කවුද මේ ටෙම්ප්ලර් නයිට්වරු – අවසන් කොටස

ටෙම්ප්ලර් නයිට්වරු ගැන කතා බහ කරන ලිපි මාලාවේ අවසන් ලිපිය.

ශුද්ධ වූ දේශය රකින්න දිවි හිමියෙන් කැප වූ ටෙම්ප්ලර් නයිට්වරු කුරුස යුද්ධ කිහිපයකින්ම පසු ජෙරුසෙලමේ බලය අහිමි කරගෙන යුරෝපයට පසු බැස්ස ආකාරය පසුගිය ලිපිවලින් අපි කතා කළා මතක ඇති. ඊට පස්සේ ප්‍රංශ රජුගේ කපටි වැඩ නිසා මිත්‍යාදෘශ්ටිකයින් විදියට හංවඩු ගහලා ටෙම්ප්ලර්වරුන් සමූලඝාතනයකට ලක්වුන ඛේදජනක ඉරණම ගැනත් අවසන් ලිපියෙන් අපි කතා කළා. දැන් අපි කතා කරන්නේ ඊට පසු කාලීනව මේ ටෙම්ප්ලර් සංවිධානයේ ඉරණම මොන වගේද කියලා.

 

VI වන පිලිප් රජුගේ (Philip IV of France) ටෙම්ප්ලර් ඝාතන මාලාවෙන් පසුව ඉතිරි වූ සැඟවගත් ටෙම්ප්ලර් නයිටුවන් සමකාලීන අනෙකුත් නයිට් නිකායන් සමග එක වුණා. හොස්පිටලර් නිකාය සමග අනුබද්ධ වීම වගේම තම සංවිධානයේ නම වෙනස් කරමින් අලුත් මුහුණුවරකින් ගමන් ආරම්භ කරන්නට වුණා. පෘතුගාලයේ කතෝලික අධිකරණ බලය හිමි Order of Christ සහ Supreme Order of Christ යන සංවිධාන මෙන්ම  වතිකානුවේ අධිකරණ බලය හිමි ශුද්ධ වූ කතෝලික සංවිධානය වන Holy See යන නාමයන්ගෙන් අදටත් තම සංවිධානය ඉදිරියට පවත්වාගෙන යමින් සිටින්නේ ටෙම්ප්ලර්වරුන්මයි.

 

order of Christ හි ලාංජනය

2001 වසරේ සැප්තැම්බරයේ ඉතාලි ජාතික පුරාවිද්‍යාඥවරියක් වන බාබරා ෆ්රේල් විසින් (Barbara Frale) විසින් වතිකානු රහස්‍ය ලේඛන (Vatican Secret Archives) අතර තිබී 1308 වසරේ අගෝස්තු මස 17- 20 කාල වකවානුවේ ලියන ලද “චිනන් පත්‍රිකා” (Chinon Parchment) නම් ලියවිල්ලක් සොයාගනු ලබනවා. එහි සඳහන් වන්නේ ටෙම්ප්ලර්වරුන් මිත්‍යාදෘශ්ටිකයන් ලෙස 1308 වසරේ දී නම් කළ බවත් 1312 වසර වනවිට සංවිධානය සම්පූර්ණ ලෙසම විසිරුවා හරිනු ලබන බවත් ය. 1308 අගෝස්තු 20 දාතම යුත් තවත් චිනන් පතක කියවෙන්නේ ටෙම්ප්ලර්වරුන් තමා කළ මිසදිටු කම් පිළිගත් බවත් එසේ පිළිගත් පිරිසකට නැවත පල්ලිය සමග එක් වී කටයුතු කිරීමට ඉඩ දෙන බවට පිලිප් රජු විසින් නියෝග කළ බවත් ය.

බාබරා ෆ්රේලෙ

කෙසේ නමුත් යුරෝපය පුරා ටෙම්ප්ලර්වරුන් හා ඔවුන්ට අයත් පල්ලි හා දේවස්ථාන පිළිබඳ පුරාවෘත බහුළව පවතිනවා. විශේෂයෙන් ප්‍රංශය, එංගලන්තය, ස්පාඤ්ඤය, පෘතුගාලය, ඉතාලිය, හන්ගේරියාව හා ඊශ්‍රායලය වැනි රට වලින් එවන් දෑ බහුලවම සොයා ගන්න පුළුවන්. එම රටවල් පුරා විසිරුණු ටෙම්ප්ලර්වරුන්ගේ සංඛ්‍යාව හරියටම ගණන් බලා නැතත් එය 15,000 ත් 20,000 ත් අතර සංඛ්‍යාවක් විය හැකි බව පැවසෙනවා.

චිනන් පත්‍රිකා

ප්‍රධාන ආචාර්‍යවරයා (Grand Master) යන තනතුර යටතේ පාලනය වූ ටෙම්ප්ලර් සංවිධානය තුල තවත් සංවිධාන මට්ටම් තුනක් තිබූ බව කියවෙනවා. එනම් වංශවත් නයිට්වරු, වංශවත් නොවන සැරයන්වරු සහ දේවගැතිවරු යන කොටස්. වංශවත් නයිට්වරුන් ගැන කතා කිරීමේදී ඔවුන් පරම්පරානුකූල නයිට්වරුන් වියයුතු යි. ඊට හේතුව නයිට්වර ප්‍රදානය කෙරෙන උත්සවාදිය ටෙම්ප්ලර් සංවිධානය තුල නොතිබීමයි. ඒ වාගේම නයිටුවන් හට තරමක විශාල අශ්වාරෝහක කණ්ඩායමක් ( heavy cavalry) අයත් වෙනවා. එය අශ්වයන් තුනක් හෝ හතරක් සහිතව සුළු සේවකයන් දෙදෙනෙකු පමණ ඇතුලත් කණ්ඩායමක් වෙනවා. මේ සුළු සේවකයන් සංවිධානයෙන් පිටත සිටින තාවකාලික පදනම යටතේ කුලියට බඳවාගනු ලබන සේවකයන්.

ටෙම්ප්ලර් නයිට්වරුන් සහ සැරයන්වරුන්

මීලඟ අංශය වන වංශවත් නොවන සැරයනවරු යුරෝපයේ වංශවත් නොවන පවුල් වලින් තමාට අනන්‍ය දක්ෂතා මත බඳවාගනු ලබන පිරිස්. ඔවුන් අතර වෙළෙන්දන්, කම්මල්කරුවන්, පෙදරේරුවන්, වඩුවන් වැනි විවිධ ක්ෂේත්‍රයෙහි නිපුණ පිරිස් එකතු කරනු ලැබුණා. අශ්වයෙකු ( light cavalry) පමණක් සපයනු ලැබූ සැරයන්වරුන් කුරුස යුද්ධයේදී අනෙක් නයිට්වරුන් සමග තම දායකත්වය ටෙම්ප්ලර්වරුන්ට ලබා දුන්නා. සැරයන්වරුන්ගේ ප්‍රධානී තනතුර කළු හෝ දුඹුරු ඇඳුමක් හැඳි කමාන්ඩර්වරයෙකු විසින් දරණු ලැබුවා. අවසන් සංවිධාන මට්ටම වන පූජකවරුන්  (chaplains) ටෙම්ප්ලර් සංවිධානය තුල ආධ්‍යාත්මික, ආගමික වතාවත් ඉටු කරමින් සංවිධානයේ  අනුශාසකත්වය දක්වනු ලැබුවා.

පූජකවරයෙක්, නයිට්වරයෙක් හා සෙසු නිලධාරියෙක් ඇතුලත් ටෙම්ප්ලර් කණ්ඩායමක්

පසු කාලීනව නයිට්වරුන්ට තම රුචි ඇදුම් ඇදීමට මෙන්ම භාවිත කිරීමට ඕනෑ තරම් අශ්වයින් සිටියත් මුල් කාලීන ටෙම්ප්ලර් නයිට්වරුන් ගේ ඇවතුම් පැවතුම් ගැන කතා කිරීමේදී ඉතා පුදුම සිතෙන කරුණු කාරණා රාශියක් මතු වෙනවා. සතියකට දෙතුන් වතාවකට වඩා අඩු වේල් ගණනක් මස් අනුභවයට ගනිමින් කාන්තාවන් සමග හෝ තමාගේම පවුලේ කිසිවෙකුත් සමග කිසිඳු සම්බන්ධතාවක් ඇතිකර නොගනිමින් තාපස ජීවිතයක් ගත කරනු ලැබුවා. පසු කාලීනව ප්‍රධාන ගුරුවරයෙකු යටතේ අශ්වයින් හතරදෙනෙකු, එක් පූජකවරයෙකු, අශ්වයින් තිදෙනෙකු සහිත ලිපිකරුවෙකු හා අශ්වයින් දෙදෙනෙකු සහිත සැරයන්වරයෙකු අනුයුක්තව කටයුතු කළා.

රැවුලුකාර ටෙම්ප්ලර්වරු

නයිට්වරුන් රතු කුරුසිය සහිත ප්‍රාවරයක් ඇඳි අතර සැරයන්වරු රතු කුරුසිය සහිත කළු ගාංචුවක් බැඳ දුඹුරු පැහැ ප්‍රාවරයකින් සැරසුණා. නයිට්වරුන් සුදු ප්‍රාවරය පැලඳීම චාරිත්‍රයක් කොටගෙන තිබුණේ දෙවන කුරුස යුධ කාලයේ පටන්මයි. රතු පැහැ කුරුස සලකුණෙන් දිවි පිදීම සංකේතවත් කෙරෙනවා. ආගම වෙනුවෙන් දිවි පිදීම නිසැක වශයෙන්ම ස්වර්ගයේ තැනක් හිමි කරන්නක් බව ඔවුන් අදහන්නක්. ඒ නිසා කුරුස යුද්ධයකදී මිය යාම ඉතා උතුම් දෙයක් ලෙස අතීත කතෝලික ප්‍රජාව සලකනු ලැබුවා. රැවුල වැවීම සම්බන්ධයෙන් ටෙම්ප්ලර්වරුන් හා බැඳි චාරිත්‍ර පශ්චාත් කාලීන යුගවල දී ඇති විය. සම්පූර්ණ වශයෙන් දික්ව රැවුල වැවීමට පෙළඹ සිටි ටෙම්ප්ලර්වරුන් ගණනාවක් 1310-1311 වකවානුවේ දී ප්‍රංශ රජු අත් අඩංගුවට ගත් බව කියැවේ.

 

Temple Underground Railway Station, London

අදට ද ටෙම්ප්ලර්වරුන් සමග සම්බන්ධ ස්ථාන, නාම ගණනාවක් (List of places associated with the Knights Templar) යුරෝපය පුරා පවතිනවා. මහා බ්‍රිතාන්‍යයට අයත් ලන්ඩනයේ පමණක් Temple Bar පිවිසුම, ටෙම්පල් උමං දුම්රිය නැවතුම (Temple Underground station) වැනි ස්ථාන මෙම නයිටුවන්ගේ නමින් අදටත් දැකිය හැකියි.

IGOT සංවිධානය

ටෙම්ප්ලර්වරුන්ගේ ආභාෂය ලද සංවිධාන ගණනාවක් අදටත් ලොව පුරා පවතී. International Order of Good Templars (IOGT) සංවිධානය මුල් කාලීන තාපස ටෙම්ප්ලර්වරුන් දුක්විදිමින් පිළුණු වූ කිරි බොමින් ගතකළ දුෂ්කර කාලය ගැන සිහි කරමින් අමද්‍යප හා මත්ද්‍රව්‍ය වලින් තොර වීම පිළිබඳව අද කාලයේ සමාජයට යහපත් සේවාවක් ඉටු කරයි. ටෙම්ප්ලර්වරුන්ගේ චාරිත්‍ර බොහොමයක් පිළිපදිනු ලබන ෆ්රීමේසන්වරුන්  (Freemasonry) විසින් පවත්වාගෙන යනු ලබයි.

Freemasons සංවිධානය

කෙසේ නමුත් ටෙම්ප්ලර් නයිට්වරුන් සම්බන්ධව බොහොමයක් අභිරහස් කරුණු අදට ද නිරාකරණය වී නැහැ. විශේෂයෙන් ඔවුන් ජෙරුසෙලමේ සිට පසු බසිද්දී රැගෙන එනු ලැබුවා යැයි පුරාවෘතයේ සඳහන් සොලමන් දේවාලයේ නිධන් වස්තු යුරෝපයේ කොහේ හෝ තැනක සැඟව ඇතැයි ඇතැමුන් විශ්වාස කරනවා. ටෙම්ප්ලර්වරුන් විසින් සොලමන් දෙවොලෙන් ගෙන එනු ලැබූ ජේසුස් ක්‍රිස්තුස්වහන්සේ අවසාන භෝජන රාත්‍රියේදී වයින් පානය කළ ‘ශුද්ධ වූ බඳුන’ (Holy Grail) සහ ගල පුවරු වල කොටන ලද ‘දස පණත’ ඇතුලත් මංජුසාව (Ark of the Covenant) වැනි පුරාවස්තු ඔවුන් එලෙස ගෙන එන්නට ඇතැයි විශ්වාස කෙරෙනවා.

National Treasure චිත්‍රපටය

මේ ඇතැම් පුරාවෘත අලලා ඓතිහාසික නවකතා වන IvanhoeFoucault’s Pendulum සහ The Da Vinci Code වැනි ග්‍රන්ථ ද චිත්‍රපට වන  National Treasure සහ Indiana Jones and the Last Crusade මෙන්ම වීඩියෝ ක්‍රීඩා වන  Broken Sword සහ Assassin’s Creed වැනි ඒවා නිර්මාණය කර තිබෙනවා.

 

කොටස් හතරකින් සමන්විත ටෙම්ප්ලර් නයිට්වරුන් ගැන ලිපි මාලාව මෙතෙකින් සමාප්තයි.

පෙර පළවූ කොටස් පහතින්..

සටහන – ඉසුරු හිදැල්ලආරච්චි

කවුද මේ ටෙම්ප්ලර් නයිට්වරු?

කවුද මේ ටෙම්ප්ලර් නයිට්වරු? – 2 කොටස

කවුද මේ ටෙම්ප්ලර් නයිට්වරු ? – 3 කොටස

 

කවුද මේ ටෙම්ප්ලර් නයිට්වරු ? – 3 කොටස

ටෙම්ප්ලර් නයිට්වරුන් ගැන කතාබහ කෙරෙන ලිපි මාලාවේ තුන්වැන්න…

කතෝලික ආගම ආරක්ෂා කරන්න බිහිවුණ ටෙම්ප්ලර්වරුන් ශුද්ධ වූ දේශය, ඒ කියන්නේ ජෙරුසෙලම අතහැරලා දමලා එන්න වුණ හැටි පසුගිය ලිපි වලින් ඔයාලා කියවන්න ඇති. දැන් අපි කතා කරන්න යන්නේ යුරෝපයට පසුබැස්ස ටෙම්ප්ලර් කණ්ඩායමේ ඉරණම ගැන.

ක්‍රි.ව. 1305 දී අළුතින් පත් වුණ පාප්වහන්සේ වූ ප්‍රංශයේ අවිග්නොන් (Avignon) හි V වන ශුද්ධෝත්තම ක්ලෙමන්ට් පාප්තුමා  (Pope Clement V) විසින් එවකට ටෙම්ප්ලර් හි ප්‍රධාන ආචාර්‍යවරයා වූ ජැකස් ඩි මොලෙ (Jacques de Molay) සහ හොස්පිටලර් නයිටු නිකායේ ප්‍රධාන ආචාර්‍යවරයා වූ ෆල්ක් ඩි විලට් ( Fulk de Villaret) වෙත ලිපියක් මගින් දන්වා තිබුණේ නිකාය දෙකම එකතු වෙලා කටයුතු කිරීම පිළිබඳව සිතා බලන ලෙසට.

 

ටෙම්ප්ලර් ප්‍රධානී ජැකස් ඩි මොලෙ

නමුත් දෙපිරිසෙන්ම ලැබුණේ අයහපත් ප්‍රතිචාරයක්. තමන්ගේ අදහසේ දිගින් දිගටම සිටි පාප්තුමා වසර 1306 දී නයිටු නිකාය දෙකේම ප්‍රධාන ගුරුවරුන්ට ලිපි මගින් දන්වන්නේ වහාම තමන් සමග  සාකච්ජාවකට එන ලෙස. 1307 වසර ආරම්භ වීමත් සමග ඩි මොලෙ පාප්තුමා සමග සාක්ච්ඡා කිරීමට යනවා. නමුත් ඩි විලට් නයිට්වරයාගේ පැමිණීම මාස දෙකකින් පමණ ප්‍රමාද වන බව ආරංචි වන නිසා පාප්තුමා ටෙම්ප්ලර් ප්‍රධානියා සමග සංවිධානයෙන් නෙරපූ ඇතැම් නයිට්වරුන්ගේ ක්‍රියාවන් පිළිබඳව ප්‍රංශ රජුට ලැබී තිබෙන පැමිණිලි පිළිබඳව දැනුවත් කරනවා.

 

ශුද්ධෝත්තම V වන ක්ලෙමන්ට් පාප්තුමා

නෙරපූ නයිටුවන් තවමත් ටෙම්ප්ලර් නාමය භාවිත කරමින් විවිධ දුරාචාර වල නිරත වන බව පාප්තුමා පැහැදිලි කරනවා. මේ පිළිබඳ එවකට ප්‍රංශයේ රජු වූ IV වන පිලිප් රජු (Philip IV of France) අවධානයෙන් පසුවන බවත් පැමිණිලි විභාග කිරීමට යන බවත් පාප්තුමා තවදුරටත් පැහැදිළි කරනවා. නමුත් සම්පූර්ණ නයිට් සංවිධානය කෙරෙහිම රජුගේ දැඩි අප්‍රසාදයක් ඇති බව පාප්තුමා කියා සිටිනවා.

ප්‍රංශයේ IV වන පිලිප් රජු

මේ තත්ත්වය විමසා බලන ඩි මොලෙ ට මෙය සිතාමතා තම සංවිධානය උගුලකට හසු කිරීමට යාමක් බවට වටහාගන්න වැඩි වෙලාවක් ගතවෙන්නේ නැහැ. වර්ෂ 1285 දී රාජ්‍යත්වයට පත්වන IV වන පිලිප් රජු ඔහුගේ අවසාන සටන වන නෝමන්වරු හා ඉංග්‍රීසීන් අතර ඇති වූ සටන සඳහා අධික වශයෙන් මුදල් ණයට ගනු ලබන්නේ ධනවත් ටෙම්ප්ලර් සංවිධානයෙන්. එ නිසා තම ණය බරින් බේරීමට ටෙම්ප්ලර්වරුන් විනාශ කිරීමට කරනු ලබන සැලසුමක් ලෙසට මෙය ඩි මොලෙ තේරුම් ගන්නවා. ඒ වගේම ප්‍රංශයෙන්ම පත් වූ නව පාප්වහන්සේට ද ටෙම්ප්ලර්වරුන් මර්දනය කිරීම කෙරෙහි රජුගේ දැඩි පීඩනයක් එල්ලවෙන බව ඩි මොලෙ ට පෙනී යනවා.

 

යක්ෂ වන්දනාවේ යෙදෙන ටෙම්ප්ලර්වරු

අවසානයේ 1307 වසරේ ඔක්තෝබර් 13 වැනි සිකුරාදා දිනක IV වන පිලිප් රජු විසින් විශේෂ ආඥාවක් නිකුත් කරනවා. ඒ, ඩි මොලෙ ඇතුළු ටෙම්ප්ලර් නයිට්වරුන් වහාම අත්අඩංගුවට ගන්නා ලෙස දන්වමින්. “Dieu n’est pas content, nous avons des ennemis de la foi dans le Royaume” (දෙවියන්වහන්සේ සතුටු නැත. රාජ්‍යයේ භක්තිමත් බවට එරෙහිව සතුරන් අපට සිටී) යනුවෙන් ආරම්භ වන එම ආඥාව ඔස්සේ ක්‍රියාත්මක වී ඩි මොලෙ ඇතුළු ටෙම්ප්ලර්වරුන් බොහෝදෙනෙක් අත්අඩංගුවට පත් වෙනවා. මෙලෙස ටෙම්ප්ලර්වරුන් අත්අඩංගුවට ගැනීමට චෝදනා ලෙස කරුණු ගණනක් ගොනු කරනවා.

 

v වන ක්ලෙමන්ට් පාප්තුමා ටෙම්ප්ලර්වරුන්ට විරුද්ධව චෝදනා විභාග කිරීම

ටෙම්ප්ලර් උත්සවාදියෙහි හා නවකයින් බඳවාගැනීමේ දී සාමාජිකයන් ලවා ශුද්ධ වූ කුරුසිය මත කෙළ ගැසීමට සැලැස්වීම, ව්‍යාභිචාරී ක්‍රියාවන්ට අනුබල දීම, ක්‍රිස්තුස් වහන්සේ ප්‍රතික්ෂේප කිරීම, අශ්ශීල සිප ගැනීම සහ සමලිංගික ක්‍රියාවන් සිදු කිරීම මෙන්ම යක්ෂයා වන්දනාමාන කිරීම වැනි කරුණු ගණනාවක් ටෙම්ප්ලර්වරුන්ට එරෙහිව පෙළගස්වනු ලබනවා. මේවාට අමතරව මූල්‍ය වංචා, රැවටීම් හා සංවිධානයේ රහසිගත භාවය වැනි කරුණු සම්බන්ධවත් ඔවුන් චෝදනා ලබනවා.

බැප්හොමෙට්

පිලිප් රජු විසින් සිදු කරනු ලැබූ අතිශය කෲර වධ බන්ධන යටතේ නයිට්වරුන් ඇතැමෙක් මේ චෝදනා බලෙන් පිළිගනු ලබනවා. විශේෂයෙන් ටෙම්ප්ලර් ආරාම තුල සාතන්ගේ නියෝජනයක් වන ‘බැප්හොමෙට්’ (Baphomet) නම් දේව වන්දනාව සිදු කරන බවට වූ චෝදනාවත් සමග බොහෝ කිතුණුවන් තුල ටෙම්ප්ලර්වරුන් කෙරෙහි තිබූ පැහැදීම නැතිව යනවා. කෙසේ නමුත් වසර 1307 නොවැම්බර් 22 ක්ලෙමන්ට් පාප් තුමා විසින් නිකුත් කරන ලබන ආගමික ආඥාවක් මගින් සියළුම ටෙම්ප්ලර්වරු අත් අඩංගුවට ගන්නා ලෙසත් ඔවුන් සතු දේපළ රාජසන්තක කරන ලෙසත් නියෝග කරනවා. මෙලෙස අත් අඩංගුවට ගන්නා ටෙම්ප්ලර්වරුන් මිථ්‍යාදෘෂ්ටිකයන් ලෙස සලකමින් ඊට දඬුවම වන පණ පිටින් පුළුස්සා දැමීමට ලක් කරනවා. ටෙම්ප්ලර්වරුන්ට අයත් වස්තුව බොහෝමයක් හොස්පිටලර් වැනි අනෙකුත් නයිටු නිකායන්ට අයිති වෙනවා.

ටෙම්ප්ලර්වරුන් පණ පිටින් පිළිස්සීම

ටෙම්ප්ලර් ප්‍රධානියා වූ ඩි මොලෙ, කෲර වධ බන්ධන යටතේ බලහත්කාරයෙන් චෝදනා පිළිගැනීම නිසා 1314 මාර්තු මස 18 දින පණපිටින් පුළුස්සා මරා දමනවා. එහිදී ඔහුගේ අවසාන ඉල්ලීම වන්නේ නොතර්දාම් පල්ලිය පේන මානයේ යාඥා කරන ඉරියව්වෙන් තම දෑත් බැඳ දමා මරා දමන්න කියාය. ජනප්‍රවාදයේ කියවෙන විදියට ඩි මොලෙ තමාව වටකරගෙන තියන ගිණි දළු අතරින් කෑගහලා පාප්තුමාටත් රජුටත් සාප කරලා තියනවා. ඉතා ඉක්මණින්ම දෙවියන්වහන්සේ ඉදිරියේ ඔවුන් දෙදෙනා තමාට හමුවෙනු ඇතැයි ඔහු කෑ ගසා කියමිනුයි මරණයට පත් වී ඇත්තේ.

ජැකස් ඩි මොලෙ පිළිස්සීම

දෙවියන්වහන්සේ නිවැරදිකරුවා කවුද යන්න දන්නා බවත් වැරදිකරුවන්ට ඉතා ඉක්මණින් දඬුවම් ලැබෙන බවත් යන්නයි ඔහුගේ අවසාන වචන කීපය. අහඹුවක්ද ශාපය පළදීමක් ද යන්න සිතා ගන්නට නොහැකි වන ආකාරයෙන් පාප්තුමාගේ සහ රජුගේ ඉරණම ඩි මොලෙ කියූ විදියටම විසඳෙනවා. ඒ ක්ලෙමන්ට් පාප්තුමා මෙම සිදුවීමෙන් මසක් ගතවෙන්නත් කලින් මිය යාම නිසා සහ IV වන පිලිප් රජු එම වසර අවසාන වීමටත් ප්‍රථම දඩයමේ යාමේදී සිදුවූ අනතුරකින් මරණයට පත් වීමෙන්.

 

Jason Voorhees නම් බිහිසුණු චරිතය රැගත් Friday the 13th චිත්‍රපට මාලාවේ චිත්‍රපටයක්

එපමණක් නෙවෙයි. අද ඔබ අපි නරඹන බොහෝමයක් භයානක හොලිවුඩ් චිත්‍රපට වලට පාදක වූ 13 වැනි සිකුරාදා –  Friday the 13th යන සංකල්පය පැවතගෙන එන්නේත් මේ ටෙම්ප්ලර් නයිට්වරුන් අත් අඩංගුවට ගන්න පිලිප් රජු විශේෂ ආඥාව නිකුත් කරපු ඔක්තෝබර් 13 වැනිදා නිමිතිකොට ගෙන බව ඔබ දන්නවා ද? පුදුමයි නේද?

 

මතු සබැඳි..

සමූල ඝාතනයෙන් බේරුනු ටෙම්ප්ලර් නයිට්වරු මීලඟ ලිපියෙන්..

 

සටහන – ඉසුරු හිදැල්ලආරච්චි

 

 

 

කවුද මේ ටෙම්ප්ලර් නයිට්වරු? – 2 කොටස

පසුගිය කොටසින් ටෙම්ප්ලර් නයිට්වරුන්ගේ ආරම්භය ගැන අපි කතා කළා මතක ඇති. මේ ලිපිය ඔවුන්ගේ ව්‍යාප්ත වීම ගැන…

ආරම්භයේදී ඉතා දුගී ලෙස සිටි ටෙම්ප්ලර්වරුන් පසුව කතෝලික ප්‍රජාවගෙන් ගලා ආ ආධාර උපකාර නිසා ධනවත් වුණ බව පහුගිය ලිපියෙන් ඔයාලා කියෙව්වානේ. ටෙම්ප්ලර්වරුන් සංවිධානයක් විදියට ශක්තිමත් වෙද්දී ඔවුන්ට තම සංවිධානය නිසි ලෙස කළමනාකරණය කරගන්න ඕන වුණා. මූලිකවම පුහුණු යුධ ඒකකයක් විදියට සංවිධානය ස්ථාපිත වුණත් පසුව මූල්‍ය කළමනාකරණය, නයිට්වරු පාලනය කිරීම වගේ කරුණු වලට වෙනම මණ්ඩලයක් පත් කෙරුණා. සංවිධානයේ ප්‍රධානියා විදියට එක් නයිට්වරයෙකු පත් කෙරුණා. ඔහු ප්‍රධාන ගුරුවරයා (Grand Masters of the Knights Templar) ලෙස හැඳින්වුවා.

 

ටෙම්ප්ලර් Grand Master වරුන්ගේ සංකේත

 

ඩෑන් බ්‍රවුන්ගේ ඩ වින්සි කෝඩ් (The Da Vinci Code) පොතේ ‘ප්‍රයරි ඔෆ් සයන්’ සංවිධානයේත් මේ ප්‍රධාන ගුරුවරයා කියන තනතුර ගැන සඳහන් වෙනවා ඔබට මතක ඇති. ඒ වගේම තවත් රහස් සංවිධානයක් වන ‘ෆ්රීමේසන්වරුන්’ අතරත් මේ Grand Master කියන තනතුර පවතිනවා. ඒ සංවිධාන සියල්ලම වගේ මේ ටෙම්ප්ලර් නයිට්වරුන්ට සම්බන්ධතා දක්වන බවයි කියවෙන්නේ. ෆ්රීමේසන්වරු හා ප්‍රයරි ගැන අපි ඉදිරියට කතා කරමු.

 

ටෙම්ප්ලර් බැංකුවක්

මේ ටෙම්ප්ලර්වරුන් ලොව පළමු මුදල් තැන්පතු ක්‍රමය, එහෙමත් නැත්නම් බැංකු ක්‍රමය ආරම්භ කළා කිව්වොත් ඔබ පුදුම වෙනවා ද? නමුත් ඒක ඇත්ත. කුරුස යුද්ධයට යාමේදී වංශවත් ධනපති සෙන්පතියන්, ආදිපාදවරුන් ආදිය තමන්ගේ රන්, රිදී, මුතු, මැණික්, මුදල් ආදිය ටෙම්ප්ලර්වරුන් භාරයේ සුරක්ෂිතව තබා ගියා යුද්ධය අවසන්වී පැමිණ නැවත ගන්න තෙක්. ඒ වෙනුවෙන් ඔවුන් තැන්පතු ලියවිල්ලක් ලබා දුන් බවත් සඳහන් වෙනවා. පසු කාලයක එම ලියවිල්ල ඉදිරිපත් කරන තැනැත්තාට එහි සඳහන් වස්තුව ආපසු ලැබෙනවා. මෙසේ ඒවා ආරක්ෂා කරනවාට ඔවුන් සුළු පොළියකුත් අය කළ බව කියවෙනවා. මෙය අද භාවිත වන බැංකු ක්‍රමයට හා චෙක් ක්‍රමයට ඉතා සමානයි. එමගින් ටෙම්ප්ලර්වරුන් තවත් ධන්වතුන් බවට පත් වුණා වගේම ඔවුන්ගේ මූලස්ථානය වූ සොලමන් දෙවොලේ වස්තුව ඉතා විශාල වශයෙන් ගබඩා කර තැබීමටත් සිදුවුනා.

ටෙම්ප්ලර්වරුන්ගේ නෞකා

මීලඟට ඔවුන් තමන් සතු වූ ධනය හා ලැබෙන පරිත්‍යාග විවිධ ව්‍යාපාර වල ආයෝජනය කරන්න පටන්ගත්තා. යුරෝපයේ, මැදපෙරදිග මෙන්ම ආසියාව දක්වා ඔවුන්ගේ වෙළඳ කටයුතු ව්‍යාප්ත වුණා. ඔවුන් තමන්ගේම නාවුක ජාලයක් ඔස්සේ භාණ්ඩ ආනායන අපනයන හැකියාව වර්ධනය කරගත්තා. එක් වකවානුවක සයිප්‍රස් දූපත (Cyprus) ඔවුන් සතුව තිබුණා. ඉතිහාසඥයන් හඳුන්වන විදියට ටෙම්ප්ලර්වරු තමයි පළමුවරට අන්තර්ජාතික වෙළඳාම ආරම්භ කරලා තියෙන්නෙත්.

 

ශ්‍රේෂ්ඨ සලාදීන්

12වන සියවස මැද භාගය වෙනකොට නැවතත් කුරුස යුද්ධයක් හිස ඔසවමින් තිබුණා. නමුත් පෙරට වඩා මෙවර ඉස්ලාම් කොටස් සලාදීන් (Saladin) වැනි ශූර රජවරුන් යටතේ සංවිධානය වෙලා තිබුණේ. ඒවගේම ක්‍රිස්තියානිවරුන් අතර විවිධ මතභේද ඇතිවී තිබුණු කාලයක් ඒක. ටෙම්ප්ලර්වරුන් පවා තවත් ඔවුන් වැනිම නයිටු සංවිධාන වන හොස්පිටලර්  (Knights Hospitaller) හා ටියුටොනික් (Teutonic Knights) සමග බලය තහවුරු කරගැනීම සඳහා ගැටෙන්නට වුණා.

 

ටියුටොනික් නයිට්වරුන්

ටෙම්ප්ලර්වරුන් ඉතා අසාර්ථක ලෙස මුහුණ දුන් ‘හැටින්’ සටනේදී  (Battle of Hattin) ඔවුන් සලාදීන් ප්‍රමුඛ ඉස්ලාම් හමුදාවන් අතින් අන්ත පරාජයක් ලැබීම නිසා 1187 දී ජෙරුසෙලමේ බලය නැවතත් මහමදිකයන් අතට පත් වුණා.

 

සලාදීන් හමුදා වල ජයග්‍රහණය

කෙසේ වෙතත් හයවැනි කුරුස යුද්ධයේදී ශුද්ධවූ රෝමානු අධිරාජ්‍යයා වූ II වන ෆෙඩ්‍රික් (Frederick II) විසින් 1229 දී ටෙම්ප්ලර්වරුන්ගේ සහයක් නොමැතිවම ජෙරුසෙලම නැවතත් කතෝලික ග්‍රහණයට නතු කරගත්තා. නමුත් ඒ සඳහා ඔහුට දශක දෙකකටත් මදක් වැඩි කාලයක් ගත වුණා. නමුත් නැවතත් 1244 දී සුන්නි මුස්ලිම් රාජවංශයට අයත් වූ ‘අයුබිඬ්වරුන්’ සහ පර්සියානු සම්භවය සහිත ‘ක්වරෙස්(z)මිඬ්’ කුලී හේවයීන්ගෙන් සැදුම්ලත් මහා හමුදාවක් මගින් ජෙරුසෙලම තම යටතට ගනු ලැබීමෙන් අනතුරුව නැවතත් එය යුරෝපීන්ට ලැබෙන්නේ 1917 දී  පළමු ලෝක යුද්ධයේ දී  (World War I) තුර්කියේ ඔටෝමාන් අධිරාජ්‍යයා ( Ottoman Empire) පරාජය කිරීමත් සමගය.

රෝමානු අධිරාජ්‍යයා වූ II වන ෆෙඩ්‍රික්

තම භූමිය අහිමි වී යාමත් සමග ටෙම්ප්ලර්වරුන් ජෙරුසෙලමෙන් උතුරුදිග ඊශ්‍රායලයේ වරාය ආශ්‍රිත නගරයක් වන ‘ඒකර්’ (Acre) වෙත පසුබසිනවා. එම භූමියත් සතුරන් අතට පත් වූ පසු ඔවුන් අද සිරියාවේ ( Syria) ‘ටාර්ටස්’ (Tartus) නමින් හැඳින්වෙන ‘ටෝටොසා’ (Tortosa) ප්‍රදේශයේ තම මූලස්ථානය පිහිටුවා ගනු ලබනවා. එතැනිනුත් ඔවුන් සයිප්‍රසය බලා පසුබසින අතර එහි ‘ලිමසොල්’(Limassol) ප්‍රදේශයේ කඳවුරු බැඳ ගනිමින් හුදකලා කුඩා දූපතක් වූ   Arwad Island හි තම යුද බලකොටු ගොඩනැගීමට උත්සාහ ගන්නවා. අනතුරුව 1302 1303 කාලය තුල එවකට ඊජිප්තුවේ සුල්තාන්වරයාගේ ආක්‍රමණ හේතුවෙන් ටෙම්ප්ලර්වරුන්ට ශුද්ධ වූ දේශයෙන් තම අවසන් පියවරත් ඉවතට තබන්නට සිදු වෙනවා.

 

ටෙම්ප්ලර්වරුන් ශුද්ධවූ දේශය හැර යාම

යුද්ධය අවසන් වීමත් සමග ටෙම්ප්ලර්වරුන්ගේ පිරිහීමද ආරම්භ වුණා කිව්වොත් නිවැරදී. නමුත් ඔවුන් තවමත් ලොව පුරා පැතිරුණු කතෝලික ප්‍රජාවගේ මූලික කොටසක් වෙලා හමාරයි. ඊට හේතුව යුරෝපය පුරා ටෙම්ප්ලර් දේවස්ථාන විසිරී පැතිරී තිබීම වගේම යුරෝපය පුරා ආර්ථිකටයේ සැලකිය යුතු කොටසක් ඔවුන්ට අයත් වී තිබීම. ටෙම්ප්ලර් බැංකු, ගොවිපොළ, වයින් සෑදීම සඳහා වූ මිදි වතු වැනි ව්‍යාපාර ඔවුන්ට අයත්ව තිබුණා.

 

ටෙම්ප්ලර්වරුන්ට අයත් සැඩ්ල්ස්කොම්බ් ගොවිපොළ

එමෙන්ම ඔවුන් යුරෝපය පුරා ස්ථාවර හමුදාවක් (standing army) ලෙසින් කටයුතු කළා. ඔවුන්ට දේශසීමා හරහා බාධාවකින් තොරව ගමන් කිරීමේ ඇති වරය නිසා ඔවුන් ඒ විදියට යුරෝපය පුරා ගමන් කරමින් සුළු සුළු ගැටුම් මැඩපැවැත්වූවා. අර රොබින් හුඩ් ටෙලියෙත් ටෙම්ප්ලර් නයිට්වරු එංගලන්තයට එන්නේ ඒ විදියට තමයි. යුද්ධ කිරීම වෙනුවට ඔවුන් අනෙකුත් නයිට් නිකායන් පසුකාළීනව පල්ලිය සමග එකතු වෙලා නිකායන් හදාගත්තා වගේ ටෙම්ප්ලර් නිකාය ආරම්භ කරලා දේවස්ථාන පවා ඇති කළා.

 

මතු සබැඳි..

ටෙම්ප්ලර්වරුන්ට අත් වූ යුරෝපා ඉතිහාසයේ කෲරතම ඉරණම මීලඟට..

 

සටහන – ඉසුරු හිදැල්ලආරච්චි

 

කවුද මේ ටෙම්ප්ලර් නයිට්වරු?

ඔබ මීට වසර 20ට පමණ පෙර නැරඹූ ටයිටස් තොටවත්තයන් හඬ කවා ජාතික රූපවාහිනියේ විකාශය වූ රොබින් හුඩ් කතා මාලාව ඔබට මතකද? එහෙමත් නැතිනම් සුප්‍රකට ලේඛක ඩෑන් බ්‍රවුන්ගේ ‘Da Vinci Code’ පොතේ කියවෙන ‘Priory of Sion’ සංවිධානයේ මුල් සංවිධානය ගැන ඔබට මතකද? නැතිනම් assassin’s creed වීඩියෝ ගේම් එකේ, චිත්‍රපටයේ ඉන්න වීරයා ඔබට මතකද? රොබින්, මැරියන්, ලිට්ල් ජෝන්, ටක්, ෂෙරීෆ්, ගිස්බන් වැනි චරිත සමග එංගලන්ත සොල්දාදුවන්, මංකොල්ලකරුවන් වගේ ලාංකික අපට නුහුරු අලුත්ම ඉතිහාස පැතිකඩක් තමයි රොබින් හුඩ් කතාමාලාවේ තිබුණේ. එහි එන, රතු කුරුසයක් ලකුණු කරගත් ලෝහ සන්නාහ සහිත සුදු පාට ඇදුමක් ඇඳපු ටිකක් භයංකාර පෙනුමක් තිබුණු අශ්වාරෝහක නයිට්වරු පිරිසක් ෂෙරීෆ්, ගිස්බන් එක්ක එකතුවෙලා රොබින්ලගේ කණ්ඩායම අල්ලගන්න උත්සාහ කරනවා මතකද? ඊට පසුවත් කතාංග කීපයකින්ම අපට හමුවෙන මේ අමුතු නයිට්වරු තමයි ටෙම්ප්ලර් නයිට්වරු එහෙම නැතිනම් පල්ලියේ නයිට්වරු කියලා ලෝක ඉතිහාසයේ සඳහන් වෙන්නේ. මේ ලිපි මාලාවේ අපි මුලින්ම කතා කරන්නේ මේ පල්ලියේ තාපස නයිට්වරු ගැන.

ටෙම්ප්ලර් නයිට්වරයෙක්

පළමු කුරුස යුද්ධයෙන් (First Crusade) පස්සේ යුරෝපීයන් විසින් 1099 දී පූජනීය ජෙරුසෙලම (Jerusalem) මුස්ලිම්වරුන්ගෙන් මුදාගැනීමෙන් පසුව කතෝලික බැතිමතුන්ට ජෙරුසෙලම වන්දනා කරන්න අවස්ථාව ලැබුණා. මේ ජෙරුසෙලම සම්පූර්ණයෙන්ම කතෝලික පාලන බලය යටතේ තිබුණත් යුරෝපයෙන් එයට යන මාර්ගය මුළුමනින්ම යුරෝපීන්ගේ ආරක්ෂාව යටතේ තිබුණේ නැහැ. මේ නිසා ජෙරුසෙලමට එන මාර්ගයේ සිටි මංපහරන්නන්, සොරුන් වගේ කණ්ඩායම් වලින් ශුද්ධවූ දේශය වන්දනා කරන්න එන බැතිමතුන්ට එල්ලවුණේ දැඩි හිරිහැරයක්. කතෝලික බැතිමතුන්ගේ වස්තුව කොල්ලකෑමෙන් නොනැවතී ඔවුන් විවිධ වද බන්ධන වලට ලක් කරලා මරලා දාන්න තරම් මේ මංපහරන්නන් කෲර වුණා.

ටෙම්ප්ලර්වරුන්ගේ කුරුසිය ලකුණ

තත්ත්වය උග්‍ර වෙද්දී 1119 දී මේකට විසඳුමක් අරගෙන ප්‍රංශයේ නයිට්වරයෙකු වන හියුස් ඩි පෙයින්ස් (Hugues de Payens) එවකට ප්‍රංශයේ රජු වූ කුරුස යුද්ධයේ ප්‍රධානියා වූ II වන බෝල්ඩ්වින් රජු ( Baldwin II of Jerusalem) සහ ජෙරුසෙලමේ පූජක ප්‍රධානියා වන ප්‍රධාන පූජකවර වෝමන්ඩ් ( Warmund, Patriarch of Jerusalem) හමුවීමට එනවා.

හියුස් ඩි පෙයින්ස්

එමගින් ජෙරුසෙලමට එන බැතිමතුන්ට ආරක්ෂාව සැරයීම වගේම ශුද්ධ වූ නගරයේ ඇති කතෝලික සිද්ධස්ථාන සතුරු උවදුරු වලින් ආරක්ෂා කරගැනීම ද සිදු කිරීමටයි ඔවුන් බලාපොරොත්තු වන්නේ. අනතුරුව 1120 ජනවාරි මාසයේ දී ජෙරුසෙලමේ ශුද්ධ වූ නගරයේ පූජනීය මණ්ඩලය වූ නෙබියුලස් කවුන්සිලය (Council of Nablus) මගින් සම්මත කිරිමෙන් පසුව රාජ්‍ය අනුග්‍රහය යටතේ කලින් අල්-අක්සා ( Al-Aqsa Mosque) ඉස්ලාම් දේවස්ථානය තිබූ කුරුස යුද්ධයෙන් පසුව ටෙම්පල් මවුන්ට් (Temple Mount) නම් වූ කිතුණු නගරයේ පළමු ටෙම්ප්ලර් මූලස්ථානය පිහිටුවනු ලබනවා.

 

සොලමන් දෙවොලේ ආකෘතියක්

ටෙම්පල් මවුන්ට් හි මෙම මූලස්ථානය පිහිටුවීමට මූලික වූ තවත් එක් හේතුවක් වෙන්නේ පුරාණ සොලමන් රජුගේ දෙවොල (Temple of Solomon) එහි පිහිටා තිබීමයි. හීබෘ බයිබලයට අනුව ලොව පළමු කිතුණු දෙවොල වන්නේ මේ සොලමන් දෙවොලයි. කුරුස යුද්ධයට කලින් ඉස්ලාම් භක්තිකයන් විසින් අල්-අක්සා නමින් අත්පත් කරගෙන සිටියේ මේ සොලමන් දෙවොලම බවයි කියැවෙන්නේ. මේ දෙවොල ආශ්‍රිතව ජීවත්වෙමින් කුරුස යුද්ධයට තමන්ගේ සියලුම වස්තුව කැප කරපු ප්‍රභූ නයිට්වරුන් පිරිසක් ජෙරුසෙලමට පැමිණීම නිසා ‘පල්ලියේ නයිට්වරුන්’ එහෙමත් නැත්නම් ‘දුප්පත් තාපස නයිට්වරුන්’ යන නමින් ජනතාව ඔවුන්ව හැඳින්වීමට පටන්ගන්නවා. නයිට්වරුන් නවදෙනෙකුගේ පෙළගැසීමෙන් ආරම්භ වූ ටෙම්ප්ලර් සංවිධානය මූල්‍යමය අතින් ඉතා පහළ මට්ටමක සිටි බව මුල්කාලීන ඔවුන්ගේ මුද්‍රා සලකුණ වූ එක් අසෙකු පිට නැගි නයිටුවන් දෙදෙනකු සහිත සලකුණ මගින් ද ඔප්පු වෙනවා.

 

ටෙම්ප්ලර් මුද්‍රාව

ටෙම්ප්ලර්වරුන්ගේ දුගීභාවය වැඩි කලක් තිබුණේ නැහැ. ප්‍රංශ ජාතික පූජකයෙකු මෙන්ම සිස්ටරිකන් (Cistercian Order) නම් පූජක නිකායේ නිර්මාතෘවරයෙකු ලෙස සැලකෙන ක්ලෙයාවෝක්ස් හි ශාන්ත බර්නාර්ඩ් ( Bernard of Clairvaux) නම් පූජකතුමා විසින් 1129 දී රෝමානු කතෝලික පූජක කවුන්සිලය ( Council of Troyes)වෙත ලිඛිතව දන්වා ටෙම්ප්ලර්වරුන්ට ආධාර උපකාර කරන මෙන් ඉල්ලා සිටියා.

 

ශාන්ත බර්නාර්ඩ්

ඊට පිළිතුරු විදියට ලොව පුරා කිතුණු බැතිමතුන්ගේ ආධාර උපකාර ටෙම්ප්ලර්වරුන් වෙත ගලා එන්න වුණා. විශේෂයෙන් වංශවත් ප්‍රභූන්ගේ නොමද ආධාර උපකාරයන්ට ටෙම්ප්ලර් සංවිධානය පාත්‍ර වුණා. වර්ෂ 1139 වනවිට එවකට පාප්වහන්සේ වූ Innocent II පාප්තුමා විසින් නිකුත් කරන ලද Omne Datum Optimum ආඥාපනත මගින් ටෙම්ප්ලර්වරුන් තවත් බලවත් කෙරුනා. එමගින් බදු නොගෙවා ඕනෑම දේශසීමාවක් හරහා ගමන් කිරීමට ටෙම්ප්ලර්වරුන්ට අධිකාරිය ලැබුණු අතර පාප්වහන්සේ හැර වෙන කිසිම බලාධිකාරයකට යටත් නොකල හැකි සුවිශේෂී බලයක් ඔවුන්ට හිමි වුණා.

 

ටෙම්ප්ලර්වරුන් කුරුස යුද්ධයේදී

කුරුස යුද්ධ වලදී ටෙම්ප්ලර්වරුන් ප්‍රධාන ප්‍රහාරක බළඇණි ලෙස කටයුතු කළා. ඔවුන්ගේ දියුණු ප්‍රහාරක ක්‍රම, යුධ අශ්වයින්, අවි ආයුද, ශක්තිමත් යුද ඇඳුම ආදිය නිසා ඔවුන් ඉක්මණින් යටත් කළ නොහැකි වුණා. 1177 දී ඊජිප්තුවේ සහ සිරියාවේ සුල්තාන්වරයා වූ සලාදීන් (Saladin) ට එරෙහිව කෙරුණු මොන්ට්ගිසාර්ඩ් සටන (Battle of Montgisard) ටෙම්ප්ලර්වරුන්ගේ බිහිසුණු බව හොඳින්ම කියාපාන්නක්. එහිදී ටෙම්ප්ලර්වරුන් 500ක බළඇණියක් සමග දහස් ගණනක් වූ අනෙක් පාබළ සෙබළ බලඇණියක් සමගින් එක්වී 26000 ක් වූ ඉස්ලාම් බළඇණිය විනාශ කර දමා තියනවා.

 

මතු සබැඳි..

 

මීලඟ කොටසින් ටෙම්ප්ලර්වරුන්ගේ ව්‍යාප්ත වී යාම..

 

සටහන – ඉසුරු හිදැල්ලආරච්චි

ඇමර්ස්ට්ස් භූත නිවසේ අභිරහස

ඔබ අවතාර දැක තිබේ ද? ඔබ හොල්මන්, අවතාර විශ්වාස කරනවා ද? ඔබේ නිවසට එවන් භයානක ආත්මයක ඇල්ම බැල්ම වැටුණොත් ඔබ කුමක් කරන්නේ ද? යම් හෙයකින්, ඔබ අදහන ආගම ධර්මයට පවා ඉන් මිදීමට පිහිටක් ලැබෙන්නේ නම්..

ලෝකයේ සිදුවන විවිධාකාර අසාමාන්‍ය සිදුවීම් අතරින් හොල්මන් අවතාර සම්බන්ධ සිදුවීම් වලට ලැබෙන්නේ ඉහළම තැනකි. එම නිසාම එවන් සිදුවීම් පිළිබඳ කතාන්තර ඉක්මනින්ම මිනිසුන් අතර පැතිර යනවා මෙන්ම ඉක්මනින්ම ජනප්‍රියත්වයට ද පත් වේ. තවද ඒ ඇසුරින් විවිධ පොත් පත්, චිත්‍රපට, ටෙලිනාට්‍ය ආදිය බිහි වේ.

මෙවන් ගුප්තවූත් අතිශය අසාමාන්‍ය වුත් සිදුවීම් මාලාවක අරම්භය සනිටුහන් වන්නේ කැනඩාවේ නොවා ස්කොටියා හි ඇම්ර්ස්ට්ස්  (AmherstNova ScotiaCanada) නගරයෙනි. ලොව අද වන විට ගුප්ත විද්‍යා පර්යේෂකයින් ගේ අවතාර වර්ග කිරීම් වලට අනුව “වැලපෙන භූතයන්” ( poltergeist ) ලෙසින් හදුන්වන භූතයන්ගේ බලපෑමට ලක්ව මෙම නගරයේ ජීවත් වූ එස්තර් කොක්ස් නම් වූ කාන්තාව සම්බන්ධව සිදු වූ සිදුවීම් දාමය සලකා බැලිය යුත්තකි.

එස්තර් කොක්ස්

18 වන සියවසේ අගභාගයේ උපත ලැබූ එස්තර් කොක්ස් ජීවත් වූයේ තම විවාහක සොයුරිය වූ ඔලිව් කොක්ස් (පසුව ඔලිව් ටීඩ්) ගේ කුඩා නිවසෙහි ය. දරුවන් දෙදෙනෙකුගේ මව වූ ඔලිව් සිය ස්වාමිපුරුෂයා ඩැනියෙල් ටීඩ් සමග  ඩැනියල්ගේ සොයුරා වූ ජෝන් ටීඩ් ද සමග මෙම නිවසේ ජීවත් වී ඇත.

වයස අවුරුදු 18 ට පා තබද්දී එස්තර් තම මිතුරෙකු අතින් ලිංගික අපහරණයට ලක්වීමත් සමග අධික මානසික පීඩනයට පත් වූ ඇගේ ජීවිතයේ අඳුරු කාලපරිච්ජේදය ආරම්භ වීම සිදු වී ඇත. නිවසේ නිදා සිටින එස්තර්ට දොරට පහර දීම්, යම් යම් බඩුමුට්ටු බිමට වැටීම්, වැනි විවිධ ශබ්ද ඇසෙන්නට ගන්නේ ඉන් අනතුරුව ය. එමෙන්ම එස්තර් නොදැනීම ඇගේ ශරීරයේ විවිධ රෝගාබාධ ආදිය ඇතිවීම, අත පය ඉදිමීම වැනි තත්ත්වයන්ට ඇයට නිරන්තරයෙන්ම මුහුණ පෑමට සිදු වේ.

 

ඇමර්ස්ට්ස් නිවස

මෙහි ඉතා අසාමාන්‍යතම සිදුවීම වනුයේ කොක්ස් නිවසේ බඩු භාණ්ඩ ආදිය ඉබේම අවකාශයේ පියඹා යාම, බිම වැටී සුණුවිසුණු වී යාම වැනි දේ සිදුවීමයි. අනතුරුව ගෙදරට ‘අරක්ගත් භූත ආත්මය’ විසින් නිවැසියන් අමතා කතා කිරීම, විවිධ පණිවිඩ ලබා දීමට තැත් කරන අවස්ථාවන් නිරන්තරයෙන් ඇතිවීමට පටන්ගෙන ඇත. වරෙක එස්තර් ඉතා තදබල ලෙස උණ ගැනීම නිසා ඇයට ප්‍රතිකාර කිරීමට දොස්තරවරයා පැමිණි විටකදී ඔහු බලා සිටියදීම එස්තර්ගේ මුහුණේ සීරීම් ඇති වී ඇත. එමෙන්ම විවිධ කෙඳිරිළි හඬවල් වලින් තර්ජනාත්මක ඇමතුම් මෙන්ම එස්තර් නිදා සිටි ඇඳ ඉස්මත්තේ වූ බිත්තියෙහි “එස්තර් කොක්ස්, උඹව මරන්නේ මමයි” යනුවෙන් දර්ශනය වී ඇති බව ද කියැවේ.

කොක්ස් සොයුරියන් – ඔලිව්, එස්තර් හා ජෙනී

වරෙක එස්තර් ගලපටලය රෝගය උත්සන්න වී සති දෙකක පමණ කාලයක් ඇඳටම සීමා වී ගත කළ කාලය තුල කිසිඳු අද්භූත සිදුවීමක් වාර්ථා වී නොමැති බැව් කියැවේ. එමෙන්ම ඈ සැක්විල් හි (Sackville, New Brunswick) තම තවත් විවාහක සහෝදරියකගේ නිවසේ ගත කළ කාලය ඉතා සාමකාමීව ගෙවී ඇත. කෙසේ නමුත් ඈ පෙරළා ඇම්ර්ස්ට්ස් පැමිණි පසු සුපුරුදු ලෙස අද්භූත දෑ ඈ වටා සිදුවීමට ආරම්භ වන්නේ පෙරටත් වඩා භයානක අයුරිනි. මෙවර සිදුවන සුවිශේෂ සිදුවීම් වන්නේ නිවසේ වරින් වර ගිනි ගැනීම් ඇතිවීමයි.

 

ඇමර්ස්ට්ස් කොක්ස් නිවසේ අද්භූත සිදුවීම් චිත්‍ර ශිල්පියෙකුගේ ඇසින්

1879 වසරේ දී වෝල්ටර් හබල් නම් පර්යේෂකයා එස්තර් සම්බන්ධ සිදුවීම පිළිබඳ සොයා බැලීමට පැමිණෙන අතර ඒ වන විට ඇය භූත ආත්මයේ දැඩි බලපෑමට ලක්ව ඇති අවධියක් වේ. ඒ වන විට අවතාරය විසින් එස්තර්ට පහර දීම, සීරීම, තල්ලු කිරීම මෙන්ම භයානක අයුරින් පසුපසින් පැමිණ පිහියකින් ඇනීමට තැත් කිරීම වැනි දේ සිදු කර තිබුණි.

වෝල්ටර් ගේ මෙහෙයවීම් මත අවතාර සමග සන්නිවේදනය කිරීමට උත්සාහ කරන එස්තර් එය සාර්ථක වීම නිසා දැන ගැනීමට ලැබෙන්නේ ‘එකකට වඩා වැඩි ආත්ම ගණනාවක’ ඈ සමග සම්බන්ධ වන බවකි. මෙහි මූලික ආත්මය ලෙස සපතේරුවෙකු වූ “බොබ් නික්ල්” හඳුනාගනු ලබ අතර ඊට අමතරව “පීටර් කොක්ස්” නම් එස්තර්ගේ මියගිය ඥාතියෙකු ද “මැගී ෆිෂර්” නැමැත්තියකගේ ද ආත්ම ඈ හා සම්බන්ධ වී ඇති බව හඳුනාගැනේ.

පර්යේෂක වෝල්ටර් හබල්

පර්යේෂක වෝල්ටර් හබල් ගේ දායකත්වයෙන් එස්තර් හට තම අත්දැකීම් හෙලිදරව් කිරීමට විවිධ රටවල් වලට යාමට සිදු වන අතර අවසානයේ එම දීර්ඝ චාරිකා අවසානයේ ඇම්ර්ස්ට්ස් ගම්මානය වෙත පැමිණි පසුවත් නැවත ඇයට දරුණු සිදුවීම් ගණනකට මුහුණ පෑමට සිදුවේ. වරෙක ගම්මානයේ මිනිසෙකුගේ ධාන්‍ය ගබඩාවක් ගිනි ගැනීම පිළිබඳව ද සැක පිට ඇයට සිරගත වීමට සිදු වන අතර මාස හතරක සිර දඬුවමක් විඳීමෙන් පසු ඇය නිදහස් වී පැමිණේ. කෙසේ නමුත් කල් යද්දී තත්ත්වය තරමක් හොඳ අතට හැරෙන අතර එස්තර් දෙවරක් විවාහ දිවියට ඇතුලත්ව පුතුන් දෙදෙනෙකු ද ලබන්නීය.

වෝල්ටර් හබල් ගේ දීර්ඝ පර්යේෂණ ප්‍රතිඵලය පොතක් ලෙසින් එළි දැක්වෙන්නේ 1879 වසරේ දී ය. Eඑය පිටපත් 55,000 ඉක්මවා විකිණී ඇත. හබල් ගේ පර්යේෂණයට වඩා ගැඹුරින් මෙම සිදුවීම් අධ්‍යනය කරමින් 1907 වසරේ දී බ්‍රිතාන්‍ය ජාතික පර්යේෂකයෙකු වූ  හියවඩ් කැරිංටන් (Hereward Carrington) විසින් තම පර්යේෂණ ප්‍රතිඵල එලි දක්වනු ලැබිණි.

පර්යේෂක හබල් ගේ The Great Amherst Mystery පොත

කෙසේ නමුත් සුප්‍රසිද්ධ  භූතාත්මයන්ගේ බලයට යට වූ නිවෙස්  (haunted house)  ලෙස පතල ඇමිටිවිලි, හෙවි මැනිසන්, කෙන්වර්තිහෝල්  වැනි  නිවෙස් අතර පැරණිතම සිදුවීමක් ලෙස ඇමර්ස්ට්ස් හි කොක්ස් නිවසේ අද්භූතජනක සිදුවීම මාලාව අදට ද සැලකේ.

 

නරඹන්න

 

 

 

සටහන – ඉසුරු හිදැල්ලආරච්චි

ස්විට්සර්ලන්තය කැළඹූ ගෑස් මුහුණේ මිනිසා

මානව සංවර්ධන දර්ශකයේ ඉහළම ස්ථානයක මෙන්ම මිනිසාට වාසය කිරීමට සුදුසුම රටවල් අතර මුල් පෙලෙහි ලා කියැවෙන ස්විට්සර්ලන්තය පිළිගැනෙනුයේ ස්වභාව සෞන්දර්‍යයෙන්ද අනූන ප්‍රජාතන්ත්‍රවාදය ඉහලින් ක්‍රියාත්මක වන රාජ්‍යයක් ලෙසිනි. එවන් රාජ්‍යයක වැසියන් භීතියෙන් ඇලලූ ආන්දෝලනයට තුඩු දුන් පුවතකි ගෑස් මුහුණ පැළඳි මිනිසාගේ අද්භූත සිදුවීම.

බටහිර ස්විට්සර්ලන්තයේ මූල්ස් (Maules) නගරය ආශ්‍රිත වනාන්තරයේ දී පළමුවරට මිනිසාගේ නෙත ගැටුණු මෙම අද්භූත පුද්ගලයා සිය මුහුණ සම්පූර්ණයෙන්ම ගෑස් වෙස්මුහුණක් මගින් ආවරණය කර ඉතා රළු වූ බොයිලේරුකරුවන්  අදිනු ලබන ආකාරයේ ඇදුමකින් සැරසී දිගු ලෝගුවක් පැලඳ සිටි බවක් කියැවේ. මෙම පුද්ගලයා සම්පූර්ණයෙන්ම පාහේ මුහුණ ආවරණය කරගනිමින් ගෑස් මුහුණ පැලඳ සිටි නිසා කවරෙක්ද යන්න නිශ්චිතව හඳුනා ගැනීම අසිරු වී ඇත.

Loyon නම් වනාන්තරය ආශ්‍රිතව වසර දහයක් තිස්සේම විටින් විට දර්ශනය වූ මෙම අද්භූත සත්ත්වයා Le loyon ලෙස නම් කරන ලද්දේ මූල්ස් නගරවාසීන් විසිනි. වසර දහය පුරාවටම මෙම අද්භුත ජීවියා වනාන්තරයේ එකම මංපෙතක් ඔස්සේ ඇවිද යන බව ගම්වාසීන් කියා ඇත. එමෙන්ම මොහු පිළිබඳ පලමු දර්ශනය වීම සිදුවූ අවස්ථාවේ සිටම පොලීසිය ගම්වාසීන්ගේ හෝඩුවාවන් ඔස්සේ කැලය හා අවට ප්‍රදේශ සෝදිසි කරනු ලැබුවත් ඉන් කිසිඳු ඵලක් නොවුණි.

කෙසේ නමුත් Loyon හි මෙම අද්භූතජනක පුද්ගලයා ගේ ජායාරුවක් පළමු වරට ගැනෙන්නේ පැට්‍රික් නම් තම අනන්‍යතාව හෙලි කිරීමට අකමැති වූ ජායාරූප ශිල්පියෙකු විසිනි. ස්විට්සර්ලන්තයේ ප්‍රසිද්ධ පුවත්පතක් වන Le Matin පුවත්පත තුලින් මෙම ජායාරූපය එළිදැක්වීමත් සමග රට පුරා ආන්දෝලනයක් ඇති වීමට මෙය හේතු විය.

ගෑස් මුහුණේ මිනිසා සැබෑ ලෙසම හසුවූ ජායාරූපය

‘මම හෙමින් ඔහු ගමන් කරමින් සිටි දෙසට ලං වුණා. අපි අතර දුර මීටර දුසිමක් පමණ පරතරයක් ඇති වෙනකල්ම. ඔහු හැඳ සිටියේ හමුදා කබායක්, බූට්ස් සපත්තු සහ පැරණි පන්නයේ හමුදා ගෑස් මුහුණක්. ඔහුගේ උස මීටර 1.9 පමණ වෙනවා. ඔහු මාව දැකලා ටිකක් වේලා මා දිහා නිෂ්ශබ්දව බලන් ඉඳලා ආපසු හැරිලා යන්න ගියා.’ ගෑස් මුහුණු මිනිසා දැක ජායාරූපයට නැගූ මූල්ස් වාසී කැමරා ශිල්පියා ලබා දී තිබූ ප්‍රකාශයේ මෙසේ කියා තිබුණි. ‘මා සිටියේ මගේ පවුලේ අයත් සමග නිසා මට ඔවුන්ව ආරක්ෂා කිරීම ගැන හිතන්න වුණා. කොහොම වුණත් මම ඔහු ආපසු හැරී යන මොහොතේ මගේ ජංගම දුරකතනයෙන් ජායාරූපයක් ගත්තා.’ ඔහු තවදුරටත් කියා තිබේ.

වසන්ත සමයක මූල්ස් වනාන්තරයේ ඇවිදීමට ගිය Marianne Descloux නැමැත්තියට ද ගෑස් මුහුණේ මිනිසා හමුවී තිබේ. ‘එදා වැසිබර ඉරිදාවක්, ඔහු ගේ හිසේ කැප් eඑකක් තිබුණා. අඳුරු පාට ලෝගුවක් හා ගෑස් මුහුණු ආවරණයක් පැළඳගෙන හිටියේ. ඒවා ඉතාම පිළිකුල් සහගත පෙනුමක් ගෙන දෙනවා. මං නැවතත් නම් ඔහුව දැකීමට කැමත්තක් නැහැ’ ඈ කියයි.

එමෙන්ම තවත් වරක් මෙම අද්භූත පුද්ගලයා වනාන්තරයේ ඇවිද යනු දක්නට ලැබෙන්නේ 2012 උණුසුම් ග්‍රීෂ්ම ඍතුවේ  වනාන්තරය අසබඩින් තම පවුලේ පිරිස සමග මෝටර් රථයක ගමන් කරන පුද්ගලයෙකුටය. මෙවර ගෑස් මුහුණේ මිනිසා හමුව තරමක් අමුතු එකක් වන්නේ ඔහු අත මල් පොකුරක් ද තිබීම හේතුවෙනි. එහෙදී ඔහු ඔවුන්ට පහර දේ යන බයෙන් එතැනින් ඉක්මණින් ඉවත් වීමට පිරිස කටයුතු කර ඇත.

Mules වනාන්තරය දැක්වෙන සිතියම

අවාසනාවන්ත අවසානයක් ලඟා කරමින් ගෑස් මුහුණේ මිනිසා ගේ ඇදුම් පැලදුම් Loyon වනාන්තරයෙන් හමුවන්නේ මිනිස් අත් අකුරින් ලියවුණු අද්භූත ලිපියකුත් සමගිනි. ප්‍රංශ බසින් ලියැවුණු එය Le risque d’une chasse à la Bête යනුවෙන් සඳහන් කරමින් කියන්නේ “මෘගයා දඩයම් වීමේ අවදානමක” යනුවෙනි. මෙම ලියැවිල්ල ගෑස් මුහුණේ මිනිසාගේ මරණ ලියැවිල්ල ලෙසින් පසුව ප්‍රචලිත වූ අතර මෙය ලියා තබා මෙම අද්භූත මිනිසා සියදිවි නසාගන්න ඇතැයි අනුමාන කෙරේ. එමෙන්ම ඔහුගේ ලිපියේ ‘සතුටේ ප්‍රතිකර්මය’ ලෙසින් හඳුන්වා දෙනු ලැබූ වනාන්තරය තුල ඔහුගේ නිදහස් හැසිරීම් වලට බාධා එල්ල වීම හේතුවෙන් ඔහු මෙම තීරණය ගනු ලබන්නට ඇති බව කියැවේ.

කෙසේ නමුත් කිසිවෙකුට හිරිහැරයක් නොකළ මෙම අද්භූත මිනිසා මරණයට පත් වීමේ වගකීම Le Matin පුවත්පත ඇතුළු ඔහුගේ ජීවිතයට එබිකම් කළ මාධ්‍ය ආයතන වගකිව යුතු බවට මානව හිමිකම් ක්‍රියාකාරීන් සටනට බසින ලද්දේ පසුකාලීනවය.

එනමුත් අදටද මෙම අද්භූත මිනිසා මිය ගියා ද නැතිද යන්න පිළිබඳ හෝ ඔහුට අයත් මළසිරුරක හෝඩුවාවක් හෝ පිළිබඳ තොරතුරක් ලැබී නොමැත.

 

  • නරඹන්න

 

 

 

අන්තර්ජාලය ඇසුරිනි.

සටහන – ඉසුරු හිදැල්ලආරච්චි

අදටත් අභිරහසක් වූ බබූෂ්කා ලේඩි

මෙයින් වසර 54ට පෙර, එනම් 1963 නොවැම්බර් 23 වැනි දින පස්වරු 12.30ට පමණ ඇමරිකාවේ 35 වැනි ජනාධිපතිවරයා වූ ජෝන් එෆ්. කෙනඩි (John F. Kennedy), ටෙක්සාස් හි ඩලාස්  (Dallas, Texas) නගරයේ ඩීලී ප්ලාසා (Dealey Plaza) හි මෝටර් රථ සංචාරයේ යෙදී සිටියේ තම බිරිඳ ජැකලයින් කෙනඩි (Jacqueline) ටෙක්සාසයේ ආණ්ඩුකාරවරයා වූ ජෝන් කොනලි (Texas Governor John Connally) හා ඔහුගේ බිරිඳ නෙලී සමගිනි.

 

ජෝන් එෆ් කෙනඩි රථ පෙළපාලියේ

එහිදී නොසිතූ ලෙස කොහේදෝ සිට පැමිණි වෙඩි උණ්ඩයක් ජනපති කෙනඩිගේ ගෙල හරහා ගියේ ඇමරිකාවේ ජනාධිපතිවරයෙකුට අත්වූ කෲරතම මරණය හිමි කර දෙමිනි.

ඝාතනය සිදුවූ අවස්ථාවේ ජැකලයින් කෙනඩි ගේ ක්ෂෙණික හැසිරීම

කෙසේ නමුත් මාස දහයක විමර්ශනයකින් පසුව එනම් 1964 වසරේ අගෝස්තුවේ දී මෙම ඝාතනයේ ඝාතකයා ලෙස තහවුරු කර ගනු ලබන්නේ ඇමරිකානු හමුදා මැරීන් සේවයේ යෙදී සිට ඉවත් වූ හමුදා භටයෙකු වූ ලී හාවි ඔස්වල්ඩ්  (Lee Harvey Oswald) නැමැත්තායි.

 

ලී හාවි ඔස්වල්ඩ්

කෙනඩි ඝාතනය මෙසේ සිදු වෙද්දී මෙම සිදුවීම සමග කරලියට එන තවත් චරිතයකි බබූෂ්කා කාන්තාව හෝ බබූෂ්කා ලේඩි ලෙස හඳුන්වන්නේ. කෙනඩි ඝාතනය සිදු වන අවස්ථාවේ දී වෙඩි හඬත් සමග ජනාධිපති ආර්‍යාව ජනපති වෙතට පනින ආකාරයත්, අවට සිටින ආරක්ෂකයන් ජනපති ගමන් ගත් රථය ආවරණය කරගන්නා අයුරුත්, වටපිටාවේ ජනතාව කැළඹී ඒ මේ අත දිව යන ආකාරයත් ඒ අවස්ථාව වීඩියෝ ගත කළ කැමරා කාච තුල මනාව සටහන් වී තිබේ. එමෙන්ම මේ කිසිවකින් කැලඹීමකට හෝ තැතිගැන්මකට ලක් නොවී සිටින මැදිවියේ කාන්තාවක් ද මෙම සේයා පට වල සටහන් වී තිබීම ලෝක අවදානයට පාත්‍ර වූ කරුණක් විය.

 

බබුෂ්කා ලේඩි රථ පෙළපාලිය නරඹමින්

මෙම කාන්තාව කවරෙක්ද යන්න නිශ්චිතවම පැහැදිලි නොවුනත් ඇයට ‘බබුෂ්කා’ ලෙසින් නම් පට බැඳුනේ ඇය පැලඳ සිටි රුසියානු වයස්ගත කතුන් පලඳින ආකාරයේ ‘ස්කාෆ්’ රෙද්දක් (headscarf)  හිස පොරවාගෙන සිටීම නිසාවෙනි. රුසියානු බසින් ‘බබුෂ්කා’ (бабушка) යනු ආත්තම්මා හෝ වයස්ගත කාන්තාව යන්නයි.

 

නොසැලී සිටින බබුෂ්කා ලේඩි

බබුෂ්කා ලේඩි ඇසින් දුටුවන් මෙන්ම සැ(z)පෘඩර් වීඩියෝව (Zapruder film), ඕවිල් නික්ස් (Orville Nix), මේරි මියුක්මෝ (Marie Muchmore) හා මාර්ක් බෙල් විසින් කැමරා පටිගත සාක්ෂි මගින් අනාවරණය වනුයේ මෙම කාන්තාව ජනපතිවරයා රැගත් රථපෙළ පැමිණෙන ප්‍රධාන වීදිය හා එල්ම් වීදිය අතර තණකොල වැවූ කොටසේ සිට අතෙහි වූ වීඩියෝ කැමරාවක් මගින් ජනපති සහිත රථ පෙළ වීඩියෝ ගත කරන බවකි.

 

බබුෂ්කා ලේඩි මුහුණ දැක්වෙන එකම අවස්ථාව

අනතුරුව ජනපතිවරයාට වෙඩි වැදුණු පසු ඈ කලබලයකින් තොරව එල්ම් වීදිය හරහා ගොස් කැළඹුණු ජනතාව හා මුසු වී ඩීලි ප්ලාසා හි තණකොල සහිත කුඩා කඳු වැටියක් වෙතට ඇදී යන බවත් අවසාන වශයෙන් කැමරා වල සටහන් වේ. එමෙන්ම ඇය පිළිබඳව හෝ ඇය ගනු ලැබූ වීඩියෝව පිළිබඳව තොරතුරක් අද වන තෙක් ලැබී නොමැති අතර ඉහත කී එකම පුද්ගලයෙකු හෝ වීඩියෝ කළ වීඩියෝ පට තුල මෙම කාන්තාවගේ මුහුණ පැහැදිලි ලෙස සටහන් වී නැත්තේ එක්කෝ ඈ කැමරාවට පිටුපා සිටීම හෝ ඈ අත තිබූ කැමරාව නිසා ඇගේ මුහුණ ආවරණය වී තිබීම නිසාවෙනි.

 

බබුෂ්කා ලේඩි, කෙනඩි ඝාතනයෙන් පසු ඇවිද යමින්

වසර 1970 දී මෙම සිදුවීම නැවත මතු වෙන්නේ ටෙක්සාසයේ ජෝෂුවා (Joshua, Texas) හි ක්‍රිස්තියානි ආගමට සම්බන්ධ පුනරුත්ථාපන දේවමෙහෙයකදී (revival meeting) බෙවර්ලි ඔලිවර් නම් කාන්තාවක් තමා බබූෂ්කා ලේඩි තමා බව ට එහි දේශකයා වූ ග්‍රේ ශෝ හට පැවසීමත් සමගයි. මෙහිදී ඔලිවර් විසින් කියා සිටියේ තමාගේ යශිකා (Yashica) කැමරාවෙන් ගත් Super 8 film ක්‍රමයේ (ඊස්ට්මන් කොඩැක්  Eastman Kodak සමාගම විසින් 1965 වසරේ සාදන ලද 8mm වර්ගයේ චල රූ සේයා පට motion picture film format) මෙම වීඩියෝව එෆ්. බී. අයි නියෝජිතයන් යැයි කියාගත් දෙදෙනෙකුට ලබාදුන් බවකි.

 

බෙවර්ලි ඔලිවර්

දින 10ක් ඇතුලත වීඩියෝ පටය ඇයට නැවත ලබා දෙන බවක් පවසා එය රැගෙන ගියත් ආපසු නොලැබුණු බවත් ඇය කියා තිබුණි. එමෙන්ම 1988 දී  The Men Who Killed Kennedy නම් වාර්ථා වැඩසටහන සඳහාද ඈ මෙම ප්‍රකාශය නැවතත් සිදු කළාය.නමුත් ඔලිවර් ගේ මෙම ප්‍රකාශයේ තිබූ පරස්පර විරෝධී බව වූයේ ඇය භාවිත කලා යැයි කියූ යශිකා Super 8 film වර්ගයේ කැමරා මාදිලිය 1963 කෙනඩි ඝාතනය සිදුවන කාලයේ දී නිපදවා නොතිබීමයි. ඉන් වසර 6ට පසු එනම් 1969 දී පමණ මෙම කැමරා වෙළඳපොළට පැමිණ තිබුණි.

 

yashika super 8 film වීඩියෝ කැමරාව – 1970 මාදිලිය

නමුත් මෙම කරුණ සම්බන්ධයෙන් ඔලිවර් පැවසුවේ තම මිතුරෙකු මාර්ගයෙන් පර්යේෂණ මට්ටමේ එම මාදිලියේ කැමරාවක් ලැබුණු බවත් එහි වෙළඳ නාමය පවා සටහන්ව තිබුණා ද යන්න තමාට මතක නැති බවයි. නමුත් ඇගේ මේ ප්‍රකාශ වලින් ඇය පවසන දේ හි සත්‍ය අසත්‍යතාවය පිළිබඳ සාධාරණ සැකයක් සැමට ඇති වී තිබුණි.මෙම බෙවර්ලි ඔලිවර් කාන්තාවගේ සිදුවීම පාදක කරගෙන ඔලිවර් ස්ටෝන් (Oliver Stone) විසින් 1991 දී JFK නමින් සුප්‍රසිද්ධ චිත්‍රපටය නිපදවීම සිදු වී තිබුණි.

JFK චිත්‍රපටය

කෙනඩි ඝාතනයෙන් වසර 30ට පසු එනම් 1990 නොවැම්බර් 18 පැවති ඝාතන වාර්ථා නැවත අධීක්ෂණය කිරීමේ කමිටුවක දී ගැරී මැක් නම් පර්යේෂකයා පවසා සිටියේ අපූරු කතාවකි. කොඩැක් සමාගමේ ඩලාස් හි කාර්‍යාලයේ විධායක නිලධාරියෙකු වූ පුද්ගලයෙකු විසින් ගැරීට පවසා තිබුණේ සැ(z)පෘඩර් වීඩියෝ පටය විශ්ලේෂණය කිරීමේදී වයස අවුරුදු 30ක පමණ තලෙලළු කාන්තාවක් ප්‍රධාන වීදිය හරහා පැමිණ එල්ම් වීදිය අසල තණ පිට්ටනියේ නතර වී ජනපතිවරයා පැමිණෙන ලිමොසින් රථය හා ටෙක්සාස් රාජ්‍ය පරිපාලන ගොඩනැගිල්ල ජායාරූප ගත කරන බවක් සටහන් වී ඇති බවකි. එහි දී ද ඇගේ මුහුණ බොඳවී හඳුනාගැනීමට අපහසු ලෙසින් දිස්වෙන බවක් එම විධායක නිලධාරියා ගැරීට කියා ඇත. කෙසේ නමුත් ගැරී පවසන්නේ බබුෂ්කා ලේඩි බෙවර්ලි ඔලිවර් විය නොහැකි බවය.

 

The Men who Killed Kennedy වාර්ථා වැඩසටහන

නමුත් විශේෂිතම කරුණු වන්නේ කෙනඩි ඝාතනය වන කාලය වන විට ඔලිවර් වයස අවුරුදු 17ක තරුණියක් බවයි. නමුත් මෙම වීඩියෝ දර්ශන වල පැහැදිලිවම මැය තරුණියක් නොව මැදිවියේ කාන්තාවක් බව පෙනී යයි. එමෙන්ම ඇය පවසන 1964 වසරේ දී පර්යේෂණ මට්ටමේ යශිකා Super 8 film වර්ගයේ කැමරාව මීටර 6-9 ප්‍රමාණයේ එකක් බව කොඩැක් සමාගම තහවුරු කරන බවත් ඇය එම වීඩියෝ පට එෆ්.බී.අයි නමින් හඳුන්වාගන්නා පුද්ගලයින්ට ලබා දෙන්නේ ඇය සතු මාරිජුවාන අසුවේ යැයි බියෙන් යන්න පසුකාලීනව හෙලිදරව් වූ කරුණුය.

මෙසේ මතට ලොල් වීම, පරස්පර විරෝධී ප්‍රකාශ ආදී කරුණු නිසා ඔලිවර් ගේ ප්‍රකාශ අසත්‍ය හා පිළිගත නොහැකි ඒවා බවට තහවුරු වෙයි. ඇතැමුන් පිටසක්වල ජීවීන්ගේ ගිණුමට බැර කරනු ලබන මෙම ඝාතනය හුදෙක් ඇමරිකානු මැරීන් භටයාගේ මැදිහත් වීම වෙනස් ආකාරයකින් දැකීමට උත්සාහ දරති. එමෙන්ම මෙම අද්භූත රුසියානු පෙනුමැති ආත්තම්මා, බබුෂ්කා කවරෙක් ද යන්න අදටද අභිරහසකි.

 

නරඹන්න

 

තොරතුරු අන්තර්ජාලය ඇසුරිනි

සටහන – ඉසුරු හිදැල්ලආරච්චි

දුෂ්ට විකටයෙක් ඔබට හමුවුවොත්…

ඔබත් ඉංග්‍රීසි චිත්‍රපට නරඹන්නෙක් නම්, විශේෂයෙන් භීෂණ චිත්‍රපට වලට කැමති, ඒවා නරඹන්නෙක් නම් හෝ ස්ටීවන් කිං (Stephen King) වැනි ලේඛකයන්ගේ භීෂණ නවකතා ප්‍රිය කරන්නෙක් නම් අනිවාර්යෙන්ම මේ දුෂ්ට විකටයන් ඔබ දැනටමත් හඳුනනවා ඇත. එසේත් නොමැති නම් ලෝ සුප්‍රසිද්ධ බැට්මෑන් චිත්‍රකතා, කාටූන් හා චිත්‍රපට මාලාවේ එන ප්‍රධාන දුෂ්ට චරිතය වන ජෝකර් ඔබට අමතක නැතිවාට සැක නැත. සාමාන්‍යයෙන් විකටයාගේ භූමිකාව වූ විහිළු සැපයීම වෙනුවට භීෂණය පැතිරවීම කරා මේ චරිත වෙනස් වූයේ කෙසේ ද? මේ පිළිබඳසොයා බැලිය යුතු නොවේද? එසේ නම් මේ ලිපිය තුලින් අපි ඒ බව විමසා බලමු.

 

අතීතයේදී විකටයා යන චරිතය රාජ සභාවේ රජු පිනවීම සඳහා සැකසුණු වෘත්තියක් ලෙස බොහෝ පරීක්ෂකයන් පෙන්වා දෙනු ලබයි. ලංකාවේද ඊට රුකුල් සපයමින් අන්දරේ වැනි චරිත මෙම විකටයාගේ මුල් පුරුක් ලෙස සැලකිය හැකිය. අතීතයේ එංගලන්තය, ප්‍රංශය, ජර්මනිය වැනි යුරෝපීය රටවල රජ මාලිගාවේ දී රජුට විහිළු සපයමින් විවිධ රූපණ රඟ දැක්වූ මෙම චරිතය මුහුණේ පාට තවරා ගෙන නොයෙක් විසිළු ආකාරයෙන් මාලිගය පුරා ප්‍රභූන් ප්‍රහසනයට ලක් කර ඇත.

සාමාන්‍ය විකටයෙක්

තවත් කල් යත්ම මේ රැඟුම් රජුට පමණක් සීමා නොවී පොදු මහජනයාට ද දැකබලා ගත හැකි ආකාරයේ නාට්‍ය ලෙසින් සැකසිණි. විශේෂයෙන් අදටද නාට්‍ය ආරම්භයට පෙර එන කෝලමා යන චරිත මෙහි මුල් ස්වරූපයක් වේ. ඉන් අනතුරුව සර්කස් වැනි සංදර්ශන ඔස්සේ මහජනයා ප්‍රහසනය කළ විකටයන් නොහොත් ජෝකර්වරුන් විශේෂයෙන් කුඩා දරුවන්ගේ වින්දනය උදෙසා ළමා සැණකෙලි, උත්සව ආදියේ නැතිවම බැරි අංගයක් වී ඇත. මීට අමතරව  McDonald’s වැනි අවන්හල් වල සංකේතයක් ලෙස විකටයෙකු බාවිතා කිරීම විනෝදය සමග මිනිසුන් ගේ ජීවිත හැඩගැස්වීමට හේතු වී ඇත.

මැක්ඩොනල්ඩ්ස් විකටයා

කෙසේඑ නමුත් ප්‍රහසනය මුල්කොට බිහිවූ විකටයා එයින් අංශක 180ක්ම කැරකී සම්පූර්ණයෙන්ම විරුද්ධ භීෂණය පාදක කරගෙන බිහිවූයේ කෙසේද? මෑතකාලීන භීෂණ සාහිත්‍ය සැලකීමේදී එහි රජු නමින් විරුදාවලිය ලත් ස්ටීවන් කිං 1986 දී ලියූ It නවකතාව මෙහි ආසන්නතම පිබිදීමට හේතුවූවා යැයි කිව හැක.

 

ස්ටීවන් කිං ලියූ It නවකතාවේ චිත්‍රපටය

නමුත් ඊට ප්‍රථමව භීෂණ සාහිත්‍යයේ ආරම්භකයා ලෙස හඳුන්වන එඩ්ගා ඇලන් පෝ  (Edgar Allan Poe) 1849 දී රචිත Hop-Frog  නම් කෙටිකතාවේ පළමුවරට දුෂ්ට විකටයෙකු ගැන සඳහනක් තිබේ. එමෙන්ම දුෂ්ට විකටයෙකු සැබෑ ලෙසින් වේදිකාවට පැමිණෙන්නේ 1874 වසරේ දී  Ruggero Leoncavallo නම් ඉතාලියානු නාට්‍යවේදියාගේ (Pagliacci) නම් නාට්‍ය හරහාය.

Pagliacci නාට්‍ය පෝස්ටරය

ඉන් අනතුරුව විවිධ විත්‍රපට, රූපවාහිනී වෘතාන්ත ආදිය මගින් විශේෂයෙන්ම යුරෝපය හා ඇමරිකාව පුරා මෙම දුෂ්ට විකටයන් පිළිබඳ විවිධාකාර අදහස් ජනතාව වෙත සමීප වෙද්දී මෙය මානසික ගැටළුකාරී තත්ත්වයක් දක්වා දික් ගැස්සීම සිදු විය.  coulrophobia යනුවෙන් හැඳින්වූ මෙම මානසික රෝගී තත්ත්වය බොහෝසෙයින් යොවුන් වයසේ පසුවන පිරිස් අතර දක්නට ලැබෙන අතර එහිදී වෙස් ගන්වා සිටින විකටයන් දැකීමට ඇති බිය මෙහි මූලික රෝග ලක්ෂණය ලෙස හඳුනා ගෙන ඇත. කැලිෆෝනියානු ජාතික විශ්ව විද්‍යාලයේ මනෝවිද්‍යාව පිළිබඳ මහාචාර්‍යවරයෙකු වූ ජෝසප් ඩර්වින් විසින් ප්‍රකාශ කර ඇත්තේ තරුණ තරුණියන් විසින් නාඳුනන මුහුණු දැකීමට ඇති බිය හා සමාජභීතිකාව වැනි කරුණු සියල්ල එක්ව ගත් විට විවිධ වෙස්ගැන්වීම්, වෙස්මුහුණු කෙරෙහි ඇතිවන බිය හා යම් සබඳතාවක් පවතින බවයි.

 

දාම ඝාතක John Wayne Gacy හා ඔහු Pogo clown ඇඳුමෙන් සැරසී

මෙම දුෂ්ට විකටයාගේ භූමිකාව මාරක විකටයෙකු දක්වා දික් ගැස්සෙන්නේ ජෝන් වේන් ග්‍රේසි (John Wayne Gacy) සිදුවීමත් සමගිනි. මානසික විකෘතියක් සහිත දාම ඝාතකයෙකු වූ ග්‍රේසි 1972 – 1978 කාලවකවානුව තුල කුඩා පිරිමි දරුවන් හා පිරිමින් 33 දෙනෙකු පමණ වධහිංසනයට හා ලිංගික අපහරණයට ලක් කරමින් ඝාතනය කර ඇත්තේ ළමා උත්සව හා සංදර්ශන වලට Pogo the Clown නම් විකට රූපය නිරූපණය කරමිනි. දාම ඝාතක විකටයෙකු සත්‍ය ලෝකයට පැමිණීම එලෙසට සනිටුහන් වෙද්දී අදටද බොහෝමයක් මංකොල්ලකෑම්, පැහැරගැනීම්, විවිධ ප්‍රචණ්ඩ ක්‍රියා සිදු කිරීමේ දී විකට මුහුණකින් සැගවී ඒවා සිදු කිරීම බහුලව දැකිය හැකිය.

එමෙන්ම විකටයන් හා සම්බන්ධ අවතාර සිදුවීම් ගණනක් ද ලෝකයේ නන් දෙසින් වාර්ථා වී ඇත. 1981 වසරේ දී මසෙචුසෙට්ස් ප්‍රාන්තයේ බෘක්ලින් නුවර දී විකට වෙස් ගත්තෙකු කුඩා ළමුන් දෙදෙනෙකු වෑන් රථයක් තුලට ඇද දමා ගැනීමට තැත් කිරීමේ සිද්ධියක් ඇමරිකාව කැළඹීමට හේතු වී ඇත. එයින් ඇරඹි විකට භීෂණය Midwest, northwest, Arizona හි Phoenix, New jersy හි West orange, Honduras සහ Illinois වැනි ප්‍රදේශ වලින් ද වාර්තා වී ඇත.

 

මියගිය මර්ලින් වොරන්

 

සිද්ධිය පුවත්පත් වාර්තා කර තිබූ අයුරු

 

මේ අතරම 1990 මැයි මස 26 ෆ්ලොරීඩාහි වෙලින්ග්ටන් නගරයේ විසූ මර්ලින් වොරන් නම් නම් කාන්තාවගේ මරණය සිදු වූයේ ද විකටයෙකු අතිනි. මර්ලින් ගේ නිවසේ දොරට තට්ටු කරන හඬ ඇසී දොර හැරිය ඇයට දක්නට ලැබුණේ මල් සහ බැලුන් අතින් ගත් දුඹුරු දෑස් ඇති විකටයෙකි. එම විකටයා එක වරම ඇයට වෙඩි තබා පලා ගියේ කිසිවක් සිතාගැනීමට වත් ඉඩ නොතබමිනි. මෙලෙස මියගිය මර්ලින් ගේ මරණයට හේතු වූ ඝාතකයා පොලීසියටසොයා ගැනීමට නොහැකි විය. කෙසේ නමුත් 2017 වසරේ දී මෙම ඝාතනයේ මහමොළකරු නීතියට කොටු වන්නේ නොසිතූ ලෙසිනි. ඒ වෙන කවුරුත් නොව මර්ලින්ගේ වැන්දඹු පුරුෂයා 2002 වසරේදී නැවත විවාහ වන ශීලා වොරන් නම් කාන්තාවයි.

ඝාතනයේ වැරදිකාරිය බවට ඔප්පු වූ ශීලා වොරන්

මේ ආකාරයට භීෂණයේ සලකුණක් වන තැනට පත්වූ විකටයාගේ දුෂ්ටත්වය, කෲරත්වය මැනවින් පිළිබිඹු වන මෑත දී තිරගත් වූ චිත්‍රපට අතරට  Stephen King’s It (1990),  Killer Klowns from Outer Space (1988),  Amusement (2008), Clownhouse (1989),  Blood Harvest (1987),  Poltergeist (1982),  Carnival of Souls (1998),  Killjoy (2000),  Zombieland (2009), 100 Tears (2007), වැනි චිත්‍රපට හැඳින්විය හැක. මීට අමතරව බැට්මෑන් (The Dark Knight) වැනි සුපිරි වීර ක්‍රියාදාම චිත්‍රපට වලට ද මෙම දුෂ්ට විකටයා ගේ ආගමනය සිදුවී ඇත.

 

බැට්මෑන් කතාමාලාවේ එන දුෂ්ටයා ජෝකර් The Dark Knight චිත්‍රපටයේ

ඉතින්.. මෙය කියවන ඔබගේ නිවසටත් දුෂ්ට විකටයෙකු පැමිණියහොත්?? සූදානම් වන්න.

 

නරඹන්න

  1. දුෂ්ට විකටයන් සැබෑ ලෙසම කැමරාවේ සටහන් වීම්..

2. මර්ලින් වොරන් සිදුවීම

http://people.com/crime/killer-clown-arrested-27-years-victim-family-reacts/

තොරතුරු අන්තර්ජාලය ඇසුරිනි

සටහන – ඉසුරු හිදැල්ලආරච්චි

පොළවෙන් මතු වූ බේල්මෙස් මුහුණු වල අබිරහස

වසර 1971 දී ස්පාඤ්ඤයේ ජීන් පළාතේ බේල්මෙස් නගරයේ ජීවත්වූ වැසියන්ට මුහුණ දෙන්නට සිදුවූ අද්භූත් සිදුවීම් මාලාවක් නිසා එම නගරයේ ජන ජීවිතය වෙනසකට ලක්වීමට හේතු වූ අතර මුළු යුරෝපයේම අවධානය ස්පාඤ්ඤ වෙත යොමු වීම සිදුවිය. බේල්මෙස් මුහුණු වල අබිරහස ලෙසින් ලොව ප්‍රකට වූ එම සිදුවීම් දාමය අවිවාදයෙන්ම 20 වන සියවසේ සිදුවූ අතිශය අසාමාන්‍ය සිදුවීම ලෙස පාරමනෝවිද්‍යාඥයන් විසින් අදටත් හදුන්වනු ලබයි.

ප්ර්කට බේල්මෙස් මුහුණ

1971 අගෝස්තු 23 වැනිදා බේල්මෙස් නගරයේ ජීවත් වූ පිරේරා පවුලට අයත් නිවසේදී එම පවුලේ මාරියා ගෝමස් කාමරා නම් කාන්තාව විසින් නිවසේ කුස්සියේ බිම කොන්ක්‍රීට් පොළව මත අරුම පුදුම දෙයක් දක්නට ලැබුණි. ඒ මිනිස් මුහුණක්. කිසිවෙකු විසින් අදිනු ලැබුවාක් මෙන් පැහැදිලිව තිබූ එම සිතුවම මාරියා විසින් තම සැමියා ජුවාන් පිරේරාට සහ පුතු මිගෙල් හට පෙන්වන ලදුව ඔවුන් විසින් එය පිකැස් එකක් භාවිතයෙන් විනාශ කර දමා තිබුණි.

 

මාරියා ගෝමස්

නමුත් එතැන් පටන් විවිධ කාල පරතර වලදී පිරේරා නිවසේ කුස්සියේ බිම කොන්ක්‍රීට් පොළොවේ විවිධ මුහුණු මතුවීම විශාල අබිරහසකට ආරම්භය සපයා ඇත. පිරේරාවරුන් දිගින් දිගටම මෙම සිතිවම් විනාශ කිරීම කළත් නැවතත් වෙනස් වෙනස් සිතුවම් ඇතිවීම මහත් ගැටළුවක් මෙන්ම විශ්මයක් වී ඇත. මෙම සිදුවීම බේල්මෙස් නගරයේ නගරාධිපතිවරයාට දන්වනු ලැබූ පසු ඔහු විසින් ඔහු විසින් මෙම සිතුවම් විනාශ කිරීම තහනම් කර ඇති අතර අනතුරුව එම කොන්ක්‍රීට් කොටස කපා වෙන්කර පරීක්ෂණ සඳහා යවනු ලැබුණි.

 

කොන්ක්‍රීට් පොළවේ මතුවූ මුහුණු

කෙසේ නමුත් පිරේරා නිවසේ ඇතිවූ මෙම පුදුමාකාර සිදුවීම් සියැසින්ම දැක බලා ගැනීමට දේශීය මෙන්ම විදේශීය සංචාරකයන් වැල නොකැඩී එන්නට පටන්ගන්නේ මේ කාලයේදී ය. මුහුණු නිවස La Casa de las Caras (The House of the Faces) ලෙසින් ප්‍රචලිත වූ මාරියාගේ නිවස වසර 30ක් පුරා විවිධ ප්‍රමාණයේ විවිධ හැඩයන්ගෙන් හා විවිධ භාවයන්ගෙන් යුත් කාන්තා හා පුරුෂ මුහුණු ගණනාවක් ඇති වී තිබුණි.

පිරේරා නිවසේ පරීක්ෂණ අතරතුර

මෙම සිදුවීම සම්බන්ධයෙන් සත්‍ය සෙවීමට විවිධ පරීක්ෂණ ගණනාවක් පවත්වා තිබේ. 1993 ජුලි මස Luis Ruiz-Noguez නම් පර්යේෂකයා විසින් Journal of the Society for Psychical Research  නම් ලිපිය මගින් මෙම සිදුවීමට හේතුව ලෙස කොන්ක්‍රීට් පොළවට ගෑ තීන්ත වල තිබූ සින්ක්, ලෙඩ් හා ක්‍රෝමියම් කැටායන වලින්  තීන්ත වල වර්ණක සෑදීමට මුල් වූ ලෙඩ් හා ක්‍රෝමියම් කොටස් ප්‍රතික්‍රියා ආශ්‍රයෙන් මෙම මුහුණු ආකාර පැල්ලම් මතූවී ඇති බවයි.

Luis Ruiz-Noguez

Complutense University of Madrid හි සමාජවිදාඥයෙකු වූ මනුවෙල් මාටින් සෙරානෝ (Manuel Martín Serrano)  විසින් තම  Sociología del Milagro (Sociology of the miracle) පොතෙහි පෙන්වා දෙන පරිදි මෙවන් දෑ හුදෙක් ප්‍රසිද්ධිය හා මුදල් බලාගෙන කරන වංචනික කටයුටු බවට කියයි. නමුත් ඔහු විසින් තම පොතේ මෙම සිදුවීමේ නම් ගම් කිසිවක් ඇතුලත් නොකිරීමට පරිස්සම් වී ඇත.

ස්පාඤ්ඤ පාරමනෝවිද්‍යාඥයින්ගේ සංගමයේ උප සභාපතිව එවකට සිටි සංශයවාදියෙකු (යමක් පිළිබඳ ප්‍රශ්න  කරන්නා)  වූ ජෝස් ලුවිස් ජෝඩ්න් (José Luis Jordán) විසින් ශාපයන්ට ලක්වූ නිවාස අදිය පිළිබඳ පර්යේෂණ කරන අතරතුර මෙම සිදුවීම පිළිබඳව ද යම් සෙවීමක නිරත විය.

බේල්මෙස් සිදුවීම පිළිබඳ වඩා ගැඹුරුම හැදෑරිම කරන ලද්දේ හාන්ස් බෙන්ඩර් හා ජර්මන් ඩි ආගුමොසා (Hans Bender and Germán de Argumosa) විසිනි. මෙම දෙදෙනාගෙන් එක් අයෙකුවත් මෙම සිදුවීම පිළිබඳව පර්යේෂණ පත්‍රිකාවක් හෝ නිබන්ධනයක් ඉදිරිපත් කොට නොමැත. නමුත් ආගුමෝසා විසින් ගොතික් පුරාවෘත ආදිය හදාරමින් මෙම සිතුවම් පිළිබඳව වසර දෙකක අධ්‍යනයක් සිදු කර ඇති බව කියැවේ. මෙහිදී ඔහු සිතුවම් මැවෙන බිම විනිවිද පෙනෙන ප්ලාස්ටික් පත් වලින් වසා ඒවායේ වෙනස්වීම් අධ්‍යනය කර ඇත. එහිදී ඔහු විසින් පවසා ඇත්තේ මෙම සිදුවීමේ අසාමාන්‍යකම හොදින්ම පෙන්වමින් ප්ලාස්ටික් පත් යට වූ මුහුණු වල සියුම් වෙනස්වීම් සිදුවී ඇති බවයි.

Germán de Argumosa සහ Hans Bender

මෙවන් විවිධ මත බේල්මෙස් මුහුණු අධ්‍යනය කළ පර්යේෂකයෝ පවසද්දී අවසන් නිගමනයකට ඒමට තවමත් නොහැකිව අබිරහසක් බවට මේවා පත්ව ඇත. එමෙන්ම වසර 85ක් ආයු වළඳා 2004 පෙබරවාරි මස මාරියා ගෝමස් මිය ගිය පසුවත් අලුතින් මෙම මුහුණු වෙනස් වන බවක් පෙඩ්‍රෝ අමොරෝස් (Pedro Amorós) නම් පර්යේෂකයා විසින් හෙලිදරව් කරන ලදි.

නමුත් 2007 වසරේදී මාධ්‍යවේදියෙකු වූ ජේවියර් කැවනයිල්ස් සහ පර්යේෂකයෙකු වූ ෆ්රැන්සිස්කෝ මානෙස්   (Javier Cavanilles and Francisco Máñez) විසින් රචිත Los Caras de Bélme  (The Faces of Bélmez” and “The Scoundrels of Bélmez) නම් ග්‍රන්ථයෙන් මාරියාගේ පුතු වූ දියේගෝ පිරේරා මෙම අද්භූත siසිතුවම් වල නිර්මාපකයා ලෙස කෙලින්ම චෝදනා ලබයි.

එනමුත් අදටද මේ සිතුවම් ඒවායේ ප්‍රකාශිත භාවයන් මෙන්ම අද්භූත ස්වභාවයක් උසුලමින් සංචාරකයන් දහස්ගණන් ඇද බැඳ තබාගනීවි.

 

නරඹන්න

 

අන්තර්ජාලය ඇසුරිනි.

 

අදට ද අභිරහසක් වූ බිහිසුණු චුපකබ්රා

වර්ෂ 1995 මාර්තු මාසයේ ඇමරිකාවට අයත් පුවටෝ රිකෝ (Puerto Rico) දූපත්වාසීන්ට අත් දකින්න ලැබුණේ අද්භූතජනක සිදුවීමකටයි. දූපතේ ගොවිපොළක ඇතිකල බැටළුවන් අටදෙනෙක් එකවර මියගොස් තිබීම ඊට තුඩුදුන් කාරණයයි. සෑම සත්ත්වයෙකුගේම වාගේ පපු ප්‍රදේශයේ වූ තුවාලයකින් ලේගලා යාම නිසා මියගොස් සිටි එම සතුන්ට කුමක් සිදු වීදැයිසොයා ගන්නට හෝ මරණයට හේතුව සොයා කුමක්ද යන්න සොයාගැනීමට කිසිවෙකුට නොහැකිව තිබිණි.

චුපකබ්‍රා

මෙයින් මාස කිහිපයකට පසු එනම් අගෝස්තු මාසයේ දී පුවටෝ රිකෝ රාජ්‍යයේම කැනෝවන්ස් (Canóvanas) නගරයේ වැසියෙකු වූ මැඩෙලින් ටොලෙන්ටිනෝ විසින් අද්භූතජනක ජීවියෙකු විසින් නගරයේ නිවාස වල සුරතල් සතුන් මරා දමන අන්දම සියැසින් දුටු බවක් සඳහන් කර තිබේ. නමුත් එය එවකට කිසිවෙක් පිළිගෙන නැත්තේ ටොලෙන්ටිනෝ මානසික රෝගියෙකු යැයි සිතමින්. මේ ආකාරයට කැනෝවන්ස් නගරයේ සතුන් 150ක් පමණ අද්භූත ආකාරයෙන් මිය යන තෙක් නගරවාසීන්ගේ අවදානය එයට යොමු නොවී තිබීම පුදුමයකි.

මැඩෙලයින් ටොලෙන්ටිනෝ

මේ සිදුවීම් වලට සම්බන්ධ අද්භූත සත්ත්වයෙකු පිළිබඳ ඉඟියත් සමග පුවටෝ රිකෝවේ ප්‍රසිද්ධ හාස්‍ය නළුවෙක් හා ව්‍යාපාරිකයෙකු වන සිල්වරියෝ පෙරේස්  (Silverio Pérez) විසින් මෙම අද්භූත සත්ත්වයා චුපකබ්‍රා ලෙස නම් කරන ලදි. ස්පාඤ්ඤ බසින් චුපර් (chupar) යනු උරාබොන්නා යන්න වන අතර කබ්‍රා (kabra) යනු එළුවා යන්නයි. එනම් චුපකබ්‍රා යනු එළුවන් ගේ ලේ උරාබොන්නා යන අර්ථය දෙන ලෙසින් නාමය සැදී ඇත.

මැඩෙලයින් දුටු බැව් කියන සත්ත්වයාගේ සටහන

මේ ආකාරයට පුවටෝ රිකෝ රාජ්‍යයෙන් ආරම්භ වූ මෙම භීෂණය පසුව ඇමරිකානු මහද්වීපය පුරා විවිධ ස්ථාන වලින් වාර්ථා වීමට ආරම්භ වන්නේ මුලු ලෝකයේම අවධානය ඒ වෙතට යොමුවෙමින්. දකුණු ඇමරිකානු කළාපය පුරාම මෙම බිහිසුණු සිදුවීම් පෙළ ව්‍යාප්ත වෙමින් පේරු, චිලී, කොලොම්බියාව, බ්‍රසීලය, ආජන්ටිනාව, මෙක්සිකෝව, එල් සැල්වදෝරය, පැනමාව වැනි රටවලින් මෙන්ම ඒවාට සම්පූර්ණයෙන්ම එපිටින් වූ රුසියාව හා පිලිපීනය වැනි රටවල ද චුපකබ්‍රා සිදුවීම් වාර්තා වී ඇත.

බෙන්ජමින් රඩ්ෆෝර්ඩ් සහ ඔහුගේ Tracking the Chupakabra පොත

ඇමරිකානු ලේඛකයෙක් හා ගවේෂකයෙකු වන බෙන්ජමින් රඩ්ෆෝර්ඩ් (Benjamin Radford) ගේ වසර පහක චුපක්බ්‍රා ගවේෂණ වලින් පසුව 2011 දී ඔහු විසින් නිකුත් කළ Tracking the Chupacabra නම් පොත චුපක්බ්‍රාවන්ගේ මතිමතාන්තර වෙනම දිශාවකට ගෙනයන්නක් විය. පුවටෝ රිකෝ හි පළමු චුපකබ්‍රා ඇසින් දුටු සාක්ෂිකාරිය වූ මැඩෙලයින් ටොලෙන්ටිනෝ ගේ ප්‍රකාශ සැලකිල්ලට ගත් ඔහු අනාවරණය කරගත්තේ වෙනත්ම කතාන්තරයකි.

 

රඩ්ෆෝඩ් විසින් මැඩෙලයින්ගෙන් චුපකබ්‍රා පිළිබඳ තොරතුරු ලබාගනිමින්

එනම් ඇය විසින් චුපකබ්‍රා දකින්න ආසන්න කාල වකවානුවේ දී ඇය විසින් එකල ජනප්‍රිය බිහිසුණු හොලිවුඩ් චිත්‍රපටයක් වූ Species චිත්‍රපටය නරඹා තිබුණු බවයි. එම සිනමාපටයේ සිටින බිහිසුණු සත්ත්වයා වන Sil  ඇය විසින් විස්තර කරන චුපකබ්‍රාගේ ස්වරූපයට බොහෝ සෙයින් සමාන බැවින් එම චිත්‍රපටයේ දර්ශන ඇගේ සිතේ තදින් බැඳී තිබීම සතෙකු බුදිමින් සිටින වෘකයෙකු හෝ නරියෙකු ඇයට චුපකබ්‍රාවෙකු ලෙස පෙනීම සිදුවී ඇති බවට රඩ්ෆෝර්ඩ් පෙන්වාදෙයි.

 

Species චිත්‍රපටය

එමෙන්ම 2010 වසරේ ඔක්තෝබරයේ දී මිචිගන් සරසවියේ (University of Michigan)ජෛවවිද්‍යාඥයෙක වන බැරී ඕ කෝනර් විසින් විසින් කරන ලද පර්යේෂණ වලින් හෙලි වූයේ කාන්තාර ආශ්‍රිත කොයෝටේ (Coyote) සතුන්ට Sarcoptes scabiei නම් පරපෝෂිතයාගේ බෝවීම නිසා එම සතුන්ගේ ලෝම හැලී සම ඝනකම් වී විරූපී වීම නිසා භයංකාර ස්වරූපයක් ඇතිවීම මෙම චුපකබ්‍රා ස්වරූපය ඇතිවීමට හේතු වන්නට ඇති බවයි. එමෙන්ම ඔහු වැඩිදුරටත් කියාසිටින්නේ කොයෝටේ සතුන් එම පරපෝෂිත ආසාදයෙන් දුර්වල වීම නිසා පුරුදු ලෙස වනසතුන් දඩයමේ නොගොස් ගොවිපොළ වල සිටින් කොටු වූ සතුන් සොයා පැමිණෙන බවයි.

මහාචාර්‍ය බැරී ඕ කෝනර්

චුපකබ්‍රා දුටුවන් පවසන්නේ ඌ උරගයෙකු වැනි කොරපොතු සහිත අළු පැහැ හෝ කොල පැහැ ඝනකම් සමක් ඇති පිට මත ඉතා තියුණු කටු පෙළක් සහිත සත්ත්වයෙකු බවයි. අඩි 3ත් 4 ත් අතර උසක් ඇති මෙම සත්ත්වයා කැන්ගරුවෙකු මෙන් පසුපස ගාත් වලින් සිටගෙන සිටින බවක් කියැවේ.

ආසාදිත කොයෝටේ සත්ත්වයෙක්

මේ අනුව බොහෝ චුපකබ්‍රා පර්යේෂකයන් කියනා අන්දමට මෙම සත්ත්වයා කොයෝටේ හෝ කැලෑ බල්ලෙකු (Mexican Hairless Dogs)විය හැකි බව සඳහන් වුවත් මෙතෙක් සිදුවූ කිසිඳු චුපකබ්‍රා පහර දීමකදී එම කිසිඳු සතෙකුගේ සිරුරු වල මස් අනුභව කිරීමක් දැකගත හැකිවී නොමැත. කොයෝටේ හෝ බල්ලන් සතුන් මරන්නේ මස් කෑම පිණිස මිස සිරුරු වල රුධිරය බීමට නොවන බව නොරහසකි. චුපකබ්‍රා යනු කොයෝටේ සතෙකු හෝ වෙනත් හඳුනාගත් වනජීවියෙකු බව තහවුරු කිරීමට වෙර දරණ ගවේෂකයන් හා පර්යේෂකයන් ගැටළුවට ලක්වන තැන මෙතැනය.

පිලිපීනයේ ඇති චුපකබ්‍රා අවන්හලක්

කෙසේ නමුත් ඇතැම් රටවල් චුපකබ්‍රා නිසා තම රටේ සංචාරක කර්මාන්තය දියුණු කරගැනීමට උත්සුක වී සිටිති. එමෙන්ම ලෝ සුපතල අද්භූත සත්ත්වයෙකු බිහිකරමින් චුපකබ්‍රා නමින් බිහිවූ බිහිසුණු චිත්‍රපට, මාලා නාටක, ආදිය ද ඉතා විශාල ගණනක් පවතී.

 

උපුටා ගැනීම අන්තර්ජාලයෙනි.