා. එය අශ්වයන් තුනක් හෝ හතරක් සහිතව සුළු සේවකයන් දෙදෙනෙකු පමණ ඇතුලත් කණ්ඩායමක් වෙනවා. මේ සුළු සේවකයන් සංවිධානයෙන් පිටත සිටින තාවකාලික පදනම යටතේ කුලියට බඳවාගනු ලබන සේවකයන්.

ටෙම්ප්ලර් නයිට්වරුන් සහ සැරයන්වරුන්

මීලඟ අංශය වන වංශවත් නොවන සැරයනවරු යුරෝපයේ වංශවත් නොවන පවුල් වලින් තමාට අනන්‍ය දක්ෂතා මත බඳවාගනු ලබන පිරිස්. ඔවුන් අතර වෙළෙන්දන්, කම්මල්කරුවන්, පෙදරේරුවන්, වඩුවන් වැනි විවිධ ක්ෂේත්‍රයෙහි නිපුණ පිරිස් එකතු කරනු ලැබුණා. අශ්වයෙකු ( light cavalry) පමණක් සපයනු ලැබූ සැරයන්වරුන් කුරුස යුද්ධයේදී අනෙක් නයිට්වරුන් සමග තම දායකත්වය ටෙම්ප්ලර්වරුන්ට ලබා දුන්නා. සැරයන්වරුන්ගේ ප්‍රධානී තනතුර කළු හෝ දුඹුරු ඇඳුමක් හැඳි කමාන්ඩර්වරයෙකු විසින් දරණු ලැබුවා. අවසන් සංවිධාන මට්ටම වන පූජකවරුන්  (chaplains) ටෙම්ප්ලර් සංවිධානය තුල ආධ්‍යාත්මික, ආගමික වතාවත් ඉටු කරමින් සංවිධානයේ  අනුශාසකත්වය දක්වනු ලැබුවා.

පූජකවරයෙක්, නයිට්වරයෙක් හා සෙසු නිලධාරියෙක් ඇතුලත් ටෙම්ප්ලර් කණ්ඩායමක්

පසු කාලීනව නයිට්වරුන්ට තම රුචි ඇදුම් ඇදීමට මෙන්ම භාවිත කිරීමට ඕනෑ තරම් අශ්වයින් සිටියත් මුල් කාලීන ටෙම්ප්ලර් නයිට්වරුන් ගේ ඇවතුම් පැවතුම් ගැන කතා කිරීමේදී ඉතා පුදුම සිතෙන කරුණු කාරණා රාශියක් මතු වෙනවා. සතියකට දෙතුන් වතාවකට වඩා අඩු වේල් ගණනක් මස් අනුභවයට ගනිමින් කාන්තාවන් සමග හෝ තමාගේම පවුලේ කිසිවෙකුත් සමග කිසිඳු සම්බන්ධතාවක් ඇතිකර නොගනිමින් තාපස ජීවිතයක් ගත කරනු ලැබුවා. පසු කාලීනව ප්‍රධාන ගුරුවරයෙකු යටතේ අශ්වයින් හතරදෙනෙකු, එක් පූජකවරයෙකු, අශ්වයින් තිදෙනෙකු සහිත ලිපිකරුවෙකු හා අශ්වයින් දෙදෙනෙකු සහිත සැරයන්වරයෙකු අනුයුක්තව කටයුතු කළා.

රැවුලුකාර ටෙම්ප්ලර්වරු

නයිට්වරුන් රතු කුරුසිය සහිත ප්‍රාවරයක් ඇඳි අතර සැරයන්වරු රතු කුරුසිය සහිත කළු ගාංචුවක් බැඳ දුඹුරු පැහැ ප්‍රාවරයකින් සැරසුණා. නයිට්වරුන් සුදු ප්‍රාවරය පැලඳීම චාරිත්‍රයක් කොටගෙන තිබුණේ දෙවන කුරුස යුධ කාලයේ පටන්මයි. රතු පැහැ කුරුස සලකුණෙන් දිවි පිදීම සංකේතවත් කෙරෙනවා. ආගම වෙනුවෙන් දිවි පිදීම නිසැක වශයෙන්ම ස්වර්ගයේ තැනක් හිමි කරන්නක් බව ඔවුන් අදහන්නක්. ඒ නිසා කුරුස යුද්ධයකදී මිය යාම ඉතා උතුම් දෙයක් ලෙස අතීත කතෝලික ප්‍රජාව සලකනු ලැබුවා. රැවුල වැවීම සම්බන්ධයෙන් ටෙම්ප්ලර්වරුන් හා බැඳි චාරිත්‍ර පශ්චාත් කාලීන යුගවල දී ඇති විය. සම්පූර්ණ වශයෙන් දික්ව රැවුල වැවීමට පෙළඹ සිටි ටෙම්ප්ලර්වරුන් ගණනාවක් 1310-1311 වකවානුවේ දී ප්‍රංශ රජු අත් අඩංගුවට ගත් බව කියැවේ.

 

Temple Underground Railway Station, London

අදට ද ටෙම්ප්ලර්වරුන් සමග සම්බන්ධ ස්ථාන, නාම ගණනාවක් (List of places associated with the Knights Templar) යුරෝපය පුරා පවතිනවා. මහා බ්‍රිතාන්‍යයට අයත් ලන්ඩනයේ පමණක් Temple Bar පිවිසුම, ටෙම්පල් උමං දුම්රිය නැවතුම (Temple Underground station) වැනි ස්ථාන මෙම නයිටුවන්ගේ නමින් අදටත් දැකිය හැකියි.

IGOT සංවිධානය

ටෙම්ප්ලර්වරුන්ගේ ආභාෂය ලද සංවිධාන ගණනාවක් අදටත් ලොව පුරා පවතී. International Order of Good Templars (IOGT) සංවිධානය මුල් කාලීන තාපස ටෙම්ප්ලර්වරුන් දුක්විදිමින් පිළුණු වූ කිරි බොමින් ගතකළ දුෂ්කර කාලය ගැන සිහි කරමින් අමද්‍යප හා මත්ද්‍රව්‍ය වලින් තොර වීම පිළිබඳව අද කාලයේ සමාජයට යහපත් සේවාවක් ඉටු කරයි. ටෙම්ප්ලර්වරුන්ගේ චාරිත්‍ර බොහොමයක් පිළිපදිනු ලබන ෆ්රීමේසන්වරුන්  (Freemasonry) විසින් පවත්වාගෙන යනු ලබයි.

Freemasons සංවිධානය

කෙසේ නමුත් ටෙම්ප්ලර් නයිට්වරුන් සම්බන්ධව බොහොමයක් අභිරහස් කරුණු අදට ද නිරාකරණය වී නැහැ. විශේෂයෙන් ඔවුන් ජෙරුසෙලමේ සිට පසු බසිද්දී රැගෙන එනු ලැබුවා යැයි පුරාවෘතයේ සඳහන් සොලමන් දේවාලයේ නිධන් වස්තු යුරෝපයේ කොහේ හෝ තැනක සැඟව ඇතැයි ඇතැමුන් විශ්වාස කරනවා. ටෙම්ප්ලර්වරුන් විසින් සොලමන් දෙවොලෙන් ගෙන එනු ලැබූ ජේසුස් ක්‍රිස්තුස්වහන්සේ අවසාන භෝජන රාත්‍රියේදී වයින් පානය කළ ‘ශුද්ධ වූ බඳුන’ (Holy Grail) සහ ගල පුවරු වල කොටන ලද ‘දස පණත’ ඇතුලත් මංජුසාව (Ark of the Covenant) වැනි පුරාවස්තු ඔවුන් එලෙස ගෙන එන්නට ඇතැයි විශ්වාස කෙරෙනවා.

National Treasure චිත්‍රපටය

මේ ඇතැම් පුරාවෘත අලලා ඓතිහාසික නවකතා වන IvanhoeFoucault’s Pendulum සහ The Da Vinci Code වැනි ග්‍රන්ථ ද චිත්‍රපට වන  National Treasure සහ Indiana Jones and the Last Crusade මෙන්ම වීඩියෝ ක්‍රීඩා වන  Broken Sword සහ Assassin’s Creed වැනි ඒවා නිර්මාණය කර තිබෙනවා.

 

කොටස් හතරකින් සමන්විත ටෙම්ප්ලර් නයිට්වරුන් ගැන ලිපි මාලාව මෙතෙකින් සමාප්තයි.

පෙර පළවූ කොටස් පහතින්..

සටහන – ඉසුරු හිදැල්ලආරච්චි

කවුද මේ ටෙම්ප්ලර් නයිට්වරු?

කවුද මේ ටෙම්ප්ලර් නයිට්වරු? – 2 කොටස

කවුද මේ ටෙම්ප්ලර් නයිට්වරු ? – 3 කොටස

 

තැපෑලෙන් ගිය දරුවෝ…

අප බොහෝවිට තැපැල් සේවාව භාවිතා කරනු ලබන්නේ ලිපියක් හෝ පාර්සලයක් තවත් කෙනෙකු වෙත හුවමාරු කරගැනීම සඳහායි. නමුත් අද අපි කතා කරන්න යන්නේ ඊට හාත්පසින්ම වෙනස්වූ තැපැල් හුවමාරුවක් ගැනයි.

 

20 වන ශතවර්ෂය ආරම්භයේ දී ඇමරිකාවේ තැපැල් සේවයේ සිදුවූ වඩාත් කැපී පෙනෙන නවෝත්පාදනයන් නම් විශාල පැකේජ හා පාර්සල් තැපැල් මගින් හුවමාරු කරගැනීමට අවස්ථා උදාවීමයි. 1913 ජනවාරි මස 1 වන දින තැපැල් කාර්යාලීය පාර්සල් බෙදාහැරීමේ සේවය නිල වශයෙන් ආරම්භ වී ඇත. මෙම නව සේවාව මගින් ඇමරිකානුවන් මිලියන ගණනකට සියළුම භාණ්ඩ හා සේවා සඳහා හොඳ ප්‍රවේශයක් ලබා දුනි. එහෙත්, ඒ අතර තරමක් වෙනස් ආකාරයේ හුවමාරුවක් ඇමරිකානු ඉතිහාසයෙන් වර්තා වේ. එනම් ඇතැම් දෙමව්පියන් විසින් තැපැල් මාර්ගයෙන් තම දරුවන් හුවමාරු කිරීමට තැත් කිරීමයි.

 

 

 

 

මෙසේ තැපැල් මාර්ගයෙන් දරුවන් හුවමාරු වූ අවස්ථා පිළිබඳව එක්සත් ජනපදයේ තැපැල් සේවා ඉතිහාසඥ ජෙනී ලින්ච් මහතා විසින් බොහෝ තොරතුරු රැස්  කරගෙන ඇති අතර ඔහු විසින් Smithsonian වෙබ් අඩවිය වෙත පවසා ඇති පරිදි මෙය එවකට බොහෝ සෙයින් කතා බහට ලක්වූ කරුණක් වී ඇත.

 

මෙම පාර්සල් තැපැල් ක්‍රමය ආරම්භ කිරීමෙන් සති කිහිපයකට පසුව, ජෙසී සහ මැතිල්ඩා බෙග්ගල් නම් ඔහියෝ යුවළක් මාස අටක් වයසැති ඔවුන්ගේ පුතා වූ  ජේම්ස් තම මිත්තණියට යැවූහ. ලින්ච් පවසන පරිදි, කුඩා ජේම්ස්ගේ බර, තැපැල් පාර්සල් ක්‍රමය හරහා යැවිය හැකි පැකේජ බර ප්‍රමාණය වූ පවුම් 11 සීමාව ඉක්මවා ගොස් නොමැති අතර ඔහුව භාර දීම සඳහා වූ තැපැල් ගාස්තුව ශත 15 ක් පමණක් වී ඇත. ඒ අනුව ජේම්ස් බෙග්ගල් යනු තැපැල් මාර්ගයෙන් හුවමාරු කරන ලද පළමු දරුවා වේ. ඉන් පසුව ඉතාමත් ඉක්මනින්ම පුවත්පත් හරහා මෙම සිදුවීම ප්‍රසිද්ධියට පත්ව ඇති අතර ඊලඟ වසර කිහිපය තුළදී වෙනත් පිරිස් විසින් ද මෙම ක්‍රමය යොදාගනිමින් දරුවන් හුවමාරු කිරීම සිදුකර ඇත.

 

 

 

 

මෙසේ ඊළඟ වසර කිහිපය තුළදී දරුවන් තැපැල් කිරීමේ අවස්ථා තවත් සිදුවී ඇති අතර පාර්සල් තැපැල් සේවාවේ සීමාවන් මිනිසුන්ගේ මැදිහත් වීම මත කාලයෙන් කාලයට වෙනස් වී ඇත. ඒ අතර 1914 පෙබරවාරි 19 වන දින චාලට් මේ පියර්ස්ටර්ෆ් නම් සිව් හැවිරිදි දැරියක, ඇයගේ නිවසේ සිට ඇයගේ මිත්තණියගේ නිවස දක්වා දුම්රිය තැපැල් සේවාව හරහා හුවමාරු කිරීමේ අවස්ථාවක් ද වාර්තා වී ඇත. පසු කලෙක නැන්සි පෝප් විසින් ජාතික තැපැල් කෞතුකාගාරයේ ලියා ඇති මෙම සිව් හැවිරිදි දැරියගේ කතාව පුරාවෘත්තයක් බවට පත්වී ඇත. කෙසේවෙතත් කුඩා දැරියගේ මවගේ ඥාති සහෝදරයකු දුම්රිය තැපැල් සේවාවේ ලිපිකරුවකු වශයෙන් සේවය කල බැවින් හිරිහැරයකින් හෝ කරදරයකින් තොරව ගමන් කිරීමට ඇයට අවස්ථාව හිමිවී ඇත. ලින්ච්ගේ අදහස නම් දුම්රිය ටිකට් පතක මිලට වඩා තැපැල් සේවාවේ ගාස්තුව අඩුවීම හේතුවෙන් චාලට්ගේ දෙමාපියන් මෙවැනි ක්‍රමයක් භාවිතා කරන්නට ඇති අතර මවගේ ඥාති සහෝදරයාගේ ඉල්ලීම නිසාවෙන් කුඩා දරුවා මෙසේ තැපැල් මාර්ගයෙන් යැවීමට ප්‍රාදේශීය නිලධාරීන්ට සිදුවන්නට ඇති බවයි.

 

අවසානයේ,වොෂිංටන් පෝස්ට්, නිව් යෝර්ක් ටයිම්ස් හා ලොස් ඇන්ජලීස් ටයිම්ස් පුවත්පත් ඇතුලු බොහෝ පුවත්පත් දැන්වීම් මඟින් තැපැල් කාර්යාලය  විසින් නිල වශයෙන් ප්‍රකාශ කර තිබුනේ දරුවන් තැපැල් මාර්ගයෙන් තවදුරටත් යැවිය නොහැකි බවයි. කෙසේවෙතත් මෙසේ දරුවන් තැපැල් මඟින් හුවමාරු කිරීම නිත්‍යානුකුල නොවන බවක් හා නොසැලකිලිමත් බවක් හැඟී ගියද ලින්ච් පවසන්නේ එහිදී ග්‍රාමීය ප්‍රජාව විසින් ප්‍රාදේශීය තැපැල් නිලධාරීන් මත විශාල විශ්වාසයක් රඳවා ඇති බවයි. තවද ඔහු පවසන පරිදි තැපැල් බෙදාහරින්නන් යනු විශ්වාසනීය  සේවකයින් වන අතර අදටත් ග්‍රාමීය ප්‍රදේශ වල ජිවත්වන මිනිසුන්ගේ ජිවිත සඳහා ඔවුන් සහය වේ. මක්නිසාද යත් ඇතැම්විට ඉතාම ග්‍රාමීය ප්‍රදේශ වල ඇති නිවෙස් වෙත යන එකම ප්‍රාදේශීය නිලධාරියා තැපැල් බෙදාහරින්නා වන නිසාවෙනි.

 

 

කෙසේහෝ වර්තමානය වනවිට නම් දරුවන්ගේ ගමන් සඳහා තැපැල් මල්ලකට එහා ගිය විවිධ වූ ආරක්ෂාකාරී ක්‍රම තිබීම නම් ඉතාමත් සතුටට කරුණකි.

 

තොරතුරු හා ඡායාරූප Smithsonian වෙබ් අඩවිය.

 

කවුද මේ ටෙම්ප්ලර් නයිට්වරු? – 2 කොටස

පසුගිය කොටසින් ටෙම්ප්ලර් නයිට්වරුන්ගේ ආරම්භය ගැන අපි කතා කළා මතක ඇති. මේ ලිපිය ඔවුන්ගේ ව්‍යාප්ත වීම ගැන…

ආරම්භයේදී ඉතා දුගී ලෙස සිටි ටෙම්ප්ලර්වරුන් පසුව කතෝලික ප්‍රජාවගෙන් ගලා ආ ආධාර උපකාර නිසා ධනවත් වුණ බව පහුගිය ලිපියෙන් ඔයාලා කියෙව්වානේ. ටෙම්ප්ලර්වරුන් සංවිධානයක් විදියට ශක්තිමත් වෙද්දී ඔවුන්ට තම සංවිධානය නිසි ලෙස කළමනාකරණය කරගන්න ඕන වුණා. මූලිකවම පුහුණු යුධ ඒකකයක් විදියට සංවිධානය ස්ථාපිත වුණත් පසුව මූල්‍ය කළමනාකරණය, නයිට්වරු පාලනය කිරීම වගේ කරුණු වලට වෙනම මණ්ඩලයක් පත් කෙරුණා. සංවිධානයේ ප්‍රධානියා විදියට එක් නයිට්වරයෙකු පත් කෙරුණා. ඔහු ප්‍රධාන ගුරුවරයා (Grand Masters of the Knights Templar) ලෙස හැඳින්වුවා.

 

ටෙම්ප්ලර් Grand Master වරුන්ගේ සංකේත

 

ඩෑන් බ්‍රවුන්ගේ ඩ වින්සි කෝඩ් (The Da Vinci Code) පොතේ ‘ප්‍රයරි ඔෆ් සයන්’ සංවිධානයේත් මේ ප්‍රධාන ගුරුවරයා කියන තනතුර ගැන සඳහන් වෙනවා ඔබට මතක ඇති. ඒ වගේම තවත් රහස් සංවිධානයක් වන ‘ෆ්රීමේසන්වරුන්’ අතරත් මේ Grand Master කියන තනතුර පවතිනවා. ඒ සංවිධාන සියල්ලම වගේ මේ ටෙම්ප්ලර් නයිට්වරුන්ට සම්බන්ධතා දක්වන බවයි කියවෙන්නේ. ෆ්රීමේසන්වරු හා ප්‍රයරි ගැන අපි ඉදිරියට කතා කරමු.

 

ටෙම්ප්ලර් බැංකුවක්

මේ ටෙම්ප්ලර්වරුන් ලොව පළමු මුදල් තැන්පතු ක්‍රමය, එහෙමත් නැත්නම් බැංකු ක්‍රමය ආරම්භ කළා කිව්වොත් ඔබ පුදුම වෙනවා ද? නමුත් ඒක ඇත්ත. කුරුස යුද්ධයට යාමේදී වංශවත් ධනපති සෙන්පතියන්, ආදිපාදවරුන් ආදිය තමන්ගේ රන්, රිදී, මුතු, මැණික්, මුදල් ආදිය ටෙම්ප්ලර්වරුන් භාරයේ සුරක්ෂිතව තබා ගියා යුද්ධය අවසන්වී පැමිණ නැවත ගන්න තෙක්. ඒ වෙනුවෙන් ඔවුන් තැන්පතු ලියවිල්ලක් ලබා දුන් බවත් සඳහන් වෙනවා. පසු කාලයක එම ලියවිල්ල ඉදිරිපත් කරන තැනැත්තාට එහි සඳහන් වස්තුව ආපසු ලැබෙනවා. මෙසේ ඒවා ආරක්ෂා කරනවාට ඔවුන් සුළු පොළියකුත් අය කළ බව කියවෙනවා. මෙය අද භාවිත වන බැංකු ක්‍රමයට හා චෙක් ක්‍රමයට ඉතා සමානයි. එමගින් ටෙම්ප්ලර්වරුන් තවත් ධන්වතුන් බවට පත් වුණා වගේම ඔවුන්ගේ මූලස්ථානය වූ සොලමන් දෙවොලේ වස්තුව ඉතා විශාල වශයෙන් ගබඩා කර තැබීමටත් සිදුවුනා.

ටෙම්ප්ලර්වරුන්ගේ නෞකා

මීලඟට ඔවුන් තමන් සතු වූ ධනය හා ලැබෙන පරිත්‍යාග විවිධ ව්‍යාපාර වල ආයෝජනය කරන්න පටන්ගත්තා. යුරෝපයේ, මැදපෙරදිග මෙන්ම ආසියාව දක්වා ඔවුන්ගේ වෙළඳ කටයුතු ව්‍යාප්ත වුණා. ඔවුන් තමන්ගේම නාවුක ජාලයක් ඔස්සේ භාණ්ඩ ආනායන අපනයන හැකියාව වර්ධනය කරගත්තා. එක් වකවානුවක සයිප්‍රස් දූපත (Cyprus) ඔවුන් සතුව තිබුණා. ඉතිහාසඥයන් හඳුන්වන විදියට ටෙම්ප්ලර්වරු තමයි පළමුවරට අන්තර්ජාතික වෙළඳාම ආරම්භ කරලා තියෙන්නෙත්.

 

ශ්‍රේෂ්ඨ සලාදීන්

12වන සියවස මැද භාගය වෙනකොට නැවතත් කුරුස යුද්ධයක් හිස ඔසවමින් තිබුණා. නමුත් පෙරට වඩා මෙවර ඉස්ලාම් කොටස් සලාදීන් (Saladin) වැනි ශූර රජවරුන් යටතේ සංවිධානය වෙලා තිබුණේ. ඒවගේම ක්‍රිස්තියානිවරුන් අතර විවිධ මතභේද ඇතිවී තිබුණු කාලයක් ඒක. ටෙම්ප්ලර්වරුන් පවා තවත් ඔවුන් වැනිම නයිටු සංවිධාන වන හොස්පිටලර්  (Knights Hospitaller) හා ටියුටොනික් (Teutonic Knights) සමග බලය තහවුරු කරගැනීම සඳහා ගැටෙන්නට වුණා.

 

ටියුටොනික් නයිට්වරුන්

ටෙම්ප්ලර්වරුන් ඉතා අසාර්ථක ලෙස මුහුණ දුන් ‘හැටින්’ සටනේදී  (Battle of Hattin) ඔවුන් සලාදීන් ප්‍රමුඛ ඉස්ලාම් හමුදාවන් අතින් අන්ත පරාජයක් ලැබීම නිසා 1187 දී ජෙරුසෙලමේ බලය නැවතත් මහමදිකයන් අතට පත් වුණා.

 

සලාදීන් හමුදා වල ජයග්‍රහණය

කෙසේ වෙතත් හයවැනි කුරුස යුද්ධයේදී ශුද්ධවූ රෝමානු අධිරාජ්‍යයා වූ II වන ෆෙඩ්‍රික් (Frederick II) විසින් 1229 දී ටෙම්ප්ලර්වරුන්ගේ සහයක් නොමැතිවම ජෙරුසෙලම නැවතත් කතෝලික ග්‍රහණයට නතු කරගත්තා. නමුත් ඒ සඳහා ඔහුට දශක දෙකකටත් මදක් වැඩි කාලයක් ගත වුණා. නමුත් නැවතත් 1244 දී සුන්නි මුස්ලිම් රාජවංශයට අයත් වූ ‘අයුබිඬ්වරුන්’ සහ පර්සියානු සම්භවය සහිත ‘ක්වරෙස්(z)මිඬ්’ කුලී හේවයීන්ගෙන් සැදුම්ලත් මහා හමුදාවක් මගින් ජෙරුසෙලම තම යටතට ගනු ලැබීමෙන් අනතුරුව නැවතත් එය යුරෝපීන්ට ලැබෙන්නේ 1917 දී  පළමු ලෝක යුද්ධයේ දී  (World War I) තුර්කියේ ඔටෝමාන් අධිරාජ්‍යයා ( Ottoman Empire) පරාජය කිරීමත් සමගය.

රෝමානු අධිරාජ්‍යයා වූ II වන ෆෙඩ්‍රික්

තම භූමිය අහිමි වී යාමත් සමග ටෙම්ප්ලර්වරුන් ජෙරුසෙලමෙන් උතුරුදිග ඊශ්‍රායලයේ වරාය ආශ්‍රිත නගරයක් වන ‘ඒකර්’ (Acre) වෙත පසුබසිනවා. එම භූමියත් සතුරන් අතට පත් වූ පසු ඔවුන් අද සිරියාවේ ( Syria) ‘ටාර්ටස්’ (Tartus) නමින් හැඳින්වෙන ‘ටෝටොසා’ (Tortosa) ප්‍රදේශයේ තම මූලස්ථානය පිහිටුවා ගනු ලබනවා. එතැනිනුත් ඔවුන් සයිප්‍රසය බලා පසුබසින අතර එහි ‘ලිමසොල්’(Limassol) ප්‍රදේශයේ කඳවුරු බැඳ ගනිමින් හුදකලා කුඩා දූපතක් වූ   Arwad Island හි තම යුද බලකොටු ගොඩනැගීමට උත්සාහ ගන්නවා. අනතුරුව 1302 1303 කාලය තුල එවකට ඊජිප්තුවේ සුල්තාන්වරයාගේ ආක්‍රමණ හේතුවෙන් ටෙම්ප්ලර්වරුන්ට ශුද්ධ වූ දේශයෙන් තම අවසන් පියවරත් ඉවතට තබන්නට සිදු වෙනවා.

 

ටෙම්ප්ලර්වරුන් ශුද්ධවූ දේශය හැර යාම

යුද්ධය අවසන් වීමත් සමග ටෙම්ප්ලර්වරුන්ගේ පිරිහීමද ආරම්භ වුණා කිව්වොත් නිවැරදී. නමුත් ඔවුන් තවමත් ලොව පුරා පැතිරුණු කතෝලික ප්‍රජාවගේ මූලික කොටසක් වෙලා හමාරයි. ඊට හේතුව යුරෝපය පුරා ටෙම්ප්ලර් දේවස්ථාන විසිරී පැතිරී තිබීම වගේම යුරෝපය පුරා ආර්ථිකටයේ සැලකිය යුතු කොටසක් ඔවුන්ට අයත් වී තිබීම. ටෙම්ප්ලර් බැංකු, ගොවිපොළ, වයින් සෑදීම සඳහා වූ මිදි වතු වැනි ව්‍යාපාර ඔවුන්ට අයත්ව තිබුණා.

 

ටෙම්ප්ලර්වරුන්ට අයත් සැඩ්ල්ස්කොම්බ් ගොවිපොළ

එමෙන්ම ඔවුන් යුරෝපය පුරා ස්ථාවර හමුදාවක් (standing army) ලෙසින් කටයුතු කළා. ඔවුන්ට දේශසීමා හරහා බාධාවකින් තොරව ගමන් කිරීමේ ඇති වරය නිසා ඔවුන් ඒ විදියට යුරෝපය පුරා ගමන් කරමින් සුළු සුළු ගැටුම් මැඩපැවැත්වූවා. අර රොබින් හුඩ් ටෙලියෙත් ටෙම්ප්ලර් නයිට්වරු එංගලන්තයට එන්නේ ඒ විදියට තමයි. යුද්ධ කිරීම වෙනුවට ඔවුන් අනෙකුත් නයිට් නිකායන් පසුකාළීනව පල්ලිය සමග එකතු වෙලා නිකායන් හදාගත්තා වගේ ටෙම්ප්ලර් නිකාය ආරම්භ කරලා දේවස්ථාන පවා ඇති කළා.

 

මතු සබැඳි..

ටෙම්ප්ලර්වරුන්ට අත් වූ යුරෝපා ඉතිහාසයේ කෲරතම ඉරණම මීලඟට..

 

සටහන – ඉසුරු හිදැල්ලආරච්චි

 

කවුද මේ ටෙම්ප්ලර් නයිට්වරු?

ඔබ මීට වසර 20ට පමණ පෙර නැරඹූ ටයිටස් තොටවත්තයන් හඬ කවා ජාතික රූපවාහිනියේ විකාශය වූ රොබින් හුඩ් කතා මාලාව ඔබට මතකද? එහෙමත් නැතිනම් සුප්‍රකට ලේඛක ඩෑන් බ්‍රවුන්ගේ ‘Da Vinci Code’ පොතේ කියවෙන ‘Priory of Sion’ සංවිධානයේ මුල් සංවිධානය ගැන ඔබට මතකද? නැතිනම් assassin’s creed වීඩියෝ ගේම් එකේ, චිත්‍රපටයේ ඉන්න වීරයා ඔබට මතකද? රොබින්, මැරියන්, ලිට්ල් ජෝන්, ටක්, ෂෙරීෆ්, ගිස්බන් වැනි චරිත සමග එංගලන්ත සොල්දාදුවන්, මංකොල්ලකරුවන් වගේ ලාංකික අපට නුහුරු අලුත්ම ඉතිහාස පැතිකඩක් තමයි රොබින් හුඩ් කතාමාලාවේ තිබුණේ. එහි එන, රතු කුරුසයක් ලකුණු කරගත් ලෝහ සන්නාහ සහිත සුදු පාට ඇදුමක් ඇඳපු ටිකක් භයංකාර පෙනුමක් තිබුණු අශ්වාරෝහක නයිට්වරු පිරිසක් ෂෙරීෆ්, ගිස්බන් එක්ක එකතුවෙලා රොබින්ලගේ කණ්ඩායම අල්ලගන්න උත්සාහ කරනවා මතකද? ඊට පසුවත් කතාංග කීපයකින්ම අපට හමුවෙන මේ අමුතු නයිට්වරු තමයි ටෙම්ප්ලර් නයිට්වරු එහෙම නැතිනම් පල්ලියේ නයිට්වරු කියලා ලෝක ඉතිහාසයේ සඳහන් වෙන්නේ. මේ ලිපි මාලාවේ අපි මුලින්ම කතා කරන්නේ මේ පල්ලියේ තාපස නයිට්වරු ගැන.

ටෙම්ප්ලර් නයිට්වරයෙක්

පළමු කුරුස යුද්ධයෙන් (First Crusade) පස්සේ යුරෝපීයන් විසින් 1099 දී පූජනීය ජෙරුසෙලම (Jerusalem) මුස්ලිම්වරුන්ගෙන් මුදාගැනීමෙන් පසුව කතෝලික බැතිමතුන්ට ජෙරුසෙලම වන්දනා කරන්න අවස්ථාව ලැබුණා. මේ ජෙරුසෙලම සම්පූර්ණයෙන්ම කතෝලික පාලන බලය යටතේ තිබුණත් යුරෝපයෙන් එයට යන මාර්ගය මුළුමනින්ම යුරෝපීන්ගේ ආරක්ෂාව යටතේ තිබුණේ නැහැ. මේ නිසා ජෙරුසෙලමට එන මාර්ගයේ සිටි මංපහරන්නන්, සොරුන් වගේ කණ්ඩායම් වලින් ශුද්ධවූ දේශය වන්දනා කරන්න එන බැතිමතුන්ට එල්ලවුණේ දැඩි හිරිහැරයක්. කතෝලික බැතිමතුන්ගේ වස්තුව කොල්ලකෑමෙන් නොනැවතී ඔවුන් විවිධ වද බන්ධන වලට ලක් කරලා මරලා දාන්න තරම් මේ මංපහරන්නන් කෲර වුණා.

ටෙම්ප්ලර්වරුන්ගේ කුරුසිය ලකුණ

තත්ත්වය උග්‍ර වෙද්දී 1119 දී මේකට විසඳුමක් අරගෙන ප්‍රංශයේ නයිට්වරයෙකු වන හියුස් ඩි පෙයින්ස් (Hugues de Payens) එවකට ප්‍රංශයේ රජු වූ කුරුස යුද්ධයේ ප්‍රධානියා වූ II වන බෝල්ඩ්වින් රජු ( Baldwin II of Jerusalem) සහ ජෙරුසෙලමේ පූජක ප්‍රධානියා වන ප්‍රධාන පූජකවර වෝමන්ඩ් ( Warmund, Patriarch of Jerusalem) හමුවීමට එනවා.

හියුස් ඩි පෙයින්ස්

එමගින් ජෙරුසෙලමට එන බැතිමතුන්ට ආරක්ෂාව සැරයීම වගේම ශුද්ධ වූ නගරයේ ඇති කතෝලික සිද්ධස්ථාන සතුරු උවදුරු වලින් ආරක්ෂා කරගැනීම ද සිදු කිරීමටයි ඔවුන් බලාපොරොත්තු වන්නේ. අනතුරුව 1120 ජනවාරි මාසයේ දී ජෙරුසෙලමේ ශුද්ධ වූ නගරයේ පූජනීය මණ්ඩලය වූ නෙබියුලස් කවුන්සිලය (Council of Nablus) මගින් සම්මත කිරිමෙන් පසුව රාජ්‍ය අනුග්‍රහය යටතේ කලින් අල්-අක්සා ( Al-Aqsa Mosque) ඉස්ලාම් දේවස්ථානය තිබූ කුරුස යුද්ධයෙන් පසුව ටෙම්පල් මවුන්ට් (Temple Mount) නම් වූ කිතුණු නගරයේ පළමු ටෙම්ප්ලර් මූලස්ථානය පිහිටුවනු ලබනවා.

 

සොලමන් දෙවොලේ ආකෘතියක්

ටෙම්පල් මවුන්ට් හි මෙම මූලස්ථානය පිහිටුවීමට මූලික වූ තවත් එක් හේතුවක් වෙන්නේ පුරාණ සොලමන් රජුගේ දෙවොල (Temple of Solomon) එහි පිහිටා තිබීමයි. හීබෘ බයිබලයට අනුව ලොව පළමු කිතුණු දෙවොල වන්නේ මේ සොලමන් දෙවොලයි. කුරුස යුද්ධයට කලින් ඉස්ලාම් භක්තිකයන් විසින් අල්-අක්සා නමින් අත්පත් කරගෙන සිටියේ මේ සොලමන් දෙවොලම බවයි කියැවෙන්නේ. මේ දෙවොල ආශ්‍රිතව ජීවත්වෙමින් කුරුස යුද්ධයට තමන්ගේ සියලුම වස්තුව කැප කරපු ප්‍රභූ නයිට්වරුන් පිරිසක් ජෙරුසෙලමට පැමිණීම නිසා ‘පල්ලියේ නයිට්වරුන්’ එහෙමත් නැත්නම් ‘දුප්පත් තාපස නයිට්වරුන්’ යන නමින් ජනතාව ඔවුන්ව හැඳින්වීමට පටන්ගන්නවා. නයිට්වරුන් නවදෙනෙකුගේ පෙළගැසීමෙන් ආරම්භ වූ ටෙම්ප්ලර් සංවිධානය මූල්‍යමය අතින් ඉතා පහළ මට්ටමක සිටි බව මුල්කාලීන ඔවුන්ගේ මුද්‍රා සලකුණ වූ එක් අසෙකු පිට නැගි නයිටුවන් දෙදෙනකු සහිත සලකුණ මගින් ද ඔප්පු වෙනවා.

 

ටෙම්ප්ලර් මුද්‍රාව

ටෙම්ප්ලර්වරුන්ගේ දුගීභාවය වැඩි කලක් තිබුණේ නැහැ. ප්‍රංශ ජාතික පූජකයෙකු මෙන්ම සිස්ටරිකන් (Cistercian Order) නම් පූජක නිකායේ නිර්මාතෘවරයෙකු ලෙස සැලකෙන ක්ලෙයාවෝක්ස් හි ශාන්ත බර්නාර්ඩ් ( Bernard of Clairvaux) නම් පූජකතුමා විසින් 1129 දී රෝමානු කතෝලික පූජක කවුන්සිලය ( Council of Troyes)වෙත ලිඛිතව දන්වා ටෙම්ප්ලර්වරුන්ට ආධාර උපකාර කරන මෙන් ඉල්ලා සිටියා.

 

ශාන්ත බර්නාර්ඩ්

ඊට පිළිතුරු විදියට ලොව පුරා කිතුණු බැතිමතුන්ගේ ආධාර උපකාර ටෙම්ප්ලර්වරුන් වෙත ගලා එන්න වුණා. විශේෂයෙන් වංශවත් ප්‍රභූන්ගේ නොමද ආධාර උපකාරයන්ට ටෙම්ප්ලර් සංවිධානය පාත්‍ර වුණා. වර්ෂ 1139 වනවිට එවකට පාප්වහන්සේ වූ Innocent II පාප්තුමා විසින් නිකුත් කරන ලද Omne Datum Optimum ආඥාපනත මගින් ටෙම්ප්ලර්වරුන් තවත් බලවත් කෙරුනා. එමගින් බදු නොගෙවා ඕනෑම දේශසීමාවක් හරහා ගමන් කිරීමට ටෙම්ප්ලර්වරුන්ට අධිකාරිය ලැබුණු අතර පාප්වහන්සේ හැර වෙන කිසිම බලාධිකාරයකට යටත් නොකල හැකි සුවිශේෂී බලයක් ඔවුන්ට හිමි වුණා.

 

ටෙම්ප්ලර්වරුන් කුරුස යුද්ධයේදී

කුරුස යුද්ධ වලදී ටෙම්ප්ලර්වරුන් ප්‍රධාන ප්‍රහාරක බළඇණි ලෙස කටයුතු කළා. ඔවුන්ගේ දියුණු ප්‍රහාරක ක්‍රම, යුධ අශ්වයින්, අවි ආයුද, ශක්තිමත් යුද ඇඳුම ආදිය නිසා ඔවුන් ඉක්මණින් යටත් කළ නොහැකි වුණා. 1177 දී ඊජිප්තුවේ සහ සිරියාවේ සුල්තාන්වරයා වූ සලාදීන් (Saladin) ට එරෙහිව කෙරුණු මොන්ට්ගිසාර්ඩ් සටන (Battle of Montgisard) ටෙම්ප්ලර්වරුන්ගේ බිහිසුණු බව හොඳින්ම කියාපාන්නක්. එහිදී ටෙම්ප්ලර්වරුන් 500ක බළඇණියක් සමග දහස් ගණනක් වූ අනෙක් පාබළ සෙබළ බලඇණියක් සමගින් එක්වී 26000 ක් වූ ඉස්ලාම් බළඇණිය විනාශ කර දමා තියනවා.

 

මතු සබැඳි..

 

මීලඟ කොටසින් ටෙම්ප්ලර්වරුන්ගේ ව්‍යාප්ත වී යාම..

 

සටහන – ඉසුරු හිදැල්ලආරච්චි

ස්නායු වෛද්‍ය විද්‍යාවට නව මංපෙත් පෑදු බිහිසුණු අනතුර

1823 දී උපත ලබන පීනියාස් ගේජ් (phinias gage) තරුණ වියේදී සිය ජීවනෝපාය ලෙස තෝරා ගන්නේ කම්කරු වෘත්තියයි. වෘත්තියෙන් ඔහු දුම්රිය මාර්ග ඉදි කරන්නෙකි. 1848 දී ඔහු රුත්ලන්ඩ් සිට බර්ලිංටන් දක්වා දිවෙන දුම්රිය මාර්ගයේ ඉදිකිරීම් කටයුතු සදහා එක් වී සිටි අතර 1848 සැප්තැම්බර් 13 වන දින ඔහුගේ ජීවිතයට පමණක් නොව මුලු ලොවටම එක් දෛවෝපගත දිනයකි.

එදින ඔහු ඇතුළු කණ්ඩායමට භාරව තිබුනේ ඉදි කිරීමට සැලසුම් කරන ලද දුම්රිය මාර්ගය හරහා මහා බාධකයක්ව පැවති පර්වතය පුපුරන ද්රව්ය යොදා පුපුරුවා හැරීමයි. මේ සදහා පර්වතය මුදුනට නැගි ගේග් ඔහුගේ යකඩ කෙටුම් කුරෙන් ගලේ සිදුරක් සාදා ඊට වෙඩි බේත් දැමීය. ඔවුන්ගේ අරමුණ වුයේ නොබෝ වේලාවකින් වෙඩි බෙහෙත් පත්තු කර ගල පුපුරවා හැරීමයි. මේ වන විට විදින ලද සිදුරට වෙඩි බෙහෙත් දමා යකඩ කුර පැවතියේ සිදුර තුළය.

නමුත් ඔවුන් නොසිතු මොහොතක ගල පුපුරා ගියේය. ඒ වන විට ගල මුදුනෙහි තිබු යකඩ කෙටුම් කුර පිපිරිමෙන් ඉහළට විසිවී පතිත වුයේ බිමට නොව ගේජ් ගේ හිස මතටය.

මින් ගේජ් ගේ හිස දරුණු ලෙස තුවාල ලැබීය. 3.2 cm විෂ්කම්භයෙන් යුත් 1.1m ක දිගින් යුතු වු 6km බර යකඩ කෙටුම් කුර ගේජ් ගේ හිසේ වම් වම් කම්මුලෙන් (left cheekbone) ඇතුළු වී මොළයේ වම් අර්ධ ගෝලය පසාරු කරමින් වම් ඇසට පිටුපස පෙදෙසින් එළියට විත් තිබුණි. ගේජ් ගේ හිස පසාරු කළ යකඩ කෙටුම් කුර ඔහු සිටි තැනින් 30ම් පමණ දුරකින් පසුව සොයාගනු ලැබීය.

මෙම බිහිසුණු අනතුර හමුවේ ගේජ් බිමට ඇද වැටුනද නැවතත් ඔහු විනාඩියක කාලයක් තුළ නැගි සිටි ඔහු රොහලට ඔහුව ගෙන යමින් සිටි කරත්තය තුළ සිට තමන්ට මුහුණ පෑමට වු සිද්දිය මෙනෙහි කරමින් පවා සිට ඇත. අනතුරෙන් දැඩි ලෙස තුවාල ලැබු ඔහුව ඔහුගෙ නවතැනට රැගෙන යන අතර ඔහුට වෛද්ය ප්රතිකාර කිරීම සදහා වෛද්ය ජෝන් හාර්ලෝ (Dr John Harlow) නවාතැන වෙත පැමිණේ.

වෛද්යවරයා තුවාලය පිරිසිදු කර බිදී තිබු හිස් කබලේ කොටස් එකතු කර එය නැවත සකසා තුවාලය චෙලුම් පටි වලින් ආවරණය කර ඇත. නමුත් ඔහුගේ ජීවිතය අනතුරේ දමමින් ඔහු දිලීර ආසාදනයකට ගොදුරු වී ඇති අතර මේ හේතුවන් ඔහු අර්ධ කොමා තත්වයකට පත් වී ඇත. ඔහුගේ පවුලේ අය සහ හිත මිත්රාදීන් ඔහුගේ ජීවිතය පිළිබද බලාපොරොත්තු අත් හැරගෙන තිබුනද වෛද්යවරයාගේ දැඩි උත්සහය මත එම වසරේම නොවැම්බර් මස මැද භාගය වන විට ගේජ් සුව වී නැවත සිය නිවස වෙත යාමට තරම් වාසනාවන්ත විය.

1849 අප්රේල් මස වන විට ගේජ් සම්පුර්ණ සුවය ලබන නමුත් අනතුර හේතුවෙන් ඔහුට ඔහුගේ වම් ඇසේ පෙනීම අහිමි වේ.

1868 දී Dr. Harlow ගේජ් ගේ වර්තමාන මානසික තත්වය පිළිබදව වාර්තාවක් සකස් කළ අතර ඊට අනුව අනතුරෙන් පසු ගේජ් ගේ හැසිරීම් රටා ඔහුගේ අන්තර් පුද්ගල සබදතා වල ස්වරුපය සහ ඔහුගේ පෞරුෂ ලක්ෂණ දැඩි ලෙස වෙනස් වී තිබේ. අනතුරෙන් පසු ඔහු ඉතා කළහකාරී පුද්ගලයෙක් බවට පත් වී ඇති අතර නිරන්තරයෙන් අශික්ෂිත අසභ්ය වචන වලින් සුලු දේටත් බැණ වැදී ඇත. වාර්තාවට අනුව ඔහුගේ පවුලේ අය සහ ඔහුගේ හිත මිත්ර ආදීන් පවසා ඇත්තේ අනතුරෙන් පසු ගේජ් තවදුරටත් ගේජ් නොවු බවයි.

අනතුර නිසා ඔහුගේ පූර්ව ලලාට බාහික ප්‍රදේශය ට සිදු වු හානි හේතුවෙන් මෙලෙස ඔහුගේ සමාජ කුසලතා සහ සමාජ්ශීලි බව නැති වී ගොස් ඔහුගේ පෞරුෂ ලක්ෂණ සහ හැසිරීම වෙනස් වී ඇත.

ගේජ් ගේ අනතුර හා සම්බන්ධ මෙම සිද්දිය ස්නායු විද්‍යාඥන්ට තීරණ ගැනීමෙ කාර්යට හා සමාජ ප්රජානන හැකියා (social cognition skills) සදහා ලලාට බාහිකය විසින් ඉටු කරන කාර්යභාරය පිළිබදව පළමු සාක්ෂිය සපයන ලදී. මේ අනුව පෞරුෂය සහ හැසිරීම තීරණය කරන්න බවට හමු වු පළමු සාක්ෂිය වන්නේ ගේජ් ගේ අනතුර හා සම්බන්ධ සිද්දියයි.

ලෝක ජනගහනයෙන් හතරෙන් එකක් බිලි ගත් කළු මරණයේ සාපය

ලෝක ඉතිහාසයේ මිනිස් වර්ගයා ගොදුරු කරගත් විශාලම ව්යසන වලින් එකක් ලෙස මධ්යතන යුගයේ එනම්
1346–1353 අතර කාලයේ යුරෝපය පුරා ව්යාප්ත වු කළුමරණය (Black Death) වසංගතය හැදින්විය හැකිය.

මෙම ලොවක් බිලිගත් වසංගතය පළමු වරට හටගන ඇත්තෙ මධ්යම ආසියාතික ප්රදේශයන් හීය. බොහෝ විට මෙය චීනයෙන් ආරම්භ වුවක් බවට විශ්වාස කෙරේ. නමුත් මධ්යම ආසියාතික ප්රදේශ වලට මෙහි බලපෑම එතරම් දරුණු ලෙස බලපා නොමැත.

මධයතන යුගයේ මෙම කාලය වන විට යුරෝපය හා ආසියාව අතර වෙළෙදාම් කටයුතු ඉතාමත් සාර්ථක ලෙසින් සිදු වෙමින් පැවති අතර සේද මාර්ගය ඔස්සේ දහස් සංක්යාත වෙළෙදුන් යුරෝපයේ සිට ආසියාවටත් ආසියාවේ සිට යුරෝපයටත් සංක්රමණය විය. මෙලෙස මධ්යම ආසියාවේ සිට යුරෝපයට පැමිණෙමින් තිබු වෙළෙද නැවක් හරහා එහි සිටි මීයන් මත ජීවත් වු මැක්කන් මගින් වෙළදුනගේ ශරීර හරහා ප්රථම වරට මෙම වසංගතය 1343 දී ක්රිමියාවට (crimea) පැමිණ තිබේ. ඉන් පසු මෙම වසංගතය මධ්යධරණි මුහුද හරහා යුරෝපයට පැතිර ගොස් ඇති අතර නිරන්තරයෙන් එහි රෝග වාහකයන් වී ඇත්තේ රටින් රටට සංක්රමණයේ යෙදුනු වෙළෙදුන් ය.

මෙකල නිවසක යම් කෙනෙකුට රෝගය වැළඳුනහොත් ඒ පවුලේ අය කළේ රෝගියා නිවසේ තනි කොට දමා නිවසේ කුරුසියක් ඇඳ තබා නිවෙස අතහැර පලාතකවත් නොසිට පලා ගොස් තිබේ. මෙසේ පලායන මිනිසුන් නිසා රෝගය නොතිබුණු පැතිවලටද රෝගය පැතිරිණ. යුරෝපය පුරා මිනිස්සු මිලියන විස්සක් පමණ රෝගයෙන් මියගියහ.

වසංගතය නිසා ලොව පුරා සිදු වූ මුළු මරණ සංඛ්යාව මිලියන 75 කට ආසන්න විය. යුරෝපයේ මරණ මිලියන 25 – 50 පමණ තක්සේරු විය. කළු මරණය මගින් යුරෝපානු ජනගහණය 30% – 60% ප්රමාණයක් මරා දමා තිබේ. මෙමගින් 1400 දී ලෝක ජනගහනය මිලියන 450 සිට මිලියන 350 ත් 375 ත් අතර ප්රමාණයකට අඩු කර ඇත.

මෙය කළු මරණය ලෙස හැදින්වුයේ රෝගීන්ගේ සිරුර පුරා කළු පැහැති පුල්ලි මතු වීමත් එයින් මිය ගිය අයගේ සිරුරු බෙහෙවින් කළු පැහැ ගැනීමත් නිසාය. හට ගත් කළු පුල්ලි පසුව කළු පැහැ ගෙඩි බවට පත් වී ඉන්පසු ඒ සැරව ගෙඩි පිපිරී ලේ ගලන්නට පටන් ගනී. රෝගියා අධික වේදනා විඳිමින්, සිහි විකල් වී මියයයි.

මුල් කාලීනව අඩු නොවන උණ සහ ලේ වමනය කිරීම වැනි රෝග ලක්ෂණ ඉස්මතු වීම සිදු විය. මීට ගොදුරු වූ කෙනෙක්ට දින තුනකින් සිය දිවිය අහිමි විය. වසංගතයේ මීළග අදියරය ලෙස වැසියන්ට ග්රන්ථි මහාමාරිය වැළදීම සිදු විය. මේ අවස්ථාවෙහිදීත් අඩු නොවන උණ රෝග ලක්ෂණයක් වූ අතර, බාහිර අංගයන්හි, විශේෂයෙන් කිහිල්ලේ සහ ඉකිලිවල සාරේ සහිත ගෙඩි සහ ලොකු බිබිලි හටගැනිණ. මින් පෙළුණු යමෙක් දින පහකින් මිය ගියේය.

1894 දක්වා ලොව එකම සොහොන් වලක් බවට පත් කළ මෙම වසංගතය කුමක්ද යන්න ලොවට අභිරහසක් විය. ගොදුරු වුවන් ගේ ශරීරයේ කළු පැහැති ලප දක්නට ලැබුනු අතර මිය ගිය පුද්ගලයන්ගේ මළ සිරුරු සියල්ල අත්බුත ලෙස කලු පැහැ ගැන්වී තිබිණි. රෝගයට ගොදුරු වුවන් අවම වශයෙන් එය රෝගයක් බවවත් නොදැන සිටි අතර බහුතරයකගේ මතය වුයේ මෙය දේව ශාපයක් බවයි. මේ නිසා බොහෝ කාලයක් යනතුරු මින් බේරීමට හෝ මෙය මැඩපැවැත්වීමට කිසිවෙකු උත්සහ දරා නැත.

නමුත් කළු මාරයාගේ දේව ශාපයෙන් ඇලලී සිටි වැසියන්ට සුභ පණිවිඩයක් ගෙන ඒමට ප්රංශ ජාතික ක්ෂුද්ර ජීවීන් පිළිබඳ විශේෂඥයෙකු වූ අලෙක්සෝන්ද්ර යර්සැන් සමත් විය. එනම් ඔහු විසින් මෙම උවදුරට හේතුකාරක වූ බැක්ටීරියාව සොයාගැනීමයි. ඔහුව සිහි කිරීම සඳහා එයට නම් තැබුවේ යර්සැනියා පෙස්ටිස් යනුවෙනි.

ඉන් පසු මෙම රෝගය මහාමාරිය රෝගය බවට හදුනාගත් අතර අලෙක්සෝන්ද්ර යර්සැන්ගේ මග යමින් 1898 දී පෝල්-ලුවී සීමොන් නමැති තවත් ප්රංශ ජාතිකයෙකු රෝගය පැතිරවීමට මැක්කන්ද හවුල් වන ආකාරය සොයා ගත්තේය. මින් පසු රෝග ප්රතිශක්තීකරණ එන්නතක් සොයා ගත් අතර යම්කිසි සාර්ථකත්වයක් ඉන් අත් විය.

මිනිස්කම පැරදූ බිහිසුණු යුගය – Nazi Human Experiments

“සෑම උදෑසනකම අපි සුදානම් වී සිටිය යුතු වුණා. අපගේ නිරෝගී බව පෙන්වීමට කොපුල් රතු වී සිටින පරිදි ඇඟිලි තුඩුවලින් කොනිත්තා ගන්නට අපට උපදෙස් දුන්නා. එයට හේතුව අයහපත් සෞඛ්‍යයෙන් සිටි දරුවන්ට අත්වූ ඉරණම අපි හොඳින් දැන සිටි නිසයි”

 

මේ වදන් පවසන්නේ මිනිස් ඉතිහාසයේ අඳුරුම යුගයක් පිළිබඳව මතකය ආවර්ජනය කරන  Ludit Barnea සහ Lia Huber නමැති නිවුන් සොයුරියන් දෙදෙනායි. ඔවුන් ජර්මානු නාසි හමුදාවන්ගේ Auschwitz වදකාගාරයේ සිට වාසනාවන්ත  ලෙස දිවි බේරාගත් දෙදෙනෙකි. ඔවුන් ඉහත විස්තර කරනුයේ එම වදකගාරයේදී ඔවුන්ට මුහුණ පෑමට සිදු වූ භයානක අත්දැකීම් පිළිබඳවයි. ජර්මානු නාසි හමුදාවන් යුදෙව් ජාතිකයන් ඉතා අමානුෂික ලෙස ඝාතනය කිරීමට අමතරව ඔවුන් සහභාගී  කරගනිමින් ඉතා අමනුශික පර්යේෂණ ක්‍රියාත්මක කරනු ලැබුවා. ඔවුන්ගේ අරමුණ වුයේ නාසි හමුදා තවදුරටත් විද්‍යාත්මක හා තාක්ෂණික අතින් සන්නද්ධ කිරීමයි. මෙලෙස සිදු කල ඇතැම් පර්යේෂණ විස්තර කල නොහැකි තරම් භයංකර වුවා.

 

නිවුන් දරුවන් පිලිබඳ පර්යේෂණ (Twin Experiment)

ඉහත සඳහන් කල නිවුන් සොයුරියන් දෙදෙනාට මුහුණ දීමට සිදු වූ පර්යේෂණය වුයේ නිවුන් දරුවන් සම්බන්දයෙන් නාසි හමුදාවන් විසින් සිදු කල පර්යේෂණයයි. මෙහි දී ඔවුන් නිවුන් දරුවන්ගේ ලක්ෂණ සමාන වීමට

Ludit Barnea සහ Lia Huber නමැති නිවුන්සොයුරියන්

බලපාන ජානමය ලක්ෂණ අධ්‍යයනය කිරිමත් ඒ මගින් කෘතිමව එවැනි තත්ත්ව ඇති කළහැකි දැ යි සොයා බැලීමත්  සිදු කළා. මේ සඳහා වදකාගාර වෙත රැගෙන ආ සිරකරුවන් අතරින් නිවුන් දරුවන් වෙන් කර වෙනම සිරකර තැබීම සිදු කළා. ඒ අතරින් හොඳ සෞඛ්‍ය තත්ත්වයකින් සිටි දරුවන් පර්යේෂණ සඳහා  තෝරා ගැනුණු  අතර දුර්වල දරුවන් මර දැමුණා . විවිධ රසායනික වර්ග, විෂ වර්ග නිතරම මෙම දරුවන්ට එන්නත් කිරීම සිදු කෙරුණා. ඇසෙහි වර්ණය වෙනස් වේදැයි බැලීමට ඇස්වලට ඩයි වර්ග එන්නත් කෙරුණා. මෙම වදහිංසා දරාගත නොහැකි වූ බොහෝ දරුවන් මරණය පත් වුණා. ඊට අමතරව විවිධ ශල්‍යකර්ම සඳහා ද මෙම දරුවන් යොදාගැනුණු අතර අභ්‍යන්තර අවයව කිසිදු නිර්වින්දනයකින් තොරව ඉවත් කිරීමට තරම් සාහසික වුවා. සොයාගෙන ඇති වාර්තා වලට අනුව නිවුන් දරුවන් 1500කට ආසන්න ප්‍රමාණයක් මෙම අමානුෂික පර්යේෂණවලට ලක්කර ඇති අතර ඉන් පන බේරාගෙන ඇත්තේ 200ක් පමණ පිරිසකි. ඔවුන් අතරද සදාකාලිකව රෝගාතුර වූ දරුවන් බොහෝ වේ.

 

ජෝෂෆ් මෙන්ගලේ (Josef Mengele)

මෙම පර්යේෂණ මෙහෙයවීම සිදුකර ඇත්තේ ජෝෂෆ් මෙන්ගලේ (Josef Mengele)නමැති නාසි වෛද්‍යවරයා විසිනි. මොහු “මරණයේ දුතයා” (Angel of death) ලෙස පසු කාලීනව හඳුන්වා දී ඇත්තේ ඔහු විසින් සිදුකරන ලද භයානක පර්යේෂණ නිසා බොහෝ ජීවිත ප්‍රමාණයක් විනාස වීම නිසායි. අවාසනාවන්ත ලෙස දෙවන ලෝක යුද්ධය අවසානයේ මිතුරු පාර්ශ්වික රටවල හමුදාවන්ට අසු නොවී පලායාමට හැකි වූ නිසා මොහුට නිසි දඬුවම් ලබා දිය නොහැකි වූවා.

 

මුහුදු ජලය සම්බන්ද පර්යේෂණ (Sea water Experiment)

නාසි විද්‍යාඥයින් විසින් මිනිස් සිරකරුවන් යොදාගෙන සිදුකල තවත් අමානුෂික පර්යේෂණයක් වුයේ මුහුදු ජලය පානිය ජලය ලෙස ප්‍රයෝජනයට ගැනීමට  හැකිදැ යි  සොයා බලිමට සිදුකල පර්යේෂනයන්ය. මෙහිදී තෝරාගත් සිරකරුවන් පිරිසක් නිරාහාරව තබා ඔවුන්ට මුහුදු ජලය පානයට සැලස්වූවා. මෙමගින් දැඩි විජලනයට භාජනය වූ සිරකරුවන් පිරිසිදු දිය පොදක් වෙනුවෙන් පොලොව සේදු විට එහි ඇති ජලය ලෙව කෑමට පවා උත්සහකල බව පැවසෙනවා.

 

ක්ෂය රෝගය සම්බන්ද පර්යේෂණ (Tuberculosis experiment)

පර්යේෂණවලට ලක් වූ දරුවන්

නාසි වෛද්‍යවරුන් විසින් කරන ලද තවත් ඉතා භයංකර පරේෂණයක් වුයේ ක්ෂය රෝගය මර්ධනය සඳහා ප්‍රතිකාර සෙවීමට සිරකරුවන් යොදයෙන සිදු කල පර්යේෂනයන්ය. මේ සඳහා ක්ෂය රෝගය ඇති කරන බැක්ටීරියාව නිරෝගී සිරකරුවන් වෙත බලහත්කාරයෙන් එන්නත් කරන ලදී. ඉන්පසු විවිධ ප්‍රතිකාර ඔවුන් මත අත්හදා බලන ලදී. බොහෝ සිරකරුවන්ගේ වසා ග්‍රන්ථි ශල්‍යකර්ම මගින් ඉවත් කිරීමද සිදුකල බව පැවසෙනවා. සියලු පර්යේෂණ අවසානයේ සියලුම සිරකරුවන් මරා දමන්නට තරම් ඔවුන් සාහසික වුවා.

 

අඩු පීඩන තත්ත්ව පිලිබඳ පර්යේෂණ ( High altitude experiment )

වදකාගාර ඇතුලත

මෙම පර්යේෂණ සිදුකරනු ලැබුවේ නාසි ගුවන් හමුදාවට සම්බන්ද සිග්මන්ඩ් රෂර් (Sigmund Rascher)නමැති පර්යේෂකයා විසිනි. මෙමගින් බලාපොරොත්තු වුයේ නාසි  ගුවන් නියමුවන්ට  ඉහල අහසේදී  පැරෂුට් මගින් පැනීමට සිදුවුවහොත් ඔවුන්ට මුහුණ පෑමට සිදුවන තත්ත්වයන් සහ එසේ ය හැකි ඉහලම උස පිළිබඳව අධ්‍යයනය කිරීමයි. මේ සඳහා වදකාගාර තුල අඩු පීඩන කුටි සකසනු ලැබුවා. එතුලට නිරෝගී සිරකරුවන් ඇතුළු කර එහි පීඩනය අඩු කරමින් ඔවුන්ගේ හැසිරීම් නිරීක්ෂණය කෙරුණා. මෙහිදී බොහෝ සිරකරුවන් ඉතා දුක්විද මරණයට පත් වුවා. පර්යේෂකයන්ගේ සටහන්වල සඳහන් වන පරිදි ප්‍රථමයෙන් ඔවුන් හිස වනමින් දැඩි වේදනාව පල කර ඇති අතර ඉන්පසු ටිකෙන් ටික හුස්ම ගැනීමේ  අපහසුව නිසා නිල්පහයට හැරී අවසානයේ  දැඩි වේදනාත්මක මරණයකට ගොදුරු වූ බව පැවසෙනවා. මෙම පර්යේෂණ ඉතා රහසිගතව සිදුකෙරුණු අතර ඒ පිළිබඳව යම් ලෙසකින් දැනගත් පුද්ගලයන්ද ගෑස්  කුටීර තුලට දම මරණයට පත් කෙරුණා.

 

නුරම්බ්ර්ග් අධිකරණ තීන්දුව (Nuremberg  trial )

මේ ආකාරයට මිනිසත්කමට නිගා දෙමින් සිදුකෙරුණු පර්යේෂණ හා ඒවා මෙහෙයවූ පර්යේෂකයින් ලෝක යුද්ධය අවසානයේ දැඩි අවදානයක් දිනාගනු ලැබුවා. ඔවුන්ට දඬුවම් පැමිණවීම වෙනුවෙන් විශේෂ අධිකරණයක් පිහිටවනු ලැබුවා. මේ සඳහා මිතුරු පාර්ශ්වයේ රටවල් විසින් තෝරාගැනුනේ  නාසි පක්ෂයේ ආරම්භය ඇති වූ ජර්මනියේ නුරම්බර්ග් (Nuremberg ) නගරයයි. නාසි හමුදාවන්ගේ අවසානයත් එහිදීම සිදුවිය යුතුයි ඔවුන් සිතන්නට ඇත. අධිකරණ කටයුතු සඳහා සෝවියට් දේශය, එක්සත් රාජධානිය, අමෙරිකා  එක්සත් ජනපදය හා ප්‍රංශය එක්ව කටයුතු කළා. මෙහිදී සියලුම මිනිස් අයිතිවාසිකම උල්ලංඝනය  කරමින් අමානුෂික පර්යේෂණ සිදුකල පර්යේෂකයන්ට හා දෙවන ලෝක යුද්ධයේ ඉදිරියෙන් කටයුතු කල නාසි හමුදා නායකයින් 12 දෙනෙකුට මරණ දඬුවම නියම කෙරුණා. මෙම අධිකරණ මගින් සිදුකෙරුණු තවත් කාර්යයක් වුයේ අනාගත වෛද්‍ය පර්යේෂණ සඳහා මිනිසුන් යොදාගන්නා විට පිළිපැදිය යුතු ආචාර ධර්ම පද්ධතියක් හඳුන්වා දීමයි. මෙය Nuremberg code ලෙස හඳුන්වා දෙනු ලැබුවා.

 නුරම්බ්ර්ග් අධිකරණය

 

කෙසේවෙතත් මේ සියල්ල සිදුවන විට බිලියන 2ක පමණ මිනිසුන් පිරිසක් මෙලොව හැරදා ගොස් අවසානයි. බල ලෝභය නිසා ඇති වූ මෙවැනි භයානක ඛේදවාචකයක්  නැවත මෙලොව ඇති නොවේවා යන්න අපගේ ප්‍රාර්ථනයයි.

සැකසුම : ගිෂානි නිසංසලා

සබැදි

http://www.history.com/topics/world-war-ii/nuremberg-trials

https://www.youtube.com/watch?v=MWJyjAYyF8E

https://www.ushmm.org/wlc/en/article.php?ModuleId=10005168

ඇමර්ස්ට්ස් භූත නිවසේ අභිරහස

ඔබ අවතාර දැක තිබේ ද? ඔබ හොල්මන්, අවතාර විශ්වාස කරනවා ද? ඔබේ නිවසට එවන් භයානක ආත්මයක ඇල්ම බැල්ම වැටුණොත් ඔබ කුමක් කරන්නේ ද? යම් හෙයකින්, ඔබ අදහන ආගම ධර්මයට පවා ඉන් මිදීමට පිහිටක් ලැබෙන්නේ නම්..

ලෝකයේ සිදුවන විවිධාකාර අසාමාන්‍ය සිදුවීම් අතරින් හොල්මන් අවතාර සම්බන්ධ සිදුවීම් වලට ලැබෙන්නේ ඉහළම තැනකි. එම නිසාම එවන් සිදුවීම් පිළිබඳ කතාන්තර ඉක්මනින්ම මිනිසුන් අතර පැතිර යනවා මෙන්ම ඉක්මනින්ම ජනප්‍රියත්වයට ද පත් වේ. තවද ඒ ඇසුරින් විවිධ පොත් පත්, චිත්‍රපට, ටෙලිනාට්‍ය ආදිය බිහි වේ.

මෙවන් ගුප්තවූත් අතිශය අසාමාන්‍ය වුත් සිදුවීම් මාලාවක අරම්භය සනිටුහන් වන්නේ කැනඩාවේ නොවා ස්කොටියා හි ඇම්ර්ස්ට්ස්  (AmherstNova ScotiaCanada) නගරයෙනි. ලොව අද වන විට ගුප්ත විද්‍යා පර්යේෂකයින් ගේ අවතාර වර්ග කිරීම් වලට අනුව “වැලපෙන භූතයන්” ( poltergeist ) ලෙසින් හදුන්වන භූතයන්ගේ බලපෑමට ලක්ව මෙම නගරයේ ජීවත් වූ එස්තර් කොක්ස් නම් වූ කාන්තාව සම්බන්ධව සිදු වූ සිදුවීම් දාමය සලකා බැලිය යුත්තකි.

එස්තර් කොක්ස්

18 වන සියවසේ අගභාගයේ උපත ලැබූ එස්තර් කොක්ස් ජීවත් වූයේ තම විවාහක සොයුරිය වූ ඔලිව් කොක්ස් (පසුව ඔලිව් ටීඩ්) ගේ කුඩා නිවසෙහි ය. දරුවන් දෙදෙනෙකුගේ මව වූ ඔලිව් සිය ස්වාමිපුරුෂයා ඩැනියෙල් ටීඩ් සමග  ඩැනියල්ගේ සොයුරා වූ ජෝන් ටීඩ් ද සමග මෙම නිවසේ ජීවත් වී ඇත.

වයස අවුරුදු 18 ට පා තබද්දී එස්තර් තම මිතුරෙකු අතින් ලිංගික අපහරණයට ලක්වීමත් සමග අධික මානසික පීඩනයට පත් වූ ඇගේ ජීවිතයේ අඳුරු කාලපරිච්ජේදය ආරම්භ වීම සිදු වී ඇත. නිවසේ නිදා සිටින එස්තර්ට දොරට පහර දීම්, යම් යම් බඩුමුට්ටු බිමට වැටීම්, වැනි විවිධ ශබ්ද ඇසෙන්නට ගන්නේ ඉන් අනතුරුව ය. එමෙන්ම එස්තර් නොදැනීම ඇගේ ශරීරයේ විවිධ රෝගාබාධ ආදිය ඇතිවීම, අත පය ඉදිමීම වැනි තත්ත්වයන්ට ඇයට නිරන්තරයෙන්ම මුහුණ පෑමට සිදු වේ.

 

ඇමර්ස්ට්ස් නිවස

මෙහි ඉතා අසාමාන්‍යතම සිදුවීම වනුයේ කොක්ස් නිවසේ බඩු භාණ්ඩ ආදිය ඉබේම අවකාශයේ පියඹා යාම, බිම වැටී සුණුවිසුණු වී යාම වැනි දේ සිදුවීමයි. අනතුරුව ගෙදරට ‘අරක්ගත් භූත ආත්මය’ විසින් නිවැසියන් අමතා කතා කිරීම, විවිධ පණිවිඩ ලබා දීමට තැත් කරන අවස්ථාවන් නිරන්තරයෙන් ඇතිවීමට පටන්ගෙන ඇත. වරෙක එස්තර් ඉතා තදබල ලෙස උණ ගැනීම නිසා ඇයට ප්‍රතිකාර කිරීමට දොස්තරවරයා පැමිණි විටකදී ඔහු බලා සිටියදීම එස්තර්ගේ මුහුණේ සීරීම් ඇති වී ඇත. එමෙන්ම විවිධ කෙඳිරිළි හඬවල් වලින් තර්ජනාත්මක ඇමතුම් මෙන්ම එස්තර් නිදා සිටි ඇඳ ඉස්මත්තේ වූ බිත්තියෙහි “එස්තර් කොක්ස්, උඹව මරන්නේ මමයි” යනුවෙන් දර්ශනය වී ඇති බව ද කියැවේ.

කොක්ස් සොයුරියන් – ඔලිව්, එස්තර් හා ජෙනී

වරෙක එස්තර් ගලපටලය රෝගය උත්සන්න වී සති දෙකක පමණ කාලයක් ඇඳටම සීමා වී ගත කළ කාලය තුල කිසිඳු අද්භූත සිදුවීමක් වාර්ථා වී නොමැති බැව් කියැවේ. එමෙන්ම ඈ සැක්විල් හි (Sackville, New Brunswick) තම තවත් විවාහක සහෝදරියකගේ නිවසේ ගත කළ කාලය ඉතා සාමකාමීව ගෙවී ඇත. කෙසේ නමුත් ඈ පෙරළා ඇම්ර්ස්ට්ස් පැමිණි පසු සුපුරුදු ලෙස අද්භූත දෑ ඈ වටා සිදුවීමට ආරම්භ වන්නේ පෙරටත් වඩා භයානක අයුරිනි. මෙවර සිදුවන සුවිශේෂ සිදුවීම් වන්නේ නිවසේ වරින් වර ගිනි ගැනීම් ඇතිවීමයි.

 

ඇමර්ස්ට්ස් කොක්ස් නිවසේ අද්භූත සිදුවීම් චිත්‍ර ශිල්පියෙකුගේ ඇසින්

1879 වසරේ දී වෝල්ටර් හබල් නම් පර්යේෂකයා එස්තර් සම්බන්ධ සිදුවීම පිළිබඳ සොයා බැලීමට පැමිණෙන අතර ඒ වන විට ඇය භූත ආත්මයේ දැඩි බලපෑමට ලක්ව ඇති අවධියක් වේ. ඒ වන විට අවතාරය විසින් එස්තර්ට පහර දීම, සීරීම, තල්ලු කිරීම මෙන්ම භයානක අයුරින් පසුපසින් පැමිණ පිහියකින් ඇනීමට තැත් කිරීම වැනි දේ සිදු කර තිබුණි.

වෝල්ටර් ගේ මෙහෙයවීම් මත අවතාර සමග සන්නිවේදනය කිරීමට උත්සාහ කරන එස්තර් එය සාර්ථක වීම නිසා දැන ගැනීමට ලැබෙන්නේ ‘එකකට වඩා වැඩි ආත්ම ගණනාවක’ ඈ සමග සම්බන්ධ වන බවකි. මෙහි මූලික ආත්මය ලෙස සපතේරුවෙකු වූ “බොබ් නික්ල්” හඳුනාගනු ලබ අතර ඊට අමතරව “පීටර් කොක්ස්” නම් එස්තර්ගේ මියගිය ඥාතියෙකු ද “මැගී ෆිෂර්” නැමැත්තියකගේ ද ආත්ම ඈ හා සම්බන්ධ වී ඇති බව හඳුනාගැනේ.

පර්යේෂක වෝල්ටර් හබල්

පර්යේෂක වෝල්ටර් හබල් ගේ දායකත්වයෙන් එස්තර් හට තම අත්දැකීම් හෙලිදරව් කිරීමට විවිධ රටවල් වලට යාමට සිදු වන අතර අවසානයේ එම දීර්ඝ චාරිකා අවසානයේ ඇම්ර්ස්ට්ස් ගම්මානය වෙත පැමිණි පසුවත් නැවත ඇයට දරුණු සිදුවීම් ගණනකට මුහුණ පෑමට සිදුවේ. වරෙක ගම්මානයේ මිනිසෙකුගේ ධාන්‍ය ගබඩාවක් ගිනි ගැනීම පිළිබඳව ද සැක පිට ඇයට සිරගත වීමට සිදු වන අතර මාස හතරක සිර දඬුවමක් විඳීමෙන් පසු ඇය නිදහස් වී පැමිණේ. කෙසේ නමුත් කල් යද්දී තත්ත්වය තරමක් හොඳ අතට හැරෙන අතර එස්තර් දෙවරක් විවාහ දිවියට ඇතුලත්ව පුතුන් දෙදෙනෙකු ද ලබන්නීය.

වෝල්ටර් හබල් ගේ දීර්ඝ පර්යේෂණ ප්‍රතිඵලය පොතක් ලෙසින් එළි දැක්වෙන්නේ 1879 වසරේ දී ය. Eඑය පිටපත් 55,000 ඉක්මවා විකිණී ඇත. හබල් ගේ පර්යේෂණයට වඩා ගැඹුරින් මෙම සිදුවීම් අධ්‍යනය කරමින් 1907 වසරේ දී බ්‍රිතාන්‍ය ජාතික පර්යේෂකයෙකු වූ  හියවඩ් කැරිංටන් (Hereward Carrington) විසින් තම පර්යේෂණ ප්‍රතිඵල එලි දක්වනු ලැබිණි.

පර්යේෂක හබල් ගේ The Great Amherst Mystery පොත

කෙසේ නමුත් සුප්‍රසිද්ධ  භූතාත්මයන්ගේ බලයට යට වූ නිවෙස්  (haunted house)  ලෙස පතල ඇමිටිවිලි, හෙවි මැනිසන්, කෙන්වර්තිහෝල්  වැනි  නිවෙස් අතර පැරණිතම සිදුවීමක් ලෙස ඇමර්ස්ට්ස් හි කොක්ස් නිවසේ අද්භූතජනක සිදුවීම මාලාව අදට ද සැලකේ.

 

නරඹන්න

 

 

 

සටහන – ඉසුරු හිදැල්ලආරච්චි